RNA_ဧပြီ(၁၉)၊၂၀၂၅ခုနှစ်။
စစ်ကိုင်းတိုင်း၊ ကလေးမြို့နယ်တောင်ပိုင်းနှင့် မကွေးတိုင်း၊ ဂန့်ဂေါမြို့နယ် မြောက်ပိုင်းအစပ်တွင် စစ်ဆင်ရေးများအတွင်း စခန်းများသိမ်းနိုင်ခဲ့ပြီး မိခင်တပ်ရင်းထံ ဧပြီလ (၁၅) ရက်နေ့က ပြန်ရောက်လာသော ABSDF အမှတ် (၃) စစ်ကြောင်း ရဲဘော်များကို အောင်သပြေများဖြင့် ဒေသခံပြည်သူများက ဝမ်းသာအားရ ကြိုဆိုခဲ့ကြသည်။
[embedyt] https://www.youtube.com/watch?v=ytkl091gvmI[/embedyt]
RNA_ဧပြီ(၁၇)၊၂၀၂၅ခုနှစ်။
မကွေးဗဟိုအကျဉ်းထောင် (ဒေါင်းနေထောင်) တိုက်ခိုက်ခံရပြီးနောက် အကျဉ်းထောင်တွင်းမှ နိုင်ငံရေးအကျဉ်းသားများ အသက်အန္တရာယ်စိုးရိမ်ရသည်အထိ နှိပ်စက်ခံရမှုများရှိကြောင်း အကျဉ်းထောင်နှင့် နီးစပ်သူများထံမှ သိရသည်။
မကွေးမြို့နှင့် ရေနံချောင်းသွားသည့်လမ်းမဘေးရှိ မကွေးထောင် (ဒေါင်းနေထောင်) နှင့် မျက်နှာချင်းဆိုင် (လမ်းသာခြား)ရှိ စစ်ကောင်စီ၏ အမှတ် (၂၅) ရဲတပ်ရင်းကို ဧပြီလ ၁၃ ရက်နေ့ ညဦးပိုင်းတွင် တိုက်ခိုက်ခံရပြီးနောက် အကျဉ်းထောင်တွင်းရှိ နိုင်ငံရေးအကျဉ်းသားများကို ဧပြီလ ၁၄ ရက်နေ့ကတည်းက ပြင်ပအဖွဲ့အစည်းနှင့်အဆက်အသွယ်ရှိသည်ဟု ထောင်အာဏာပိုင်များက ယူဆကာ အသက်အန္တရာယ်စိုးရိမ်ရသည်အထိ ရိုက်နှက်စစ်ဆေးနေခြင်းဖြစ်သည်။
RNA_ဧပြီ(၁၆)၊၂၀၂၅ခုနှစ်။
စစ်ကိုင်းတိုင်း၊ ကလေးမြို့နယ်တောင်ပိုင်းနှင့် မကွေးတိုင်း၊ ဂန့်ဂေါမြို့နယ် မြောက်ပိုင်းအစပ်တွင် CDF-KKG မှ Major Operation အဖြစ် ပြုလုပ်သည့် စစ်ရေးဖော်ဆောင်မှုများအတွင်း စစ်ကောင်စီတပ်စခန်းများကို သိမ်းပိုက်နိုင်ခဲ့ပြီး လက်နက်ခဲယမ်းအများအပြား သိမ်းဆည်းရမိခဲ့သည်ဟု ယနေ့ ABSDF အမှတ် (၃) စစ်ကြောင်းက ထုတ်ပြန်ထားသည်။
CDF-KKG Major Operation စတင်သည့် ၂၀၂၅ ခုနှစ် ဖေဖော်ဝါရီလ ၁၂ ရက်နေ့က ကလေးမြို့နယ်တောင်ပိုင်းရှီ ကမ်းပါးနီ စစ်ကောင်စီစခန်းအား သိမ်းပိုက်နိုင်ခဲ့ပြီး၊ ဖေဖော်ရီလ ၁၅ ရက်နေ့တွင်လည်း ကလေးမြို့နယ်နှင့် ဂန့်ဂေါမြို့နယ်အကြားရှိ မှန်တောရွာနှင့် အောင်သာယာ (အနောက်)ရွာရှိ စစ်ကောင်စီ ခြေကုတ်ယူထားသည့် စစ်စခန်းများအား သိမ်းပိုက်နိုင်ခဲ့ကြောင်း၊ ဧပြီလ ၁၁ ရက်နေ့က ကလေးနယ်မြို့နယ်တောင်ပိုင်းအဆုံး ကလေး-ဂန့်ဂေါ လမ်းမပေါ်ရှိ စစ်ကောင်စီအမာခံရွာဖြစ်သည့် ကြံသာရွာရှိ စစ်ကောင်စီနှင့် ပျူစောထီးများအား တိုက်ခိုက်သိမ်းပိုက်နိုင်ခဲ့ကြောင်း သိရသည်။
