Category: သတင်း

RNA- ဩဂုတ် ၂ ရက်။

ယောနယ်အတွင်း အာဏာသိမ်း စစ်အုပ်စုနှင့် အပေါင်းအပါများကို လက်နက်ကိုင်တိုက်နေသည့် လူငယ်များအကြား ၂၀၂၀ ခုနှစ် ရွေးကောက်ပွဲတွင် ယောနယ်က အနိုင်ရရှိသည့် NLD လွှတ်တော်ကိုယ်စားလှယ်တချို့က သွေးခွဲစည်းရုံးမှု ပြုလုပ်နေသည်ဟု ယောနယ်ပြည်သူ့ကာကွယ်ရေးတပ်ဖွဲ့ (Yaw Defense Force – YDF )က
ယနေ့ ( ဩဂုတ်လ ၂ ရက်) တွင် ထုတ်ပြန်ထားသည်။

” ယောဒေသ နှင့် မြန်မာပြည်ဒေသတချို့တွင် မိမိလူမျိုး မိမိဒေသအမည်ဖြင့် ဖွဲ့စည်းတည်ထောင်ခဲ့သော Yaw Defense Force – YDF အမည်ကို ပယ်ဖျက်ခြင်း သို့မဟုတ် စိတ်ဝမ်းခွဲကာ NUG တရားဝင် ဖွဲ့စည်းထားသော PDF အမည်သုံးမှသာ တရားဝင်ငွေကြေး၊ လက်နက်ထောက်ပံ့ တပ်ဆင်ပေးမည်ဆိုသည့် မဟုတ်မမှန်သည့်လုပ်ရပ်ကို ၂၀၂၀ ခုနှစ် ရွေးကောက်ခံ ယောဒေသ လွှတ်တော်ကိုယ်စားလှယ်တချို့မှ ၎င်းတို့ အာဏာတည်မြဲရေးအတွက် ယောလူငယ်တချို့ကို မက်လုံးပေး သွေးခွဲစည်းရုံးလှုံ့ဆော်မှုများ ပြုလုပ်နေသည်ကို စိတ်မကောင်းစွာ မြင်တွေ့ သိရှိနေရသဖြင့် ထိုသို့ လုပ်ဆောင်နေသော ပါတီ၊ လူအုပ်စု နှင့် လူပုဂ္ဂိုလ်များကို ပြင်းထန်စွာ ဆန့်ကျင်ကန့်ကွက်သွားမည်ဖြစ်ကြောင်း အသိပေးအပ်ပါသည်” ဟု YDF ထုတ်ပြန်ချက်တွင် ဖော်ပြထားသည်။

Yaw Defense Force – YDF ကို ၂၀၂၁ ခုနှစ် မေလ (၁၂) ရက်နေ့တွင် National Unity Government (NUG) နှင့် သက်ဆိုင်ရာ အဖွဲ့အစည်း ဦးဆောင်မှုကို ပံ့ပိုးကူညီရန် စုစည်းတည်ထောင်ခဲ့ကြောင်း၊ YDF သည် PDF ( Tamu/TSG ) နှင့်လည်း ပူးပေါင်း လုပ်ဆောင်မှုများရှိကြောင်း၊ ယခုအခြေအနေတွင် PDF ( Tamu/TSG ) က YDF နှင့်အတူ ရပ်တည်မည်ဖြစ်ကြောင်း ကြေညာထားသည်။

YDF သည် စစ်အာဏာရှင်အမြစ်ပြတ်ချေမှုန်းရေးအတွက်သာ ဦးတည်ဆောင်ရွက်မည်ဖြစ်ကြောင်း၊  နိုင်ငံရေးအာဏာနေရာရရေး နှင့် မည်သည့်နိုင်ငံရေးပါတီအတွက် တိုက်ပွဲဝင်နေခြင်း မဟုတ်ဘဲ NUG ၏ တိုက်ပွဲခေါ်သံနဲ့အတူ ပြည်သူ့တော်လှန်ရေးပြီးဆုံးသည်အထိ တိုက်ပွဲဝင်သွားရန်သာဖြစ်ပြီး စစ်မှန်သောပြည်သူ့အစိုးရပေါ်ပေါက်ရေးအတွက် ဖွဲစည်းထားသောလက်နက်ကိုင်အဖွဲ့အစည်းဖြစ်ကြောင်း ထုတ်ပြန်ချက်တွင် ဖော်ပြထားသည်။

