Author: RNA Editor

RNA- စက်တင်ဘာ ၇ ရက်။

မကွေးလေတပ်စခန်းကို ၁၀၇ မမ ဒုံး ၄လုံးနှင့် ပစ်ခတ်မှုပြုလုပ်ခဲ့သည့် လူထုတော်လှန်ရေး အင်အားစု (People’s Revolutionary Association – PRA) အဖွဲ့က စစ်အာဏာရှင်တော်လှန်ရေးအတွက် မကွေးတိုင်းအတွင်း စစ်အာဏာရှင် တော်လှန်ရေးကို မဟာဗျူဟာမြောက် လှုပ်ရှားနိုင်ရန် မြို့နယ်များနှင့် ချိတ်ဆက်ထားပြီးဖြစ်သည်ဟု ယနေ့ ( စက်တင်ဘာလ ၇ ရက်) တွင် ကြေညာထားသည်။

မကွေး လေတပ်စခန်းကို ဧပြီလ ၂၉ ရက်နေ့ နံနက်ပိုင်းက ၁၀၇ မမ ဒုံးများဖြင့် တိုက်ခိုက်ခဲ့ခြင်းဖြစ်ကြောင်း၊ လူထုတော်လှန်ရေး အင်အားစု ( PRA) အနေဖြင့် EAO များ၊ ဒေသတွင်း ပကဖ များ၊ PDF များ၊ STF များနှင့် ပူးပေါင်းဆောင်ရွက်မည်ဟု သိရသည်။

PRA အဖွဲ့တွင် မကွေးတိုင်းဒေသကြီးအတွင်း တက္ကသိုလ် အသီးသီးက ကျောင်းသား လူငယ်တွေ၊ နိုင်ငံရေးတက်ကြွလှုပ်ရှားသူတွေ စုပေါင်ပြီး၂၀၂၁ ခုနှစ် မတ်လ ၂၈ ရက်က စတင်ဖွဲ့စည်းခဲ့ခြင်း ဖြစ်ကြောင်း၊ စစ်အာဏာရှင် စနစ်ကို အမြစ်ဖြတ်သုတ်သင်ပြီး ဖက်ဒရယ် ဒီမိုကရေစီ နိုင်ငံတော်ကြီးဖြစ်ထွန်းလာစေရေး ဆောင်ရွက်နိုင်ဖို့ ဖြစ်ကြောင်း ကြေညာချက်တွင် ဖော်ပြထားသည်။

Red News Agency

RNA- ဩဂုတ် ၃၀ ရက်။

အမျိုးသားညီညွတ်ရေးအစိုးရ ( NUG) လူ့အခွင့်အရေးဆိုင်ရာ ဝန်ကြီးဌာန အကြံပေး အဖွဲ့ဝင်အဖြစ် ရိုဟင်ဂျာတဦးဖြစ်သည့် ဦးအောင်ကျော်မိုးကို ခန့်အပ်ခြင်းအပေါ် ဘင်္ဂလားဒေရ်ှ့နိုင်ငံရောက် ရိုဟင်ဂျာဒုက္ခသည်စခန်းများရှိ အရပ်ဖက်အဖွဲ့အစည်းများက ကြိုဆိုထောက်ခံကြောင်း ယနေ့ ( ဩဂုတ်လ ၃၀ ရက်) တွင် ထုတ်ပြန်ကြေညာထားသည်။

NUG လူ့အခွင့်အရေးဆိုင်ရာ ဝန်ကြီးဌာန အကြံပေးအဖွဲ့ဝင်အဖြစ် ဦးအောင်ကျော်မိုးကို ဩဂုတ်လ ၂၇ ရက်နေ့က ခန့်အပ်ခဲ့ကြောင်း၊ ဦးအောင်ကျော်မိုးသည် ရခိုင်ပြည်နယ် ဇာတိဖြစ်ပြီး၊ ရခိုင်ပြည်နယ်အတွင်းရှိ လူမျိုးစုအသီးသီး၏ အခွင့်အရေးကိစ္စများ၊ ဘင်္ဂလားဒေရ်ှ့နိုင်ငံရှိ ရိုဟင်ဂျာဒုက္ခသည်စခန်းများတွင် ပညာရေး၊ လူသားချင်းစာနာမှုနှင့် လူ့အခွင့်အရေး ကိစ္စများကို တစိုက်မတ်မတ်လုပ်ဆောင်ခဲ့သူဖြစ်ကြောင်း သိရသည်။

