Category: သတင်း

RNA_ဒီဇင်ဘာ ၂၄ ရက်၊ ၂၀၂၁ ခုနှစ်။

စစ်ကိုင်းတိုင်း၊ ရေဦးမြို့နယ်၊ ရေမျက်ရွာတွင် စစ်ကောင်စီတပ် (၃) ရက် တပ်စွဲပြီး ပြည်သူ (၄) ဦးကို ရက်ရက်စက်စက်သတ်ပြီး နေအိမ်များမီးရှို့သွားကြောင်း သိရသည်။

ရေမျက်ရွာအတွင်း စစ်ကောင်စီတပ် (၃) ရက်ကြာ တပ်စွဲအပြီး ဒီဇင်ဘာလ ၂၃ ရက်နေ့က ထွက်ခွါသွားရာတွင် အိမ်ထဲတွင် မီးရှို့အသတ်ခံထားရသူ (၁) ဦး၊ ဓားစာခံအဖြစ်ဖမ်းဆီးခံရပြီး ဦးခေါင်းတေ့ပစ်ရသူ (၁) ဦး၊ သေနတ်ဒဏ်ရာရရှိသည့် နေရာတွင် သေဆုံးနေသူ အမျိုးသမီး (၁) ဦးအပါအဝင် အသတ်ခံထားရသူ အနည်းဆုံး (၃) ဦးအထပ်ရှိကြောင်း၊ ရွာတွင်ကျန်ခဲ့သည့် သက်ကြီးရွယ်အိုနှင့် တိရိစ္ဆာန်များ စားစရာမရှိသည့် အနေအထားနှင့်ကြုံတွေ့ခဲ့ရပြီး၊ နေအိမ်၊ ကား၊ ဆိုင်ကယ် စသည်တို့ကို မီးရှို့သွားကြောင်း သိရသည်။

စစ်ကောင်စီတပ်နှင့် ဒေသခံ ပြည်သူကာကွယ်ရေးတပ်ဖွဲ့တို့ ဒီဇင်ဘာလ ၂၀ ရက်နေ့က ရေမျက်ရွာအနီး တိုက်ပွဲဖြစ်ပွားခဲ့ပြီး စစ်ကောင်စီတပ်က လေကြောင်းက ပစ်ခတ်ခဲ့သည့်အတွက် ဒေသခံများ ရှောင်တိမ်းခဲ့ကြရပြီး PDF များဆုတ်ပေးချိန် ကျေးရွာအတွင်း တပ်စွဲကာ ပြည်သူများကို သတ်၊ နေအိမ်နှင့် အဖိုးတန်ပစ္စည်းများကို မီးရှို့ဖျက်ဆီးခဲ့ကြခြင်း ဖြစ်ကြောင်း သိရသည်။

ဓာတ်ပုံ : ဒေသခံ

Red News Agency

RNA_ဒီဇင်ဘာ ၂၄ ရက်၊ ၂၀၂၁ ခုနှစ်။

အာဏာသိမ်း စစ်ခေါင်းဆောင် မင်းအောက်လှိုင်နှင့် တွေ့ဆုံးစဉ် မြန်မာပြည်ကြီး အမြန်ငြိမ်းချမ်းမှု ရရှိစေရန် နားလည်ခွင့်လွှတ်မှုတို့ဖြင့် ရင်ကြားစေ့ရေးလုပ်ငန်းများ ပြန်လည်ဆောင်ရွက်ရန် အထူးအားပေးကြောင်း ရန်ကုန် ကက်သလစ် ဂိုဏ်းချုပ် ကာဒီနယ် ချားလ်စ်ဘိုကပြောကြားခဲ့ကြောင်း သိရသည်။

