Category: သတင်း

RNA_ဒီဇင်ဘာ ၈ ရက်၊ ၂၀၂၁ ခုနှစ်။

စစ်ကိုင်းတိုင်းအတွင်း ဖြတ်သန်းသွားလာမည့် ကုမ္ပဏီပိုင် အကြီးစား လုပ်ငန်းများ အမျိုးသားညီညွတ်ရေးအစိုးရ – NUG ကို ဝင်ငွေခွန်ဆောင်ကြရမည်ဖြစ်ပြီး ၂၀၂၂ ခုနှစ် ဇန်နဝါရီလ ၁၅ ရက်နေ့ကျော်လွန်ပါက အရေးယူမည်ဖြစ်ကြောင်း စစ်ကိုင်းတိုင်းပြည်သူ့ကာကွယ်ရေး တပ်ဖွဲ့က ယနေ့ ကြေညာထားသည
ပြည်သူ့ကာကွယ်ရေးတပ်ဖွဲ့များက ဖြတ်သန်းသွာလာသည့်အချိန် စစ်ဆေးရာတွင် ကုမ္ပဏီပိုင် အကြီးစား လုပ်ငန်းများ NUG ကို အခွန်ဆောင်ထားသည့် Digital Slip ဖြတ်ပိုင်းများ ပြသရမည်ဖြစ်ကြောင်း၊ သတ်မှတ်ကာလကျော်လွန်ပါက Digital Slip မပြနိုင်သည့် ကုမ္ပဏီပိုင် အကြီးစား လုပ်ငန်းများကို မြို့နယ် ပ-အ-ဖ များနှင့်ချိတ်ဆက်ပြီး ထိရောက်စွာ အရေးယူသွားမည် ထုတ်ပြန်ချက်မှာ ဖော်ပြထားသည်။
စစ်ကိုင်းတိုင်း ပြည်သူ့ကာကွယ်ရေး တပ်ဖွဲ့များက အာဏာသိမ်းစစ်တပ်နှင့် ပတ်သက်သမျှ ထုတ်ကုန်များ မသုံးစွဲရေး တားမြစ်ထားပြီး တွေ့ရှိပါက ထိရောက်စွာ အရေးယူဆောင်ရွက်မှုများ ပြုလုပ်နေကြောင်း သိရသည်။

Red News Agency

ကနီ၊ ဒီဇင်ဘာ ၇ ရက်၊ ၂၀၂၁ ခုနှစ်။

စစ်ကိုင်းတိုင်း၊ ကနီမြို့နယ်တွင် စစ်ဘေးရှောင်ပြည်သူ ၁၅၀၀ ခန့် စားနပ်ရိက္ခာ ခက်ခဲနေကြောင်း ဒေသခံပရဟိတအဖွဲ့ထံမှ ယနေ့ သိရသည်။

“လက်နက်ကြီးတွေနဲ့ ပစ်ခတ်နေလို့ မုတ်ထောမှာ နှစ်လုံးကျတယ်၊ မကွဲဘူး၊ ငဖျက်မှာ ၄ လုံးကျတယ်၊ ၂ လုံးကွဲတယ်၊ ထိခိုက်ဒဏ်ရာရသူတော့ မရှိဘူး၊ စစ်ဘေးရှောင်တွေအတွက် စားစရာ ခက်ခဲနေတယ်” ဟု ကနီမြို့နယ် ပရဟိတအဖွဲ့ဝင် တစ်ဦးကပြောသည်။

ချင်းတွင်းမြစ် အရှေ့ဘက်ကမ်းရှိ နတ်ကြီးတွင် စစ်ကောင်စီတပ်များမှ တပ်စခန်းချထားပြီး အနောက်ဘက်ကမ်းရှိ တဇယ်ချောင်၊ ညောင်ပင်ဝန်း၊ ပန်းဆိုင်း၊ ငဖျက်၊ မုတ်ထော၊ အိုင်တောင်၊ ချိုင်၊ သရက်ပင်၊ မအူ စသည့်ကျေးရွာများကို လက်နက်ကြီးများဖြင့် ပစ်ခတ်နေသဖြင့် ဒေသခံပြည်သူများ ဘေးလွတ်ရာဒေသများသို့ ထွက်ပြေး တိမ်းရှောင်နေရသည်။