RedNewsAgency

ပုလဲ၊ ဇူလိုင် ၂၉ ရက်။

စစ်ကိုင်းတိုင်း၊ ပုလဲမြို့နယ်အတွင်း အာဏာသိမ်း စစ်ကောင်စီလက်အောက်က အုပ်ချုပ်ရေးမှူးများ မနှုတ်ထွက်ပါက ပြည်သူ့သစ္စာဖောက်သတ်မှတ်ကာ တိုက်ခိုက်ချေမှုန်းသွားမည်ဟု ပုလဲမြိုနယ် ပြည်သူ့ကာကွယ်ရေးတပ်ဖွဲ့ ( Pale People’s Defense Force – PPDF) က ယနေ့ညပိုင်းတွင် ထုတ်ပြန်ထားသည်။

” ပုလဲမြို့နယ် အတွင်း အကြမ်းဖက်အုပ်စု၏ အုပ်ချုပ် ရေးယန္တယားအား ထောက်တိုင်လုပ်ပေးနေကြသော အုပ်ချုပ်ရေးမှူးခေါ်ဦးနှောက်မဲ့သတ္တဝါများအနေဖြင့် 1.8.2021 တနင်္ဂနွေနေ့မှ စ၍ ပြည်သူ့အပေါ် အနိုင်ကျင့် ယုတ်မာရက်စက်နေ့သည့် အကြမ်းဖက်အုပ်စု၏ ယန္တယားမှ အားလုံးနုတ်ထွက်ပေးကြပါရန် ကျွန်ုပ်တို့ PDF အနေဖြင့် ပြင်းပြင်းထန်ထန် သတိပေးတားမြစ်လိုက်သည်။ လိုက်နာခြင်း မရှိပါက မည်သည့်အကြောင်းပြချက်နှင့်မျှ သက်ညှာမည် မဟုတ်ဘဲ ပြည်သူ့သစ္စာဖောက် အဖြစ် သတ်မှတ်၍ တိုက်ခိုက်ချေမှုန်းသွားတော့မည်ဖြစ်ကြောင်း အသိပေး ထုတ်ပြန်ကြေငြာလိုက်သည်။” ထုတ်ပြန်ချက်တွင် ဖော်ပြထားသည်။

ယင်းမာပင်ခရိုင်၊ ပုလဲမြို့နယ်တွင် ဒေသခံ ပြည်သူ့ကာကွယ်ရေး အဖွဲ့နှင့် အာဏာသိမ်း စစ်ကောင်စီလက်နက်ကိုင်များ မကြာခန ပစ်ခတ်မှုဖြစ်ပွားကြောင်း၊ စစ်ကောင်စီ လက်အောက်ခံ အုပ်ချုပ်ရေးမှူးများက နယ်မြေအတွင်း သတင်းပေးမှုများကြောင့် PDF အချို့ အဖမ်းခံရမှုများရှိကြောင်း သိရသည်။

စစ်ကိုင်းတိုင်းအတွင်း စစ်ကောင်စီလက်အောက်ခံ အုပ်ချုပ်ရေးမှူးအပါအဝင် ပျူစောထီးနှင့် စစ်ကောင်စီလက်နက်ကိုင်တို့၏ ပူးပေါင်းတိုက်ခိုက်မှုကြောင့် ဇူလိုင်လ ၂၈ ရက်နေ့က မင်းကင်းမြို့နယ်၊ တောင်ဖြူ ကျေးရွာအနီးတွင် ဒေသခံ PDF ၃ ဦးကျဆုံးပြီး၊ တူမီး ၅၀ လက်နှင့်အတူ ၅၃ ဦးဖမ်းဆီးခံခဲ့ရကြောင်း၊ ဇူလိုင်လ ၂၆ ရက်နေ့က ကနီမြို့နယ် မုံရွာ- ယာကြီး ကားလမ်းတောင်ဘက် ဇီးဖြူကွင်း ကျေးရွာအနောက်ဘက်တွင် ပျူစောထီး၊ ကျေးရွာအုပ်ချုပ်ရေးမှူးနှင့် စစ်ကောင်စီလက်နက်ကိုင်တို့၏ ပစ်ခတ် သတ်ဖြတ်မှုကြောင့် ဒေသခံ PDF ၉ ဦးကျဆုံးခဲ့ကြောင်း သိရသည်။

