“ပြည်သူ့စစ်အင်အားထဲက ၅၀ ရာခိုင်နှုန်းလောက်ပဲ စစ်တပ်ကို ဆန့်ကျင်ခဲ့ရင်တောင် စစ်တပ်အတွက်နောက်ကျောမလုံရတဲ့ အခြေနေဖြစ်စေလိမ့်မယ်။ တကယ်တော့ ပြည်သူ့စစ်ဆိုတာ စစ်ကောင်စီအတွက် ခါးပိုက်ထဲက မြွေပွေးဖြစ်တယ်။ အချိန်မရွေး စစ်ကောင်စီကို ဒုက္ခပေးနိုင်တဲ့သူတွေဖြစ်သလို တော်လှန်ရေးတပ်ဖွဲ့တွေနဲ့ ပူးပေါင်းသွားရင်လည်း စစ်သင်တန်းပေးလိုက်တဲ့ စစ်တပ်က မိအေး နှစ်ခါနာ ဖြစ်အုံးမယ်”
*********************************
ရန်နိုင်
စစ်မှုထမ်းဥပဒေကြောင့် စစ်ကောင်စီဖက်က ရလိုက်တာက စစ်မှုထမ်းဖို့စိတ်မပါတဲ့ သူတွေကို Brainwash လုပ်လို့ မရတော့တဲ့ အသက်အရွယ်ရောက်နေတဲ့သူတွေပဲ ဖြစ်တယ်။ အဲ့ဒီ အဓမ္မစုဆောင်းထားတဲ့ တပ်သားသစ်တွေကို စစ်ကောင်စီက ရလိုက်တဲ့အချိန်မှာပဲ တော်လှန်ရေး တပ်ဖွဲ့တွေဘက်က ရလိုက်တာက စစ်ကောင်စီရဲ့ ဗျူဟာမှူးတွေ၊ အရာရှိတွေ သေဆိုသေ၊ ရှင်ဆိုရှင်မယ့် အမိန့်ကျပြီးသား စစ်ခွေးပေါင်းများစွာနဲ့ တပ်စခန်း ပေါင်းများစွာပဲဖြစ်တယ်။
အဖက်ဖက်က စစ်ရှုံးနေတဲ့ အကြမ်းဖက်စစ်ခေါင်းဆောင် မင်းအောင်လှိုင်က ဆေးမြီးတိုနည်းတွေဖြစ်တဲ့ ပျူစောထီးလို၊ ပြည်သူ့စစ်လို လက်ကိုင်တုတ်တွေကို မွေးထုတ်ပေးခဲ့တယ်။ စစ်မှုထမ်း ဉပဒေကို အတည်ပြုပြီးလည်း စစ်မတိုက်ချင်တဲ့သူတွေကို စစ်ပွဲထဲအတင်းအကျပ် ပါဝင်စေခဲ့တယ်။ အောက်ဆုံး အဆင့်မှ ဝင်လာရတဲ့ ရဲဘော်တွေကို ဘင်ခရာတပ်တွေနဲ့ ကြိုဆိုပြနေသလို ပန်းကုံးစွပ် ကြိုဆိုပွဲတွေနဲ့ အကြီးအကျယ် အောင်ပွဲခံပြနေခဲ့တယ်။
အတင်းအကျပ် စုဆောင်းခံထားရတဲ့ ပြည်သူ့စစ်ဆိုတဲ့သူတွေက စစ်ကောင်စီကို အချိန်မရွေး သေနတ်ပြောင်းလှည့်ဖို့ အကြံထုတ်နေသူတွေဖြစ်တယ်။ ပြည်သူ့စစ်အင်အားထဲက ၅၀ ရာခိုင်နှုန်းလောက်ပဲ စစ်တပ်ကို ဆန့်ကျင်ခဲ့ရင်တောင် စစ်တပ်အတွက်နောက်ကျောမလုံရတဲ့ အခြေနေဖြစ်စေလိမ့်မယ်။ တကယ်တော့ ပြည်သူ့စစ်ဆိုတာ စစ်ကောင်စီအတွက် ခါးပိုက်ထဲက မြွေပွေးဖြစ်တယ်။ အချိန်မရွေး စစ်ကောင်စီကို ဒုက္ခပေးနိုင်တဲ့သူတွေဖြစ်သလို တော်လှန်ရေးတပ်ဖွဲ့တွေနဲ့ ပူးပေါင်းသွားရင်လည်း စစ်သင်တန်းပေးလိုက်တဲ့ စစ်တပ်က မိအေး နှစ်ခါနာ ဖြစ်အုံးမယ်။
