Tag: KNLA

RNA_ဒီဇင်ဘာ ၂၇ ရက်၊ ၂၀၂၁ ခုနှစ်။

စစ်ကောင်စီတပ်သားများ စခန်းအနီး တက်လာစဉ် ရဲဘော်‌များကို ဆုတ်ခိုင်းပြီး ကတုတ်ကျင်းထဲကနေ ခံပစ်နေရာမှ ကျဆုံးခဲ့ရသည့် PDF သူရဲကောင်း ကိုဝေလင်း အလောင်း ယနေ့ တွေ့ရှိပြီ ဖြစ်ကြောင်း သိရသည်။

ဧရာဝတီတိုင်းက PDF သူရဲကောင်း ကိုဝေလင်းသည် ဒီဇင်ဘာလ ၂၅ ရက်နေ့က ကရဂ်ပြည်နယ်၊ မြမတီမြို့နယ်၊ ထီးမယ်ဝါးခီးကျေးရွာအနီး တိုက်ပွဲမှာ ကျဆုံးခဲ့ရခြင်း ဖြစ်ပြီး၊ ယင်းနေ့ တိုက်ပွဲအတွင်း သတင်းစာဆရာ တဦးအပါအဝင် PDF တချို့ စစ်ကောင်စီတပ်၏ လေကြောင်း ပစ်ခတ်မှု၊ လက်နက်ကြီး ပစ်ခတ်မှု စသည်တို့ကြောင့် ကျဆုံးခဲ့ရပြီး၊ ဖမ်းဆီးခံခဲ့ရသူများ ရှိကြောင်း သိရသည်။

” ကိုဝေလင်း ကျတာက ပြီးခဲ့တဲ့ရက်ကပါ အလောင်းက ဒီနေ့မှတွေ့တာပါ။ သူ့နောက်ဆုံး ရိုက်ခဲ့တဲ့ ဓာတ်ပုံတော့ရှိတယ် ပေးလို့ရတယ်။ သူက အဲဒီပုံကို ပန်းချီဆွဲစေချင်ခဲ့တာ၊ ရဲဘော်တွေကို ကာကွယ်ရင်း ကျသွားရတာ ကျနော်တြိ့မှာ လက်နက်မရှိဘူး၊ ရှိတာလေးနဲ့ ခံပစ်ရင် ကျခဲ့ရတာ” ဟု ကိုဝေလင်း၏ သူငယ်ချင်း ဖြစ်သူ တဦးက ပြောသည်။

စစ်ကောင်စီတပ်က လေကြောင်းပစ်ခတ်မှု၊လက်နက်ကြီး ပစ်ခတ်မှုများ၊ အင်အားအများအပြား ထိုးစစ်ဆင်မှုတို့ကြောင့် KNLA နှင့် PDF တို့ ပူးပေါင်းတိုက်ပွဲပြင်းထန်ခဲ့ပြီး၊ စစ်ကောင်စီဘက်ကလည်း အသေ အပျောက်များကြောင်း၊ မယ်ဝါးခီး ဒေသခံပြည်သူများထွက်ပြေးတိမ်းရှောင်နေကြရသည်။

Red News Agency

RNA_ဒီဇင်ဘာ ၂၆ ရက်၊ ၂၀၂၁ ခုနှစ်။

စစ်ကောင်စီတပ်က ဒီဇင်ဘာလ ၂၅ ရက်နေ့ကလေကြောင်းတိုက်ခိုက်မှုအပါအဝင် လက်နက်ကြီး အချက် ရာချီပစ်မှုနှင့် အင်အားအများအပြား အပြင်းအထန် ထိုးစစ်ဆင်ခဲ့သည့် ထီးမယ်ဝါးခီး ကျေးရွာအနီး တိုက်ပွဲတွင် ဖမ်းဆီးခံရသူ (၁၀) ဦးအထက်ရှိပြီး ပျောက်ဆုံးနေသူ (၁၅) ဦးအထက်ရှိကြောင်း စုံစမ်းသိရှိရသည်။

စစ်ကောင်စီတပ်၏ လက်နက်ကြီးပစ်ခတ်မှုနှင့် လေကြောင်းတိုက်ခိုက်မှုကြောင့် သတင်းယူနေသည့် ဖက်ဒရယ်ဂျာနယ် အယ်ဒီတာ အေစိုင်းကေ (ခ)စိုင်းဝင်းအောင် နှင့် PDF ရဲဘော် ကိုအောင်မျိုးဇင် (ခ) အုပ်ကြီးတို့ ကျဆုံးခဲ့ရပြီး ယနေ့နံနက်မှာ သင်္ဂြိုဟ်ပေးခဲ့ပြီး၊ PDF ကိုဝေလင်းနှင့် ကိုမှိုင်းတို့မှာ ကျဆုံးသွားပြီဟု ယူဆထားကြပြီး ပျောက်ဆုံးနေသူ (၁၅) ဦးကျော် ရှိသေးကြောင်း သိရသည်။

စစ်ကြောင်စီတပ် ထိုးစစ်ကို KNLA နှင့် PDF တို့က ခုခံပစ်ခတ်ခဲ့ကြောင်း၊ ဖမ်းဆီးခံရပြီး စစ်ကောင်စီတပ်က ပစ်သတ်မှုများရှိကြောင်း၊ (၁၀) ဦးကျော်အရှင်ဖမ်းသွားကြောင်း၊ ကျဆုံးစာရင်းနှင့် ဖမ်းဆီးခံရမှုစာရင်းကို တာဝန်ရှိသူများက အတိအကျ အတည်ပြုနိုင်ခြင်း မရှိသေးကြောင်း စုံစမ်းသိရှိရသည်။