ဒီဇင်ဘာလ ၂၃ ရက်နေ့ ညနေပိုင်းက မင်းအောင်လှိုင်နှင့်အဖွဲ့သည် လုံခြုံရေး အထပ်ထပ်ချကာ စိန့်မေရီဘုရားကျောင်းသို့ ရောက်ရှိခဲ့ကြောင်း၊ ရန်ကုန် ကက်သလစ် ဂိုဏ်းချုပ် ကာဒီနယ် ချားလ်စ်ဘိုက မင်းအောင်လှိုင်နှင့်တွေ့ဆုံစဉ် မြန်မာပြည်၌ ဖြစ်ပေါ်နေသည့် ပဋိပက္ခများနှင့် ပတ်သက်ပြီး ပြောကြားခဲ့ခြင်းဖြစ်သည်။

” ခရစ်စမတ် အခါတော်ရက်မြတ်တွင် စုဝေး၍ မိတ်သ ဟာယပြုနေကြသော ကျွန်ုပ်တို့အားလုံးသည် မိမိတို့နှင့်ဆိုင်ရာ နယ်ပယ်အသီးသီးမှနေ၍ မြန်မာပြည်ကြီး အမြန်ဆုံးငြိမ်းချမ်းမှု၊ စည်းလုံးတိုက်တက်မှုများ ရရှိစေရေးအတွက် တစ်ဦးနှင့်တစ်ဦး နားလည်ခွင့်လွှတ်မှု၊ အပြန်အလှန်လေးစားမှု၊ အနာဂတ်လူငယ်မျိုးဆက်သစ်များအတွက် အခွင့်အရေးဖန်တီးပေးမှုများ၊ စစ်မှန်ရိုးသားသော တွေ့ဆုံဆွေးနွေးမှုများဖြင့် ရင်ကြားစေ့ရေး လုပ်ငန်းများကို စိတ်သစ်လူသစ်များဖြင့် ပြန်လည်ဆောင်ရွက်ကြရန် အထူးအားပေးပါသည်။ မေတ္တာရပ်ခံ ဖိတ်ခေါ်အပ်ပါသည်” ဟု ရန်ကုန် ကက်သလစ် ဂိုဏ်းချုပ် ကာဒီနယ် ချားလ်စ်ဘိုက မင်းအောင်လှိုင်နှင့်တွေ့ဆုံစဉ် ထည့်သွင်းပြောကြားခဲ့သည်။

မင်းအောင်လှိုင်နှင့်အဖွဲ့သည် ရန်ကုန် ကက်သလစ် ဂိုဏ်းချုပ် ကာဒီနယ် ချားလ်စ်ဘိုနှင့် တွေ့ဆုံမှုအပြီး ညပိုင်းတွင် လေးလေ့ကော်ကို လေကြောင်းအသုံးပြီး ဗုံးကျဲ ပစ်ခတ် တိုက်ခိုက်ခြင်းများ ပြုလုပ်လိုက်သည်။

Red News Agency

တိုက်ပွဲပြင်းထန်သည့် နတ်ချောင်းကျေးရွာအနီးကို စစ်ကောင်စီတပ်က လေကြောင်းသုံးပစ်ခတ်ခဲ့ပြီး ရွာကိုမီးရှို့

RNA_ဒီဇင်ဘာ ၂၃ ရက်၊ ၂၀၂၁ ခုနှစ်။

စစ်ကိုင်းတိုင်း၊ ကလေးမြို့တောင်ဘက် (၁၀) ဝန်းကျင်က နတ်ချောင်းကျေးရွာအနီးတွင် စစ်ကောင်စီတပ်နှင့် ဒေသခံပြည်သူ့ကာကွယ်ရေးတပ်ဖွဲ့များ တိုက်ပွဲပြင်းထန်ခဲ့ရာ စစ်ကောင်စီတပ်က အထိနာပြီး လေကြောင်းအသုံးတိုက်ခိုက်ခဲ့ပြီး နတ်ချောင်းကျေးရွာနေအိမ်တချို့ကို စစ်ကောင်စီတပ်က ယနေ့ညနေပိုင်းတွင် မီးရှို့ခဲ့ကြောင်း သိရသည်။