RNA_ဧပြီ(၁၅)၊၂၀၂၅ခုနှစ်။
မကွေးတိုင်း၊ စေတုတ္တရာမြို့နယ်အတွင်းရှိ စေတုတ္တရာနှင့် စလင်းမြို့နယ် ဆက်သွယ်ထားသော လမ်းပိုင်း၏ မိုင်တိုင် (၁၈) တွင်ရှိသော စစ်ကောင်စီ၏ (၁၈) မိုင်ကုန်းစခန်းသိမ်းတိုက်ပွဲအတွင်း စစ်သုံ့ပန်း (၄) ဦးနှင့်အတူ လက်နက်ခဲယမ်းများသိမ်းဆည်းရမိကြောင်း သိရသည်။
RNA_ဧပြီ(၁၀)၊၂၀၂၅ခုနှစ်။
စစ်ကိုင်းတိုင်း၊ အင်းတော်မြို့သိမ်းတိုက်ပွဲကို (၈) လကျော်ကြာဆင်နွှဲပြီး အောင်မြင်ခဲ့သော မြို့သိမ်းတိုက်ပွဲတွင် ပခုက္ကူခရိုင်အမှတ် (၁၀) တပ်ရင်းရဲဘော်များ၏ အညာမြေအိမ်ပြန်ခရီးတွင် ရဲဘော် (၄) ဦးကျဆုံးနေခဲ့သည့်အတွက် အိမ်ပြန်ခရီးဟာ လူမစုံတော့ပေမဲ့ ဆက်လက်တိုက်ပွဲဝင်သွားမည်ဟု သိရသည်။
“တိုင်းပြည်အတွက် အသက်ပေးလှူခဲ့ရသော အာဇာနည်ရဲဘော် (၄) ဦးအား အလေးပြုအပ်ပါသည်။ အမြဲအောက်မေ့တမ်းတ၍လည်းရှိနေပါ့မည်။ အိမ်ပြန်ခရီးတွေဟာလူမစုံတော့ပေမယ့် ဆက်လက်ပြီး စစ်အာဏာရှင်ပြုတ်ကျပြီး ဖက်ဒရယ်ဒီမိုကရေစီနိုင်ငံတော်ကြီးတရပ်ပေါ်ထွန်းပြီးသည်အထိ ပခုက္ကူခရိုင်အမှတ်(၁၀)တပ်ရင်းအနေဖြင့် နိုင်ငံ့တာဝန်များကို ပခုံးပေါ်အမြဲထမ်းတင်ထားပါ့မည်” ဟု ယနေ့ ထုတ်ပြန် ပြောကြားထားသည်။
RNA_ဧပြီ(၇)၊၂၀၂၅ခုနှစ်။
မကွေးတိုင်း၊ စလင်းမြို့နယ်ရှိ စစ်ကောင်စီ၏ တညောင်ဓာတ်အားခွဲရုံ တိုက်ပွဲတွင် ကပစများကို ဓာတ်အားပေးနေသော ထရန်စဖော်မာ အလုံး ၈၀ ကျော် ဖျက်ဆီးနိုင်ခဲ့သည့်အပြင် စစ်ကောင်စီတပ်မှ အရာရှိ (၂) ဦးအပါအဝင် (၃၀) ကျော်သေဆုံးခဲ့ကြောင်း သိရသည်။
တညောင်ဓာတ်အားခွဲရုံသည် စစ်ကောင်စီ လေတပ်အတွက် လေယာဥ်ဗုံးသီးများထုတ်လုပ်ရာ ကပစ ၂၁၊ လေကြောင်းကာကွယ်ရေးလက်နက်များ ထုတ်လုပ်ရာ ကပစ ၂၀ နှင့် ကပစ ၂၅ နှင့် ဆိပ်ဖြူမြို့ အမှတ် (၉) လေကြောင်းရန်ကာကွယ်ရေးကွပ်ကဲမှု စစ်ဆင်ရေးဌာနချုပ်သို့ အဓိက ဓာတ်အားပေးနေကြောင်း၊ ဓာတ်အားခွဲရုံတိုက်ပွဲကို မတ်လ ၃၁ ရက်နေ့က ၄ နာရီကျော်ကြာ တိုက်ခိုက်ခဲ့ရသည်ဟု ဗမာ့တပ်တော်(BAMAR ARMY) နှင့် ပေါက်တောင်ပိုင်းကျန်းမာရေးနှင့်သူနာပြုတပ်ဖွဲ့က ထုတ်ပြန်ထားသည်။
RNA_ဧပြီ(၃)၊၂၀၂၅ခုနှစ်။
