RNA_စက်တင်ဘာ(၂၂)၊၂၀၂၅ခုနှစ်။
စစ်ကိုင်းတိုင်း၊ အရာတော်မြို့နယ်၊ မလဲသာရွာနေ ကဗျာဆရာ ဦးမြင့်ဆန်းကို ပျူစောထီးခေါင်းဆောင်ဟုမှားယွင်းသတ်ဖြတ်မိသည့်အပေါ် မိသားစုကို ဝန်ချတောင်းပန်ထားသည့်အပြင် နောင်တစ်ချိန်မှာ တရားစွဲဆိုမည်ဆိုပါကလည်း တာဝန်ယူမည်ဟု ZERO ပြောက်ကျားတပ်ဖွဲ့ခေါင်းဆောင် ကိုသက်ကြီးက ZERO- ရဲ့ – သမိုင်းမှတ်တမ်း ( ၄ )အတွက် ရေးတင်ထားသည့် ယနေ့ (စက်တင်ဘာ ၂၂ ရက်) Facebook Post တွင် ပြောကြားထားသည်။
“စစ်ကိုင်းနယ်မြေအတွင်းအင်အားဖြည့်ရှင်းလင်းရေး အကူဆောင်ရွက်ရင်း စာရေးဆရာ/ကဗျာဆရာကြီးတစ်ဦးအား မှားယွင်းစွာကျူးလွန်ခဲ့ပါတယ် ( အကျယ်တဝံ့ရှင်းမပြတော့ပါဘူး၊ နယ်မြေခံတွေအားလုံးသိထားတဲ့ ဖြစ်စဉ်တစ်ခုမို့ပါ ကျနော်က ဓါးခုတ်ရာလက်လျှိုဖြစ်ခဲ့ရခြင်းပါ၊ နယ်မြေခံရဲ့ဆုံးဖြတ်ချက်နှင့်ပါဝင်လုပ်ဆောင်ခဲ့သောဖြစ်စဉ်ပါ၊ဘယ်သူ ဘယ်ဝါကျနော်ညီတွေမသိခဲ့ပါဘူး) ၊သေချာစီစစ်ပြီး – နစ်နာခဲ့သောမိသားစုဝင်များအားနယ်မြေတာဝန်ခံ/ရပ်မိရပ်ဘများနှင့်အတူ တောင်းပန်ခြင်း ဝမ်းနည်းစကားပြောကြားရင်း၊အားပေးနှစ်သိမ့်ရင်း — ခုဖြစ်စဉ်အတွက်နောင်တချိန်တိုင်းပြည်အေးချမ်းတဲ့ကာလမှာ တရားစွဲဆိုမည်ဆိုလည်း ကျနော့်အဖွဲ့အတွက်တာဝန်ယူပြီး ထိုက်သင့်တဲ့အပစ်ပေးအရေးယူမူ့ခံယူနိုင်တဲ့အကြောင်း ၎င်းဖြစ်စဉ်အားတာဝန်ခံ၊တာဝန်ယူခဲ့ပါတယ်၊ တောင်းပန်မူ့အတွက်မိသားစုလည်းလိုက်လှဲစွာကြိုဆိုခဲ့ပါတယ်” ဟု ZERO ပြောက်ကျားတပ်ဖွဲ့ခေါင်းဆောင် ကိုသက်ကြီးက လူမှုကွန်ရက်မှာ ပြောကြားထားသည်။
ဦးမြင့်ဆန်း (အသက် ၆၅ နှစ်)သည် အကြမ်းဖက်စစ်တပ်ရန်ကြောင့် မလဲသာရွာမှ ၂ မိုင်ခန့်ကွာဝေးသည့် ကျေးရွာ တစ်ရွာတွင် တိမ်းရှောင်နေစဉ် ၂၀၂၂ ခုနှစ် ဖေဖော်ဝါရီလ (၃) ရက်နေ့က သတ်ဖြတ်ခံခဲ့ရခြင်းဖြစ်ကြောင်း၊ ဦးမြင့်ဆန်းသည် မြင့်ဆန်း (မလဲသာ) ကလောင်ဖြင့် ကဗျာများရေးသားပြီး မလဲသာ စာကြည့်တိုက်တည်ထောင်သူ၊ သစ်ပင်စိုက်လှုပ်ရှားမှု၊ အမှိုက်ကင်းစင်ရေးလှုပ်ရှားမှုစသည့် လူမှုရေးလုပ်ငန်းများကြောင့် ရပ်ရွာလေးစားခံရသူဖြစ်ကြောင်း သိရသည်။