Photo: CJ

Red News Agency

RNA_ဒီဇင်ဘာ ၂၃ ရက်၊ ၂၀၂၁ ခုနှစ်။

ကချင်ပြည်နယ်၊ ဖားကန့်မြို့နယ်၊ လုံးခင်းအုပ်စု၊ မှော်စီစာကျေးရွာ အောင်သာယာ (၂) အနီး စိန်စိန်လုပ်ကွက် ( ဒေသအခေါ်) မြေစာပုံပြိုကျမှု ပျောက်ဆုံးနေသူ များသော်လည်း ယနေ့ နံနက်အထိ အလောင်း (၂) လောင်းသာ ဆယ်ယူနိုင်သေးကြောင်း ဒေသခံ သတင်းရင်းမြစ်က ပြောသည်။

” ပျောက်ဆုံးတာကတော့ များတယ် (၅၀) ကျော်ရှိတယ်လို့ ခန့်မှန်းပေါ့၊ အလောင်းက မနေ့က တလောင်း အခုမနက်တလောင်း ဒါပဲရှာတွေ့သေးတယ်၊ မနေ့ကတွေ့တဲ့အလောင်းက ကိုမျိုး ခွန်ဆာကုန်းကပေါ့” ဟု RNA သတင်းရင်းမြစ်က ပြောသည်။

စိန်စိန်လုပ်ကွက်အနီးက မြေစာပုံသည့် ရေကန်သည် အမြင့် ပေ ၂၀၀၊ အလျား ပေ ၂၀၀၀ ၊ အနံ ပေ ၃၀၀ ဝန်းကျင်ရှိပြီး ဒီဇင်ဘာလ ၂၂ ရက် နံနက် ၃ နာရီ ၃၀ မိနစ်ဝန်းကျင်က ပြိုကျခဲ့ခြင်းဖြစ်ကာ ရေမဆေးကျောက်ရှာဖွေသူ (၅၀) ကျော်ပျောက်ဆုံးနေပြီး အလောင်းများ မြေကြီးအောက်ပိနေပြီး ပုပ်မှသာပေါ်လာနိုင်သည့်အခြေအနေဖြစ်ကြောင်း သိရသည်။

ဖားကန့်မြို့နယ်တွင် ရေမဆေးကျောက်ရှာဖွေသူများ နှစ်စဉ်မြေစာပုံပြိုကျမှုကြောင့် သေဆုံးမှုများရှိနေပြီး၊ ၂၀၂၀ ခုနှစ် ဇူလိုင်လ ၂ ရက် နံနက် ၆ နာရီ ၃၀ မိနစ်ဝန်းကျင်က ဖားကန့်မြို့နယ်၊ ဆိပ်မူကျေးရွာအုပ်စု၊ ဝှေခါကျေးရွာ ရပ်ကွက်(၆)၊ လခူးချောင်ရှိ ကျောက်မျက်ရွှေပြည်ကုမ္ပဏီ(ဒေသအခေါ် တစ်သုံးလုံး ကုမ္ပဏီ)၌ ကျင်းကမ်းပါး မြေပြိုမှုဖြစ်ပွားခဲ့ပြီး ရေမဆေးကျောက် ရှာဖွေသူ ၁၆၉ ဦးသေဆုံးခဲ့ပြီး ၄၃ ဦးဒဏ်ရာရရှိခဲ့ကြသည်။

Red News Agency

RNA_ဒီဇင်ဘာ ၂၂ ရက်၊ ၂၀၂၁ ခုနှစ်။

ကချင်ပြည်နယ်၊ ဖားကန့်မြို့နယ်၊ လုံးခင်းအုပ်စု၊ မှော်စီစာကျေးရွာ အောင်သာယာ (၂) အနီး စိန်စိန်လုပ်ကွက် ( ဒေသအခေါ်) တွင် ယနေ့ နံနက် ၃ နာရီ မိနစ် ၃၀ ဝန်းကျင်းက ရေကန်အတွင်း မြေစာပုံပြိုကျကာ ရေမဆေးကျော်ရှာဖွေသူ (၅၀) ကျော် ပျောက်ဆုံးနေကြောင်း သိရသည်။