မကွေးတိုင်းအခြေစိုက်၊ ပေါက်တောင်ပိုင်း ကျန်းမာရေးနှင့်သူနာပြုတပ်ဖွဲ့မှ တပ်ခွဲမှူး ရဲဘော်ဆံရှည််််သည် မတ်လ ၃၁ ရက် နံနက် ၆ နာရီတွင် စစ်ကောင်စီတပ် စခန်းသိမ်းတိုက်ပွဲအတွင်း မြင့်မြတ်စွာ ကျဆုံးခဲ့ရကြောင်း သိရသည်။
#RedNewsAgency #REDNEWS #RNA
RNA_မတ်(၂၄)၊၂၀၂၅ခုနှစ်။
မကွေးတိုင်း၊ ဂန့်ဂေါမြို့နယ်၊ နှမ်းခါးကျေးရွာဆေးခန်း၌ ဆေးကုသနေစဉ် မတ်လ ၂၂ ရက်နေ့ နံနက်ပိုင်းက လေကြောင်းဗုံးကြဲခံရမှုအတွင်း သေဆုံးသွားခဲ့ရသော ဒေါက်တာမြစိုးအောင်နှင့် ဇနီးဖြစ်သူ ဒေါ်ခိုင်နှင်းဝေတို့အား CDM အာဇာနည်သူရဲကောင်းအဖြစ် အသိအမှတ်ပြုသည်ဟု NUG ကျန်းမာရေးဝန်ကြီးဌာနက ဝမ်းနည်းကြောင်း သဝဏ်လွှာထုတ်ပြန်ထားသည်။
ဒေါက်တာမြစိုးအောင်နှင့် ဇနီးဖြစ်သူ ဒေါ်ခိုင်နှင်းဝေတို့သည်၂၀၂၁ ခုနှစ်၊ စစ်အာဏာမသိမ်းခင်က စစ်ကိုင်းတိုင်း၊ ကလေးမြို့နယ်၊ တင်သားတိုက်နယ်ဆေးရုံတွင် တိုက်နယ်ဆရာဝန်နှင့် အထက်တန်းသူနာပြုများအဖြစ် တာဝန်ထမ်းဆောင်ခဲ့ပြီး စစ်အာဏာသိမ်းပြီးနောက်ပိုင်း အကြမ်းမဖက် အာဏာဖီဆန်ရေးလှုပ်ရှားမှု (Civil Disobedience Movement – CDM) ပြုလုပ်ကာ မကွေးတိုင်းနှင့် စစ်ကိုင်းတိုင်းအတွင်းရှိ ဒေသများအတွင်း လိုက်လံဆေးကုသမှုပေးနေသူဖြစ်သည်။
RNA_မတ်(၁၈)၊၂၀၂၅ခုနှစ်။
မကွေးတိုင်း၊ ပခုက္ကူခရိုင်၊ မြိုင်မြို့နယ်အခြေစိုက်၊ ပခုက္ကူခရိုင်အမှတ် ၆ တပ်ရင်းရှိ အရာရှိ၊ အရာခံ၊ အကြပ်စစ်သည် အားလုံး ပါဝင်သော တပ်ရင်းစုဖွဲ့မှုနှင့် လေ့ကျင့်မှု သင်တန်းဆင်းပွဲကျင်းပနိုင်ခဲ့သည်။
ပခုက္ကူခရိုင် အမှတ် -၆ တပ်ရင်း- Myaing Villages Revolution Front (MVRF) အနေဖြင့် ဒေသတွင်းမဟာမိတ်များဖြင့် တိုက်ပွဲဝင်ခဲ့မှုအတွင်း စစ်ကောင်စီတပ်သား (၁၆၆) ဦးသေဆုံးခဲ့ပြီး အရှင်ဖမ်းဆီးရမိသူ (၆) ဦးရှိကြောင်း၊ တိုက်ပွဲများအတွင်းမှ G3 ၅ လက်၊ G4 ၁ လက်၊ Ma4 ၃ လက်၊ Ma 1 ၇ လက်၊ Ma5 ၁ လက်၊ ကာဘိုင် ၃ လက်၊ Ma2 ၃ လက်၊ Ma3 ၅ လက်၊ Ma 11 ၁ လက်၊ 79 mm ၁ လက်၊ Ba 100 ၆၀ mm ၁ လက်၊ ပြောင်းရှည် ၁ လက်၊ M16 ၂ လက် ဒုတိယ ကမ္ဘာစစ်သုံး ခါချိုး ၂ လက်တို့ကို သိမ်းဆည်းရမိကာ၊ ရိက္ခာကား ၂ စီး မီးရှို့ ဖျက်ဆီးနိုင်ခဲ့ပြီး ၁၂ ဘီးကား ၂ စီးသိမ်းဆည်းနိုင်ခဲ့သည်ဟု MVRF က ယနေ့ ထုတ်ပြန်ထားသည်။