ထုတ်ပြန်ချက်တွင် ဦးအောင်ကျော်မိုးကို ထောက်ခံကြိုဆိုသည့် အဖွဲ့များမှာ Rohingya Youth Association ( RYA) ၊ Rohingya Women Development Forum ( RWDF) ၊ Arkan Rohingya Cultural Association ( ARCA) ၊ ARSPH၊ RYLA၊ RSU၊ YRD စသည့် ၁၇ ဖွဲ့ဖြစ်သည်။

အမျိုးသားညီညွတ်ရေးအစိုးရက ရိုဟင်ဂျာများကို အမိမြန်မာနိုင်ငံအတွင်းက မူလဌာနေ တိုင်းရင်းသားများ ဖြစ်သည့် အားလျော်စွာ တိုင်းရင်းသား မျိုးနွယ်စု အဖြစ် အသိအမှတ်ပြု ကြေညာပေးရန်နှင့် ယဉ်ကျေးမှုနှင့် အမျိုးသားရေး လက္ခဏာများအား ပြည်ထောင်စုအဆင့်မှ ထိန်းသိမ်း ကာကွယ်ပေးရေး ဥပဒေပြဌာန်းပေးရန်၊ ရိုဟင်ဂျာများ၏ မွေးရာပါ အခွင့်အရေးနှင့် နိုင်ငံသားဖြစ်မှုအား ခြွင်းချက် မရှိ အသိအမှတ်ပြုရန် စသည့် တောင်းဆိုချက်များကိုလည်း ဦးကျော်မိုးထွန်း အနေဖြင့် NUG အစိုးရအား ညှိနှိုင်းအကြံပြု ဆောင်ရွက်နိုင်မည်ဟု ရိုဟင်ဂျာများက မျှော်လင့်နေကြောင်း ထုတ်ပြန်ချက်တွင် ပါရှိသည်။

Red News Agency

RNA- ဩဂုတ် ၂၀ ရက်။

ကရင်နီအမျိုးသားကာကွယ်ရေးတပ်မတော် ( KNDF) က အာဏာသိမ်းစစ်ကောင်စီတပ်က ထွက်လာမည့် ပြည်သူ့ စစ်သားများကို လုံခြုံရေးအာမခံပြီး အတူပူးပေါင်း လက်ခံမည်ဖြစ်ကြောင်း သိရသည်။

ပြည်သူ့ရင်ခွင် ဝင်ရောက်လာမည့် စစ်ဟားများကို KNDF နှင့် အတူ ပူးပေါင်းကြိုဆိုမည့်ကိစ္စကို ယနေ့ ပြည်သူ့စစ်သားများအဖွဲ့နှင့် ဆွေးနွေးအတည်ပြုကြပြီး၊ ပြည်သူ့ရင်ခွင် ဝင်ရောက်လာမည့် စစ်သားများအတွက် လုံခြုံရေး အာမခံသည့်အပြင် ဆုငွေများပါ ချီးမြင့်မည်ဖြစ်ကြောင်း KNDF က ယနေ့တွင် ထုတ်ပြန်ထားသည်။

ပြီးခဲ့ရက်ပိုင်းကလည်း အာဏာသိမ်း စစ်ကောင်စီ လက်နက်ကိုင်အဖွဲ့မှ ပြည်သူ့ရင်ခွင် ဝင်ရောက်လာသူ များရှိကြောင်း၊ NUG နှင့် တိုင်းရင်းသား လက်နက်ကိုင်အဖွဲ့များ၊ နွေဦးတော်လှန်ရေးက ပေါ်ပေါက်လာသည့် PDF များနှင့် ပြည်သူ့စစ်သားများ အတူပူးပေါင်းကာ ဒီမိုကရေစီရေးအတွက် စစ်အာဏာရှင်ကို တိုက်ထုတ်ရန် ပြင်ဆင်နေကြကြောင်း သိရသည်။