ဦးမြင့်ဆန်းသည် ၂၀၂၁ ခုနှစ် နွေဦးတော်လှန်ရေး မဖြစ်ခင်က ငြိမ်းချမ်းရေး၊ ဒီမိုကရေစီအရေးအတွက် အရပ်ဘက်အဖွဲ့အစည်းများတက်ကြွလှုပ်ရှားသူဖြစ်သည်ဟုလည်း ၂၀၂၂ ခုနှစ် ဖေဖော်ဝါရီလ (၄) ရက်နေ့က စစ်ကိုင်းတိုင်းအတွင်းရှိ အဖွဲ့အစည်း ၁၆ ဖွဲ့က သတင်းထုတ်ပြန်ကာ မှားယွင်းသတ်ဖြတ်မိပါက ကျူးလွန်ရာတွင် ပါဝင်ခဲ့သူ လူပုဂ္ဂိုလ်/အဖွဲ့အစည်းအားလုံးက ဦးမြင့်ဆန်း၏ ကျန်ရစ်သူမိသားစုကို ကျေနပ်သည်အထိ ဝန်ချတောင်းပန်ရန် တောင်းဆိုထားသည်။
မှားယွင်းသတ်ဖြတ်ခဲ့သည်ဟု ဝန်ခံထားသော ZERO ပြောက်ကျားတပ်ဖွဲ့ခေါင်းဆောင် ကိုသက်ကြီး ရေးသားထားသည့် စာတွင်လည်း “MOD ရဲ့အထက်တာဝန်ရှိသူကိုလည်းထိုဖြစ်စဉ်တင်ပြပေးခဲ့ပါတယ် ( မှားရင် မှားတဲ့အကြောင်း ခုလိုလက်နက်ကိုင်အဖွဲ့အနေနဲ့တောင်းပန်မူ့ဟာ သတ္တိတစ်ခုလိုကျနော်ယူဆပါတယ်)၊ ကျန်ရစ်သူမိသားစုဟာ ခုချိန်မိတ်ဆွေရင်းပမာဆက်ဆံရေးရှိနေခဲ့ပါတယ်၊ ကျေးဇူးလည်းတင်ရှိရပါတယ်” ဟုပါရှိသည်။
စစ်ကိုင်းတိုင်းနှင့် မကွေးတိုင်းတွင် ၂၀၂၁ ခုနှစ် နွေဦးတော်လှန်ရေးကာလအစပိုင်းနှင့် ၂၀၂၂ ခုနှစ် လက်နက်ကိုင်တပ်ဖွဲ့များအားကောင်းစအချိန်တွင် ပုဂ္ဂိုလ်ရေးအရ မကျေနပ်ပါက လက်နက်ကိုင်တစ်ချို့သည် ဒလန်ဟုစွပ်စွဲသတ်ဖြတ်မှုများ၊ မှားယွင်းသတ်ဖြတ်မှုများနှင့် တော်လှန်ရေးနှင့်မဆိုင်သည့် လူသတ်မှုများဖြစ်ပွားခဲ့သည်။ မှားယွင်းသတ်ဖြတ်မှုနှင့် ပုဂ္ဂိုလ်ရေးအရ မကျေနပ်သည့်အတွက် ဒလန်စွပ်စွဲသတ်ဖြတ်မှုများကို ဒေသတွင်းတော်လှန်ရေးအင်အားစုအချင်းချင်းသိသော်လည်း တရားဝင်ပြောကြား ထုတ်ဖော်ခြင်းများ မရှိသလောက်ဖြစ်သည်။
#RedNewsAgency #RNA #REDNEWS