” အခု ၉ နာရီ မထိုးခင်လေးမှ ရှာဖွေမှုလုပ်ကြမှာ ‌အစောပိုင်းက လှေလေးနဲ့ ရှာနေရတာ တလောင်းမှမတွေ့သေးဘူး အခုတော့ ရေငုပ်ရှာကျမှာ ရေကန်ကကျယ်တယ်၊ ‌ပျောက်နေတဲ့သူတွေ သေဖို့များတယ်၊ ဈေးဆိုင် ၂ ဆိုင်က အမျိုးသမီး ၂ ဦးလဲ ပါသွားတယ်ကြားတယ်၊ ဘေးအနားက လူတွေပြောပုံက ၅၀ ဝန်းကျင်လောက်ပါသွားတယ်ပြောကြတယ်၊ တိတိကျကျကတော့ ပြောဖို့ခက်တယ်” ဟု မြေစာပုံပြိုကျမှုအနီးရောက်ရှိနေသူ တဦးက ပြောသည်။

စိန်စိန်လုပ်ကွက်အနီးက မြေစာပုံပြိုကျသည့် ရေကန်သည် အမြင့် ပေ ၂၀၀၊ အလျား ပေ ၂၀၀၀ ၊ အနံ ပေ ၃၀၀ ဝန်းကျင်ရှိပြီး ကန်ထိပ်က မြေစာပုံ ပြိုကျခြင်းဖြစ်ကြောင်း၊ ကုမ္ပဏီများအားလုံး စက်ယန္တရားများဖြင့် ညနေ ၆ နာရီမှ နံနက် ၄ နာရီအထိ တရားမဝင် ရတနာ တူးဖော်နေကြခြင်းဖြစ်ကြောင်း၊ ရတနာကုမ္ပဏီအားလုံး ဒေသအာဏာပိုင်နှင့်ပေါင်းပြီး တရားမလုပ်လုပ်ဆောင်နေကြောင်း၊ ၂၀၂၀ ခုနှစ် ဩဂုတ်လမှစပြီး လုပ်ငန်းလိုင်စင်အားလုံး ရပ်ထားကြောင်း၊ လိုင်စင်များ ပြန်ချကာနီး အာဏာသိမ်းခံရပြီး ယနေ့အထိ စစ်ကောင်စီက တရားဝင်ချထားမှု မရှိကြောင်း သိရသည်။

ရေမဆေးကျောက်ရှာဖွေသူများသည် ယခုအချိန် စက်ယန္တရားများဖြင့် ညပိုင်းခိုးလုပ်နေမှုသာရှိသည့်အတွက် အများစုမှာ ညပိုင်းသာရှာကြကြောင်း၊ ဒီဇင်ဘာလ ၁၉ ရက်နေ့က ဆိပ်မူအုပ်စု၊ ဆိုက်းဂျာဘွမ် ကျေးရွာအနီး မြေစာပုံပြိုကျမှုတွင် ကုမ္ပဏီဝန်ထမ်း ၂ ဦးနှင့် ရေမဆေးကျောက်ရှာဖွေသူ ၃ ဦး သေဆုံးခဲ့သည်။

၂၀၂၀ ခုနှစ် ဇူလိုင်လ ၂ ရက် နံနက် ၆ နာရီ ၃၀ မိနစ်ဝန်းကျင်က ဖားကန့်မြို့နယ်၊ ဆိပ်မူကျေးရွာအုပ်စု၊ ဝှေခါကျေးရွာ ရပ်ကွက်(၆)၊ လခူးချောင်ရှိ ကျောက်မျက်ရွှေပြည်ကုမ္ပဏီ(ဒေသအခေါ် တစ်သုံးလုံး ကုမ္ပဏီ)၌ ကျင်းကမ်းပါး မြေပြိုမှုဖြစ်ပွားခဲ့ပြီး ရေမဆေးကျောက် ရှာဖွေသူ ၁၆၉ ဦးသေဆုံးခဲ့ပြီး ၄၃ ဦးဒဏ်ရာရရှိခဲ့ကြသည်။

Red News Agency