#RedNewsAgency

RNA – ဇူလိုင် ၁၈ ရက်။

ကိုဗစ်-၁၉ ကမ္ဘာ့ကပ်ရောဂါ ကိုဗစ် -၁၉ ရောက်ဂါခံစားနေရသည့် မြန်မာပြည်သူအားလုံးအတွက် ကိုဗစ်ကာကွယ် ဆေးရရှိရန် အမျိုးသား ညီညွတ်ရေးအစိုးရ ( NUG) က ကြိုးပမ်းနေကြောင်း ယနေ့တွင် ထုတ်ပြန်ထားသည်။

” ပြည်သူလူထုက တရားဝင်အပ်နှင်းထားသည့် အမျိုးသားညီညွတ်ရေး အစိုးရအနေဖြင့် ပြည်သူလူထု ၏ အကျိုးစီးပွားကိုသာ အစဉ်အမြဲ ရှေးရှု လျက်ရှိပါသည်။ မိမိတို့အစိုးရသည် အမျိုးသားအဆင့် ကိုဗစ် ၁၉ ကာကွယ်၊ ထိန်းချုပ်၊ ကုသရေး ကော်မရှင်နှင့် လက်တွဲလုပ်ဆောင်ပြီး ပြည်သူများကို အဓိကဦးစားပေး နည်းနာများ ဖော်ပြ၍ ပြည်သူအားလုံး ကိုဗစ် ၁၉ ကာကွယ်ဆေး အမြန်ရရှိနိုင်ရန် ကြိုးပမ်းဆောင်ရွက်လျက်ရှိပါသည်” ဟု ထုတ်ပြန်ချက်တွင် ဖော်ပြထားသည်။

ယခုလို ခက်ခဲကြမ်းတမ်းသော ကာလအတွင် ဒုက္ခရောက်နေကြသည့် မိမိတို့ မြန်မာပြည်သူများကို နိုင်ငံတကာ မိသားစုများမှ တက်နိုင်သမျှကူညီပေးပါရန် မိမိတို့အစိုးရအနေဖြင့် မေတ္တာရပ်ခံကြောင်း၊ မြန်မာပြည်အား ချန်မထားပဲ မိမိတို့နှင့်အတူ ပူးပေါင်း ကူညီဆောင်ရွက်ပေးပါရန် ကုလသမဂ္ဂအထွေထွေအတွင်းရေးမှူးချုပ်နှင့် နိုင်ငံတကာ အသိုင်းအဝိုင်းများ၊ နိုင်ငံတကာ အဖွဲ့အစည်းများ၊ အမျိုးသား အစိုးရများ၊ စေတနာ သဒ္ဓါတရားထက်သန်သော လူပုဂ္ဂိုလ်များကို NUG က တိုက်တွန်းထားသည်။

RNA- ဇူလိုင် ၁၈ ရက်။

စစ်ကိုင်းတိုင်း၊ ယင်းမာပင်ခရိုင်၊ ကနီမြို့နယ်တွင် စစ်ကောင်စီလက်နက်ကိုင်များက အရပ်သားပြည်သူ (၁၆) ကို အစုလိုက်ဖမ်းဆီးပြီး ရက်ရက်စက်စက် အသတ်ခံရကြောင်း ယနေ့ ( ဇူလိုင်လ ၁၈ ရက်) တွင် ကနီမြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်ထားသည်။