RNA_ဧပြီ(၁၁)၊၂၀၂၄ ခုနှစ်။
ရခိုင်ပြည်နယ်၊ အမ်းမြို့နယ် စစ်ဆင်ရေးအတွင်း ဧပြီလ ၁၀ ရက်နေ့က ပြည်သူ့လွတ်လပ်ရေးအဖွဲ့/ ပြည်သူ့လွတ်လပ်ရေးတပ်တော်မှ ရဲဘော် ပါကညော (ခ) စောအောင်စိုးလင်း ကျဆုံးခဲ့ရကြောင်း သိရသည်။
ရဲဘော် ပါကညော (ခ) စောအောင်စိုးလင်းသည် ပြည်သူ့လွတ်လပ်ရေးတပ်တော် အခြေခံစစ်သင်တန်း အပတ်စဥ် (၃) သင်တန်းဆင်းရဲဘော်တစ်ဦးဖြစ်ကြောင်း၊ ရဲဘော်သည် တပ်တော်မှ ပေးအပ်လာသော တာဝန်များကို ရွပ်ရွပ်ချွံချွံ တာဝန်ထမ်းဆောင်ခဲ့ခြင်းအား တပ်တော်မှ အလေးအနက် ဂုဏ်ယူအသိအမှတ်ပြုကြောင်း၊ အမ်းစစ်ဆင်ရေးအတွင်း ကျဆုံးခဲ့ရသည့်အတွက် တပ်တော်အနေဖြင့်များစွာ ဝမ်းနည်းကြေကွဲ ရပါသည်ဟု ပြည်သူ့လွတ်လပ်ရေးတပ်တော်မှ ထုတ်ပြန်ထားသည်။
RNA_ဧပြီ(၁၁)၊၂၀၂၄ခုနှစ်။
ကရင်အမျိုးသားလွတ်မြောက်ရေးတပ်မတော် (K.N.L.A) မှဦးဆောင်ပြီး ကရင်အမျိုးသားကာကွယ်ရေးတပ်ဖွဲ့ (K.N.D.O) နှင့် တော်လှန်ရေးပူးပေါင်းတပ်ဖွဲ့တို့မှ မြဝတီမြို့တွင် နောက်ဆုံးကျန်ရှိ သော အာဏာသိမ်းစစ်ကောင်စီတပ် ခလရ−၂၇၅ တပ်စခန်းအား အပြီးသတ်သိမ်းပိုက်ပြီးနောက် စစ်ကောင်စီလက်အောက်ခံ အကြွင်းအကျန်များအား ဆက်လက်ရှင်းလင်းမည်ဟု KNU က ကြေညာထားသည်။
“မြဝတီမြို့ရှိ အာဏာသိမ်းအကြမ်းဖက်စစ်ကောင်စီတပ်စခန်းအားလုံးအား တိုက်ခိုက် သိမ်းပိုက်နိုင်ခဲ့ပြီဖြစ်ကာ ကျန်ရှိနေသော စစ်ကောင်စီအကျွင်းအကျန်များအား ရှင်းလင်းမှုများကို ဆက်လက်လုပ်ဆောင်သွားမည်ဖြစ်ပြီး ပြည်သူလူထုများအနေဖြင့် ထိတ်လန့်ကြောက်ရွံ့ခြင်းများမရှိဘဲ ပူးပေါင်းလုပ်ဆောင်မှုများ ပြုလုပ်ပေးရန်အသိပေးအပ်သည်” ဟု ကြေညာချက်တွင် ဖော်ပြထားသည်။
RNA_ဖားကန့်၊ ဧပြီ (၁၁)၊၂၀၂၄ ခုနှစ်။
ဖားကန့်မြို့နှင့် မိုးကောင်းမြို့သွား ကားလမ်းပါ်ရှိ နန့်ယားကျေးရွာတွင် အခိုင်အမာ တပ်စွဲထားသည့် စစ်ကောင်စီ တပ်စခန်းကုန်းတိုက်ပွဲတွင် စစ်ကောင်စီတပ်မှ (၃၀) ကျော်အလံဖြူထောင်လက်နက်သည့်အတွက် KIA/KPDF ပူးပါင်းအဖွဲ့က ယနေ့ (ဧပြီလ ၁၁ ရက်) နံနက် (၆)နာရီခန့်တွင် အပြီးသတ်သိမ်းပိုက်ရရှိခဲ့သည်။