စစ်ကိုင်းတိုင်းအတွင်း စစ်ကောင်စီတပ်က ထိုးစစ်ဆင်နေသည့်အတွက် ကနီ၊ ယင်းမာပင်၊ ဒီပဲယင်းစသည့် ကျေးရွာက ဒေသခံပြည်သူများ ထွက်ပြေးတိမ်းရှောင်နေရသူ အများအပြားရှိကြောင်း သိရသည်။

Photo: TGDN

RNA_ဒီဇင်ဘာ ၁၁ ရက်၊ ၂၀၂၁ ခုနှစ်။

ရန်ကုန်မြို့ အင်းစိန်အကျဉ်းထောင်တွင်း ဆန္ဒပြသူများ ဒီဇင်ဘာလ ၁၀ ရက်နေ့ညက အရိုက်ခံခဲ့ရပြီး ယနေ့ နေ့‌လည်ပိုင်းအထိ ဆေးကုသခွင့် မရကြောင်း သိရသည်။

” မနေ့က အစာငတ်ခံ ဆန္ဒပြတယ်၊ ပြီးတော့ သွေးသစ္စာသီးချင်းတွေ ဆိုကြတယ် ညကြတော့ အဲဒီ သီးသန့်ထောင်က ၅၀၅ တွေကို ထောင်မကြီးထဲပြောင်းတယ်၊ ထောင်ပိုင်က ရိုက်ဖို့အမိန့်ပေးတာ၊ ဒီနေ့ ထပ်ကြားရတာက ညကအရိုက်ခံရသူတွေကို ဆေးမကုရဘူးလို့ ထောင်ပိုင်က အမိန့်ထုတ်ထားတယ်” ဟု အင်းစိန်ထောင်နှင့် နီးစပ်သည့် ရှေ့နေတချို့ထံက သိရသည်။

ဒီဇင်ဘာလ ၁၀ ရက်နေ့က အင်းစိန်အကျဉ်းထောင် သီးသန့်ထောင်မှာထားသည့် မတရားဖမ်းဆီးခံထားရသူများက အစာငတ်ခံဆန္ဒပြ သွေးသစ္စာသီချင်း သီဆိုခဲ့မှုကြောင့် ထောင်မကြီးထဲကို အမျိုးသား အမျိုးသမီး (၈၉)ဦးကို ပြောင်း‌ရွေ့ပြီး ထောင်ပိုင်က ရိုက်နှက်ရန် အမိန့်ပေး စေခိုင်းခဲ့ကြောင်း သိရသည်။

အင်းစိန် ထောင်ပိုင် ဇော်လင်းအောင်သည် စစ်တပ်က အသွင်ပြောင်းဖြစ်ပြီး နိုင်ငံရေးသမား၊ နွေဦးတော်လှန် ရေးအတွင်း ဖမ်းဆီးထားသူများကို ရည်ရွယ်ချက်ရှိရှိ လူ့အခွင့်အရေး ချိုးဖောက်မှုများလုပ်ကြောင်း၊ နိုင်ငံတော် တရားသူကြီးချုပ်၊ ၂၀၀၈ ဖွဲ့စည်းပုံကို ဦးဆောင်ရေးဆွဲခဲ့သည့် ဦးအောင်တိုး မြေးမ ယောက်ျားဟု သတင်းထွက်နေပြီး၊ အင်းစိန်ထောင်ကို နွေဦးတော်လှန်ရေး ကာလအတွင်း ပြောင်းလာပြီး မတရားဖမ်းဆီးခံရသူများ၏ ဆန္ဒပြမှု (၂) ကြိမ်ကြုံတွေ့ခဲ့ရာ ယခုတခါ ဆန္ဒပြပါဝင်သူများကို ရိုက်နှက်ဖို့ အမိန့်ပေးခဲ့ကြောင်း၊ အာဏာသိမ်းစစ်တပ်ထိပ်ပိုင်းနှင့် အဆက်အသွယ်ရှိသည့်အတွက် မည်သူ့ကိုမှဂရုမစိုက်အာဏာမက်သူဖြစ်ပြီး အာဏာရှင်ဆန်ဆန်ပြုမူဆောင်ရွက်ကြောင်း သိရသည်။

Red News Agency