Red News Agency

RNA_ဒီဇင်ဘာ ၂၅ ရက်၊ ၂၀၂၁ ခုနှစ်။

စစ်ကောင်စီတပ်က တိုက်ပွဲအတွင်း အဆက်မပြတ်ပစ်ခတ်နေသည့် လက်နက်ကြီး‌ထိမှန်ကာ သာပေါင်းမြို့က ကိုအောင်မျိုးဇင် ပါအဝင် အနည်းဆုံး PDF (၄) ဦး မယ်ဝါးခီး တိုက်ပွဲမှာ သူရဲကောင်းပီသစွာ ယနေ့ ကျဆုံးသွားခဲ့ရပြီး၊ အဖမ်းခံရသူများရှိပြီး၊ ဒဏ်ရာရရှိသူများလည်းရှိကြောင်း သိရသည်။

ကရင်ပြည်နယ် မြဝတီမြို့တောင်ဘက် လေးကေ့ကော်နှင့် မျက်နှာချင်းဆိုင်နီးပါးရှိသည့် မယ်ဝါးခီး ကျေးရွာအနီး စစ်ကောင်စီတပ်က လေကြောင်းဖြင့်ပါ ပစ်ခတ်နေပြီး၊ လက်နက်ကြီးများနှင့် အဆက်မပျက် ပစ်ခတ်နေခြင်း ဖြစ်ကြောင်း သိရသည်။

KNU ထိန်းချုပ်နယ်မြေ မယ်ဝါးခီးတွင်ရှိသည့် ဒေသခံပြည်သူများ တိုက်ပွဲအတွင်း ပိတ်မိနေပြီး စစ်ကောင်စီတပ်က လေကြောင်းနှင့် လက်နက်ကြီးများ အဆက်မပြတ် ပစ်ခတ်နေကြောင်း၊ KNLA တပ်ရင်း (၂၇) နှင့် PDF တို့က စစ်ကောင်စီတပ် ခြေလျင်အဖွဲ့ကို ခုခံပစ်ခတ်သည့်အတွက် တိုက်ပွဲပြင်းထန်နေကြောင်း သိရသည်။

Red News Agency

RNA_ဒီဇင်ဘာ ၁၈ ရက်၊ ၂၀၂၁ ခုနှစ်။

KNU-သထုံခရိုင်၊ ဘီးလင်းမြို့နယ်၊ ကြသောင်းဆိပ်ကျေးရွာရှိ BGF-၁၀၁၃ တပ်စခန်းအား ကရင့်အမျိုးသား လွတ်မြောက်ရေးတပ်မတော် (KNLA) တပ်မဟာ (၁)၊ တပ်ရင်း(၁)နှင့် PDF ပူးပေါင်းတပ်ဖွဲ့များမှ ဒီဇင်ဘာလ ၁၇ ရက်နေ့ နံနက် (၆)နာရီ၌ စတင်ထိုးစစ်ဆင်တိုက်ခိုက်ခဲ့ပြီး ည(၉)နာရီ ၃၀ မိနစ်ဝန်းကျင်က သိမ်းပိုက်နိုင်ခဲ့ကြောင်း သိရသည်။

ကြသောင်းဆိပ်-BGFစခန်းကို ကူပစ်ပေးသည့်အနေဖြင့် ကတိုင်ဒိ BGFစခန်းမှ လက်နက်ကြီး (၁၂၀ mm)များဖြင့် ပစ်ခတ်မှုများကြောင့် ကျေးရွာအတွင်းရှိ လူနေအိမ်များ ပျက်စီးမှုရှိကြောင်း၊ BGF စခန်းအား သိမ်းယူပြီးသည်နှင့် တစ်ပြိုင်နက် စခန်းအတွင်းရှိ ကျန်ရှိနေသေးသော ပစ္စည်းများ၊ တဲအိမ်များအား ည(၁၀)နာရီအချိန်၌ KNLA ပူးပေါင်းတပ်ဖွဲ့မှ မီးရှို့ရှင်းလင်းခဲ့ကြောင်း KNU က ထုတ်ပြန်ထားသည်။

BGF-၁၀၁၃ တပ်စခန်းသိမ်းတိုက်ပွဲတွင် BGFဖက်မှ စခန်းမှူးအပါအဝင် (၄)ဦး ထိခိုက်ဒဏ်ရာရခဲ့ပြီး၊ KNLA ပူးပေါင်းတပ်ဖွဲ့မှ (၁)ဦးသေ၊ ၃ ဦးဒဏ်ရာရခဲ့ကြောင်း၊ BGF-၁၀၁၃ တပ်စခန်းကို ၁၉၉၃ ခုနှစ်ခန့်က စစ်ကောင်စီတပ်များ လာရောက်တပ်စွဲထားခဲ့ပြီး နောက်ပိုင်းတွင် BGFတပ်ဖွဲ့များကိုသာ စေလွှတ်၍ စခန်းချစေခဲ့ခြင်းဖြစ်ကြောင်း KNU ထုတ်ပြန်ချက်တွင် ပါရှိသည်။

Red News Agency