ယနေ့နံနက် (၆) နာရီခန့်က စစ်သုံ့ပန်း (၃၀) ကျော် အလံဖြူထောင် လက်နက်ချအပြီး နန်ယားစခန်းကုန်းကို အောင်မြင်စွာ သိမ်းပိုက်နိုင်ခဲ့သည်ဟု ရှေ့တန်းသတင်းရင်းမြစ်က အတည်ပြုသည်။
ဧပြီ (၉)ရက် နံနက်က နန့်ယားစစ်တပ်စခန်းကို KIA/KPDF က စတင်ထိုးစစ်ဆင်တိုက်ခိုက်ခဲ့ပြီး ယနေ့နံနက်မှသာ သိမ်းပိုက်နိုင်ခဲ့ခြင်းဖြစ််််််််ကြောင်း၊ နန့်ယားကျေးရွာသည် ဖားကန့်မြို့နှင့် မိုးကောင်းမြို့သွားကားလမ်း၏ ခရီးတစ်ထောက်နားရာ ကျေးရွာတစ်ခုဖြစ်ပြီး စစ်ကောင်စီတပ်က ရွာထိပ်တွင် အခိုင်အမာတပ်စွဲကာ ခရီးသွားပြည်သူများထံမှ ဂိတ်စခန်းဖွင့်ကာ ငွေညစ်နေခဲ့ခြင်းဖြစ်သည်။
ဖားကန့်-မိုးကာင်းလမ်းပါ်မှ နန့်တိန်းစခန်းကို ဖေဖော်ဝါရီ (၂)ရက်ကသိမ်းပိုက်ထားနိုင်ပြီး ယခုအခါ နန့်ယားစခန်းအား KIA/KPDF ပူးပေါင်းအဖွဲ့က ထပ်မံ ထိန်းချုပ်ထားနိုင်ခဲ့ပြီဖြစ်သည်။
Red News Agency
RNA_ဧပြီ(၁၀)၊၂၀၂၄ခုနှစ်။
ကရင်ပြည်နယ်၊ မြဝတီမြို့အစွန်ရှိ စစ်ကောင်စီ၏ မြဝတီခြေလျင်တပ် ခလရ ၂၇၅ နှင့် တော်လှန်ရေးအင်အားစုများ ယနေ့နံနက်ပိုင်းကစတင်ပြီး နေ့လယ် ၁ နာရီဝန်းကျင်ထိ ပစ်ခတ်မှုများ ဆက်လက်ဖြစ်ပွားနေကြောင်း သိရသည်။
စစ်ကောင်စီတပ်၏ လက်နက်ကြီးပစ်ခတ်မှုများကြောင့် မြဝတီမြို့အစွန်ရှိ ရပ်ကွက်တချို့အတွင်း ကျရောက်ပေါက်ကွဲများမှုများရှိကြောင်း၊ မြဝတီမြို့ခံ ပြည်သူများသည်လည်း စစ်ဘေးရှောင်ရန်အတွက် ပြင်ဆင်ရွေ့ပြောင်းမှုများရှိကြောင်း သိရသည်။
[embedyt] https://www.youtube.com/watch?v=WsW_2lRGaLY[/embedyt]
စစ်ကောင်စီတပ်မှာလည်း မြဝတီကို စစ်အင်အားဖြည့်ရန် ဖားအံဘက်မှ စစ်ယာဉ်တန်းများ ချီတက်လာကြောင်း၊ ကော့ကရိတ်ဝန်းကျင်တွင်လည်း တော်လှန်ရေးအင်အားစုများက ကော့ကရိတ်မြို့သိမ်းနိုင်ရေး ပစ်ခတ်မှုများရှိကြောင်း၊ မြဝတီမြို့ အဝင်အထွက် ( ကော့ကရိတ်သွားသည့်လမ်း) ပိုင်း၊ သင်္ဃန်းညီနောင်တွင်လည်း တော်လှန်ရေးအင်အားစုများ စိုးမိုးထားကြောင်း၊ မြဝတီ- ကော့ကရိတ် အာရှလမ်းမတွင်လည်း တော်လှန်ရေးအင်အားစုများက စိုးမိုးထားမှုများရှိကြောင်း သိရသည်။ ရုပ်သံရိုက်ကူး – မြဝတီဒေသခံ။