ကနီမြို့နယ် ပြည်သူ့ကာကွယ်ရေးတပ်ဖွဲ့က လိုက်လံရှာဖွေရာ ဖမ်းဆီးခံရသူများထဲက အသတ်ခံရသူများ၏ Dead Body (၁၆) ခုရှာဖွေတွေ့ရှိကြောင်း၊ ဖမ်းဆီးခံရပြီး Dead Body မတွေ့ရှိမှုများလည်း ရှိသေးနိုင်ကြောင်း၊ အသတ်ခံရသူများတွင် ခန္ဓာကိုယ်၊ မျက်နှာ၊ လည်ပင်း၊ ဝမ်းဗိုက်၊ ဦးခေါင်းတို့ကို ဓားဖြင့်မွှန်းထားကြောင်း၊ လက်‌ပြန်ကြိုးတုပ်ခြင်းနှင့် တချို့မှာ လက်နှင့်ချေထောက်များကို ဖြတ်ထားခြင်း၊ ဦးခေါင်းနှင့် နဖူးတွင် သေနတ်ဒဏ်ရာ စသည်တို့ဖြင့် ရက်ရက်စက်စက် အသတ်ခံထားရကြောင်း ထုတ်ပြန်ချက်တွင်ပါရှိသည်။

စစ်ကောင်စီလက်နက်ကိုင်များ ချင်းတွင်းမြစ် အရှေ့ဘက် ကျေးရွာများကို ဇူလိုင်လ ၉ ရက်နေ့က ဝင်ရောက်လာသည့်အတွက် ယင်းရွာ၊ ကုန်သာရွာနှင့်အခြားကျေးရွာနေပြည်သူများ ထွက်ပြေးတိမ်းရှောင်စဉ်၊ ဇူလိုင်လ ၉ ရက်နေ့က အရပ်သားပြည်သူ (၁၁) ဦး၊ ဇူလိုင်လ ၁၀ ရက်နေ့က အရပ်သားပြည်သူ (၁၅) ဦးကို လူသားဒိုင်းပြုလုပ်ကာ ဖမ်းဆီးသွားကြောင်း၊ အဖမ်းခံရသူများထဲမှ အမျိုးသမီး‌ ၄ ဦးသာပြန်လွှတ်ပေးခဲ့သည်။

Red News Agency

ပုလဲ၊ ဇူလိုင် – ၁၇ ရက်။

စစ်ကိုင်းတိုင်း၊ ပုလဲမြို့နယ်အတွင်းရှိ လမ်းမကြီးများပေါ်တွင် ဇူလိုင်လ ၁၈ ရက်မှ စတင်ကာ ည ၈ နာရီနောက်ပိုင်း ယာဉ်များ ဖြတ်သန်းမောင်းနှင်ခြင်း မပြုကြရန် ပုလဲမြို့နယ် PDF မှ ဇူလိုင်လ ၁၆ ရက်က ကြေညာချက် ထုတ်ပြန်လိုက်သည်။

အကြမ်းဖက် စစ်ကောင်စီတပ်များက အရပ်ကားများကို အသုံးပြုကာ သွားလာလှုပ်ရှားနေသဖြင့် ၎င်းတို့အား ဖြေရှင်းချိန်တွင် မှားယွင်းပစ်ခတ် မိစေနိုင်ခြင်းကြောင့် အသိပေးထုတ်ပြန်ရခြင်းဖြစ်သည်။

အကြမ်းဖက် စစ်ကောင်စီတပ်များက အရပ် သားများ အသွင်ယူကာ လှုပ်ရှားသွားလာ နေသဖြင့် တွေ့ရှိပါက တိုက်ခိုက်ချေမှုန်း နိုင်ရန်အတွက် ပြည်သူလူထုမှ နီးစပ်ရာ PDF တပ်ဖွဲ့ဝင်များထံသို့ အချိန်မှီ သတင်းပေးပို့ရန်လည်း ထုတ်ပြန်ကြေငြာထားသည်။

Red News Agency