Red News Agency

RNA- ဩဂုတ် ၂ ရက်။

ယောနယ်အတွင်း အာဏာသိမ်း စစ်အုပ်စုနှင့် အပေါင်းအပါများကို လက်နက်ကိုင်တိုက်နေသည့် လူငယ်များအကြား ၂၀၂၀ ခုနှစ် ရွေးကောက်ပွဲတွင် ယောနယ်က အနိုင်ရရှိသည့် NLD လွှတ်တော်ကိုယ်စားလှယ်တချို့က သွေးခွဲစည်းရုံးမှု ပြုလုပ်နေသည်ဟု ယောနယ်ပြည်သူ့ကာကွယ်ရေးတပ်ဖွဲ့ (Yaw Defense Force – YDF )က
ယနေ့ ( ဩဂုတ်လ ၂ ရက်) တွင် ထုတ်ပြန်ထားသည်။

” ယောဒေသ နှင့် မြန်မာပြည်ဒေသတချို့တွင် မိမိလူမျိုး မိမိဒေသအမည်ဖြင့် ဖွဲ့စည်းတည်ထောင်ခဲ့သော Yaw Defense Force – YDF အမည်ကို ပယ်ဖျက်ခြင်း သို့မဟုတ် စိတ်ဝမ်းခွဲကာ NUG တရားဝင် ဖွဲ့စည်းထားသော PDF အမည်သုံးမှသာ တရားဝင်ငွေကြေး၊ လက်နက်ထောက်ပံ့ တပ်ဆင်ပေးမည်ဆိုသည့် မဟုတ်မမှန်သည့်လုပ်ရပ်ကို ၂၀၂၀ ခုနှစ် ရွေးကောက်ခံ ယောဒေသ လွှတ်တော်ကိုယ်စားလှယ်တချို့မှ ၎င်းတို့ အာဏာတည်မြဲရေးအတွက် ယောလူငယ်တချို့ကို မက်လုံးပေး သွေးခွဲစည်းရုံးလှုံ့ဆော်မှုများ ပြုလုပ်နေသည်ကို စိတ်မကောင်းစွာ မြင်တွေ့ သိရှိနေရသဖြင့် ထိုသို့ လုပ်ဆောင်နေသော ပါတီ၊ လူအုပ်စု နှင့် လူပုဂ္ဂိုလ်များကို ပြင်းထန်စွာ ဆန့်ကျင်ကန့်ကွက်သွားမည်ဖြစ်ကြောင်း အသိပေးအပ်ပါသည်” ဟု YDF ထုတ်ပြန်ချက်တွင် ဖော်ပြထားသည်။

Yaw Defense Force – YDF ကို ၂၀၂၁ ခုနှစ် မေလ (၁၂) ရက်နေ့တွင် National Unity Government (NUG) နှင့် သက်ဆိုင်ရာ အဖွဲ့အစည်း ဦးဆောင်မှုကို ပံ့ပိုးကူညီရန် စုစည်းတည်ထောင်ခဲ့ကြောင်း၊ YDF သည် PDF ( Tamu/TSG ) နှင့်လည်း ပူးပေါင်း လုပ်ဆောင်မှုများရှိကြောင်း၊ ယခုအခြေအနေတွင် PDF ( Tamu/TSG ) က YDF နှင့်အတူ ရပ်တည်မည်ဖြစ်ကြောင်း ကြေညာထားသည်။

YDF သည် စစ်အာဏာရှင်အမြစ်ပြတ်ချေမှုန်းရေးအတွက်သာ ဦးတည်ဆောင်ရွက်မည်ဖြစ်ကြောင်း၊  နိုင်ငံရေးအာဏာနေရာရရေး နှင့် မည်သည့်နိုင်ငံရေးပါတီအတွက် တိုက်ပွဲဝင်နေခြင်း မဟုတ်ဘဲ NUG ၏ တိုက်ပွဲခေါ်သံနဲ့အတူ ပြည်သူ့တော်လှန်ရေးပြီးဆုံးသည်အထိ တိုက်ပွဲဝင်သွားရန်သာဖြစ်ပြီး စစ်မှန်သောပြည်သူ့အစိုးရပေါ်ပေါက်ရေးအတွက် ဖွဲစည်းထားသောလက်နက်ကိုင်အဖွဲ့အစည်းဖြစ်ကြောင်း ထုတ်ပြန်ချက်တွင် ဖော်ပြထားသည်။

RedNewsAgency