#RedNewsAgency #RNA #RedNews
RNA_ဧပြီ(၁၀)၊၂၀၂၄ ခုနှစ်။
သာယာဝတီထောင်အတွင်း ဖမ်းဆီးခံထားရသည့် နိုင်ငံရေးအကျဉ်းသူ မပန်းအိခင်ထံ ဧပြီလ (၈) ရက်နေ့က ထောင်ဝင်စာသွားပို့သည့် မိခင် ဒေါ်ကြည်ညွန့် ( အသက် – ၆၇ နှစ်) ထောင်ဝင်စာပို့ရန် စောင့်ဆိုင်းနေစဉ် ကွယ်လွန်သွားကြောင်း သိရသည်။
သာယာဝတီထောင်ရှေ့ကို ဧပြီလ ၈ ရက်နေ့ ညနေ ၃ နာရီခွဲကျော်က ရောက်ရှိချိန်တွင် မိသားစုဝင်တစ်ဦးသာ ထောင်ဝင်စာ တွေ့ခွင့်ရသည့် အတွက် မိခင်ဖြစ်သူမှ ကားပေါ်နေခဲ့စဉ် မပန်းအိခင် ညီမဖြစ်သူ ထောင်ဝင်စာတွေ့ရှိရန် လွှတ်လိုက်ကြောင်း၊ မပန်းအိခင်နှင့်ညီမဖြစ်သူ ထောာင်ဝင်စာတွေ့ပြီး ပြန်လာချိန် ကားပေါ်မှာရှိသည့် မိခင်မှာ ကွယ်လွန်နေပြီဖြစ်ကြောင်း သိရသည်။
RNA_ဧပြီ(၉)၊၂၀၂၄ခုနှစ်။
နွေဦးတော်လှန်ရေးကာလ ဒုတိယအကြိမ် ပြည်သူ့ညီလာခံကို ဖက်ဒရယ်ဒီမိုကရေစီပဋိညာဉ်ပါ ပြဌာန်းချက်များ နှင့်အညီ အမျိုးသားညီညွတ်ရေး အတိုင်ပင်ခံကောင်စီမှ ဦးဆောင်၍ ၅ ရက်တာအတွင်း ဆုံးဖြတ်ချက်များတွင် ပအဖ၊ လကဖ၊ ပလဖ တို့ တာဝန်ယူမှု တာဝန်ခံမှုရှိရန် သုံးသပ်ပြင်ဆင် တည်ဆောက်ရန်အချက်အပါအဝင် (၃) ချက်ကို ဆုံးဖြတ်အတည်ပြုခဲ့သည်ဟု သိရသည်။
“ဒေသန္တရ အုပ်ချုပ်ရေး၊ တရားဥပဒေစိုးမိုးရေးကိစ္စ မြေပြင် အုပ်ချုပ်ရေး၊ ကာကွယ်ရေး၊ လုံခြုံရေးယန္တရားများ (ပအဖ၊ ပကဖ၊ ပလဖ) တို့ကို ဖက်ဒရယ် ဒီမိုကရေစီ ပဋိညာဉ်နှင့်အညီ စနစ်တကျ လုပ်ဆောင်နိုင်ရန်နှင့် တာဝန်ယူမှု၊ တာဝန်ခံမှုရှိစေရန် အတွက် အမျိုးသားညီညွတ်ရေးအစိုးရ အပါအဝင် သက်ဆိုင်ရာ တော်လှန်ရေး အင်အားစုများအကြား ဟန်ချက်ညီ လုပ်ဆောင်နိုင်သော ယန္တရားများအဖြစ် သုံးသပ်ပြင်ဆင် တည်ဆောက်ရန်” ပြည်သူ့ညီလာခံမှ ဆုံးဖြတ်အတည်ပြုခဲ့သည်ဟု NUCC ကထုတ်ပြန်ထားသည်။
(more…)
“လုံခြုံမယ်လို့ထင်ထားတဲ့ နေပြည်တော်လည်းမလုံခြုံဘူး စစ်ခေါင်းဆောင် မင်းအောင်လှိုင်အတွက် နယ်မြေမရှိတော့ဘူးဆိုတာ”
