RNA_စက်တင်ဘာ၂၀၊၂၀၂၂ခုနှစ်။
ကယားပြည်နယ်၊ ဒီးမော့ဆိုမြို့နယ်၊ ဆောင်ဒူရွာသစ်ကျေးရွာ ရှေ့တန်းသို့ ဆေးကုရန် ဦးလေးဖြစ်သူနှင့် သွားပြီး ပြန်လာနေစဉ် ပြည်သူ့ကာကွယ်ရေးတပ်-ဒီးမော့ဆို (DMO-Local PDF) တပ်ရင်း(K)မှ ဆေးမှူးတာဝန်ထမ်းဆောင်ခဲ့သော ရဲမေ မဇယ်ရာမီးနာ (အသက်(၁၈)နှစ်သည်) စက်တင်ဘာလ(၁၈)နေ့ ညနေ(၄)နာရီအချိန်တွင် အကြမ်းဖက်စစ်ကောင်စီတပ်မှ ကျေးရွာအတွင်း ထောင်ထားသောမိုင်း နင်းမိ၍ ကျဆုံးခဲ့ရကြောင်း သိရသည်။
ရဲမေ မဇယ်ရာမီးနာသည် စစ်ကောင်စီတပ် ကျေးရွာအတွင်းထောင်ထားသည့် မိုင်းနင်းမိပြီး ကျဆုံးခဲ့ရပြီး အတူသွားလာခဲ့သည့် ဦးလေးဖြစ်သူ ဦးပေါလူခွန်း အသက်(၅၀)နှစ်သည် ဘယ်လက်နှင့် ဘယ်ခြေထောက် ပြင်းထန်ဒဏ်ရာ ရရှိခဲ့သည်ဟု DMO-Local PDF က ယနေ့ထုတ်ပြန်ထားသည်။
တာဝန်ထမ်းဆောင်ရင်း ကျဆုံးသွားခဲ့ရသော ရဲမေ မဇယ်ရာမီးနာ၏ စျာပနအခမ်းအနားကိုစက်တင်ဘာ (၁၈)ရက်နေ့မှ(၂၀) ရက်ထိ ကျင်းပပြုလုပ်ခဲ့ပြီး ယနေ့ (၂၀)ရက်နေ့ နံနက်(၇)နာရီအချိန်တွင် ကက်သလစ်ခရစ်ယာန်ထုံးတမ်းအစဉ်အလာနှင့်အညီ ဂူသွင်းသဂြိုလ်ပေးခဲ့ကြောင်း၊ တာဝန်ထမ်းဆောင်ရင်း ကျဆုံးသွားခဲ့ရသော ရဲမေ မဇယ်ရာမီးနာသည် မိမိတို့ ပြည်သူ့ကာကွယ်ရေးတပ်-ဒီးမော့ဆို(DMO-Local PDF)မှ ဖက်ဒရယ်သူရဲကောင်းအဖြစ်မှတ်တမ်းတင် ဂုဏ်ပြုသွားမည်ဖြစ်ပြီး ကျန်ရစ်သောမိသားစုနှင့်အတူ ထပ်တူဝမ်းနည်းကြေကွဲရပါကြောင်း ထုတ်ပြန်ချက်တွင် ပါရှိသည်။
Red News Agency