********************************
ရန်နိုင်
ရှေးပဝေသဏီက စစ်ဘုရင်ကြီးတွေရဲ့ စစ်တိုက်နည်း မဟာဗျူဟာတွေအရဆိုရင် ရန်သူ့ရဲ့ အသည်းနှလုံးဖြစ်တဲ့ နေပြည်တော်ကို ထိုးဖောက်နိုင်ရင် ရန်သူ့ကိုအောင်နိုင်ပြီဟု သတ်မှတ်ခဲ့ကြတယ်။ တရုတ်စစ်ဘုရင်ကြီးဖြစ်တဲ့ ဆွန်ဇုကတော့ အခြေချရာနယ်မြေတွေကို မှုန့်မှုန့်ညက်ညက်ခြေဖျက်ပြီး ရန်သူအလိုလို ကြောက်ရွံ့အရှုံးပေးလာစေတဲ့ ဗျူဟာကို သုံးခဲ့တယ်။
လက်ရှိ မြန်မာနိုင်ငံမှာ ကြုံနေရတဲ့ စစ်ပွဲတွေမှာတော့ ဆိုခဲ့တဲ့ စစ်နည်း ဗျူဟာ ၂ ခုလုံးကို အသုံးပြုနေတာ တွေ့ရတယ်။ ဒါတင်မကသေးပဲ ရောမခေတ်က သုံးခဲ့တဲ့ ထရိုဂျန်ဆန်ဆန် စိမ့်ဝင်စစ်ကိုလည်း လက်တွေ့အသုံးချနေတယ်။ ကမ္ဘာ့အဆင့် ၃၈ ဆိုတဲ့ စစ်တပ်ကြီးလဲ တော်လှန်ရေး အင်အားစုတွေနဲ့ ရင်ဆိုင်နေရတဲ့အခါ အလဲလဲအကွဲကွဲနဲ့ သမိုင်းဝင်အရှက်တွေကွဲနေရတယ်။
တော်လှန်ရေးစကတည်းက CDM တွေက စွန့်ခွာသွားကြသလို၊ UG တွေကလည်း အမှည့်ခြွေ ခြွေနေတာမို့ အင်အားက အိုကြီးအိုမ ရဲဘော်ဟောင်းကြီးတွေကိုပဲ အားကိုးနေရတော့တာ။ ဒါကိုတောင် အားမရသေးလို့ ရန်ကုန်မြို့ရဲ့ စစ်ရုံးချုပ်လိုနေရာတွေ၊ ကြည့်မြင့်တိုင် ကမ်းနားက ဆီတင်သင်္ဘောကြီးတွေကိုပါ ရန်ကုန် ပ.က.ဖ တွေက လက်စွမ်းပြ ဖောက်ခွဲပြလိုက်သေးတယ်။ ဒီထက်ပိုထိရောက်တဲ့ မစ်ရှင်တွေရှိသေးကြောင်း စစ်ကောင်စီကို သတိပေးလိုက်သေးတယ်။ စိမ့်ဝင်စစ်တွေရဲ့ လက်တွေကျတဲ့ အောင်ပွဲတွေကို စစ်ကောင်စီ တပ်ဖွဲ့ဝင်တွေ လှိမ့်နေအောင် ခံနေရတာဖြစ်တယ်။
တိုင်းရင်းသားတော်လှန်ရေး တပ်ဖွဲ့တွေကလည်း အနှစ်အနှစ်အလလက စုစည်းထားတဲ့ စစ်အာဏာရှင် မုန်းတီးမှုတွေကို နွေဦးတော်လှန်ရေးမှာ ပေါက်ကွဲပြလိုက်ပြီး သက်ဆိုင်ရာ နယ်မြေတိုင်းမှာ စစ်ကောင်းစီ ကင်းစင်နယ်မြေဖြစ်စေခဲ့တယ်။ လောလောလတ်လတ် မင်းအောင်လှိုင်ကိုယ်တိုင် ရေစက်ချပေးလိုက်တဲ့ (၅) မိနစ် ဖလူးစခန်းအပါအဝင် ခမရ ၃၅၅၊ ၃၅၆၊ ၃၅၇၊ သဃ်န်းညီနောင် ဗျူဟာကုန်းအပါအဝင် စစ်ကောင်စီ ကင်းစင်နယ်မြေဖြစ်လာတော့မယ့် မြဝတီမြို့ကြီးက ထည်ထည်ဝါဝါ ပေါ်လာပြီဖြစ်တယ်။
“တောင်ပိုင်း စစ်ဒေသမှာလည်း အင်အားအများဆုံးနဲ့ ပထဆုံးလက်နက်ချပွဲဖြစ်ပါတယ်။ ဒါဟာ တော်လှန်ရေးအင်းအားစုများရဲ့ သမိုင်းတွင်တဲ့ အောင်ပွဲတခုဖြစ်ပါတယ်။ လက်နက်ချတယ်ဆိုတာကလည်း ခုခံနိုင်စွမ်း၊ စစ်ကူတွေမရတဲ့အဆုံး အသက်သေမှာကြောက်ပြီး အသက်ရှင်ဖို့ တခုတည်းသော နည်းလမ်းကို ရွေးချယ်လိုက်ခြင်းဖြစ်ပါတယ်”
****************************
ချမ်းမင်း
တော်လှန်ရေးအရှိန်ပြင်းလာတဲ့ သတင်းတွေဟာ ဒီရက်ပိုင်းမှာကို အတော်လေး ကျယ်ကျယ်လောင်လောင်နဲ့ မြင်တွေ့နေရပါတယ်။ ရခိုင်ဘက်ကသတင်းတွေ၊ ကချင်ဘက်ကသတင်းတွေသာမက အခုနောက်ဆုံး ကရင်ပြည်နယ်က သတင်းတွေကပါ တော်လှန်ရေးအတွက်အားတက်စရာ၊ အားရှိစရာ အောင်ပွဲတွေများစွာကို မြင်တွေ့နေရပါတယ်။
အနီးစပ်ဆုံးအနေနဲ့ဆိုရင် ဧပြီလ၆ ရက်နေ့က ကရင်ပြည်နယ်၊ KNU တပ်မဟာ ၆ နယ်မြေရှိ သင်္ကန်းညီနောင် စစ်ဗျူဟာစခန်းမှ အရာရှိ ၆၇ ဦး အခြားအဆင့် ၄၁ ၀ ဦးအပါအဝင် စုစုပေါင်း စစ်ကောင်စီဘက်မှ ၆၁၇ ဦး လက်နက်ချအညံ့ခံခဲ့တယ် ဆိုတဲ့သတင်းကိုကြည့်ရင်သိနိုင်ပါတယ်။ ကရင်ပြည်က ထူးခြားလှတဲ့ လက်နက်ချပွဲကြီးဆိုရင်လည်း မမှားသလို KNU နဲ့ တော်လှန်ရေးအင်အားစုများရဲ့ ထူးခြားလှတဲ့ အောင်ပွဲကြီးလည်း ဖြစ်ပါတယ်။
လက်နက်ချအညံ့ခံခဲ့တဲ့ စစ်ကောင်စီတပ်ဖွဲ့ဝင်တွေထဲ ဗိုလ်မှူးကြီးအဆင့်ရှိတဲ့ ဗျူဟာမှူးတစ်ဦးပါ ပါဝင်ပြီး လက်နက်ခဲယမ်းတွေ၊ အမြောက်နဲ့ စားနပ်ရိက္ခာတွေပါ မနည်းမနော ရရှိလိုက်ပြီး ကျွန်တော်တို့ တော်လှန်ရေးတပ်ဖွဲ့ဘက်ကတော့ ကျည်တစ်ချက်တောင်မဖောက်လိုက်ရဘဲ အောင်ပွဲအကြီးကြီးကိုရရှိလိုက်တယ်လို့ဆိုနိုင်ပါတယ်။ ဒါ့အပြင် အခုလက်နက်ချလိုက်တဲ့ သင်္ကန်းညီနောင် စစ်ဗျူဟာ စခန်းဆိုတာ ၁၉၆၈ ခုနှစ်လောက်ကစပြီး ဒီအချိန်ထိ နှစ်ပေါင်း ၅၀ ကျော်အောင်အထိအခိုင်အမာတပ်စွဲထားတဲ့ ဗျူဟာကုန်းတစ်ခုဖြစ်သလို မြဝတီမြို့နဲ့ သင်္ကန်းညီနောင်မြို့အတွက် စစ်ရေးအရ အရေးပါလှတဲ့ ဗျူဟာစခန်းကုန်းတစ်ခုလည်းဖြစ်ပါတယ်။