RNA_ဒီဇင်ဘာ(၁၇)၊၂၀၂၃ခုနှစ်။
စစ်တပ်တွင် တာဝန်ပြန်ထမ်းဆောင်လိုသော ခွင့်မဲ့ စစ်ပြေးများကို ပြန်လည်ခေါ်ဆောင်သည့် အမိန့်စာထုတ်ပြီးနောက် အင်းစိန်ထောင်အတွင်းမှ စစ်ပြေးနှင့်ရဲပြေးစသည့် ၃၀၀ ခန့်ကို စစ်မှုမထမ်းသည့်အတွက် ယမန်နေ့က အင်းစီန်ထောင်သို့ ပြန်လည်ပို့ဆောင်လိုက်ကြောင်း သိရသည်။
“စစ်မတိုက်နိုင်ဘူး ကျသင့်သလောက်ခံသွားမယ် ကျတော်တို့ကိုထောင်ထဲ ပြန်ပို့ ပေးပါ” ဟု အင်းစိန်ထောင်တွင်းမှ ခေါ်ထုတ်သွားခံရသူများက ပြောကြကြောင်း၊ ” မင်းတို့ကလည်း လွတ်ငြိမ်းပေးတာတောင် မထွက်ချင်ဘူး” ဟုလည်း စစ်ကောင်စီလက်အောက်ခံများက ပြောနေကြကြောင်း အင်းစိန်ထောင်အတွင်း ပြောဆိုနေကြကြောင်း သိရသည်။
အင်းစိန်ထောင်မှ အကျဉ်းသားများကို ဒီဇင်ဘာလ (၇) ရက်နေ့က အဓမ္မခေါ်ဆောင်ပြီး စစ်မှုထမ်းပါက လွတ်ငြိမ်းချမ်းသာပေးမည်ဟု စစ်ကောင်စီလက်အောက်ခံများတိုက်တွန်းခဲ့ပေမဲ့ စစ်မှူမထမ်းလိုကြောာင်းနှင့် ထောင်ကျသည့်နှစ်အတိုင်း ထောု်တွင်နေမည်ဟု ပြောဆိုခဲ့ကြသည့်အတွက် ထောင်အတွင်း ပြန်ပို့ပေးခဲ့ခြင်းဖြစ်သည်ဟု အင်းစိန်ထောင်နှင့် နီးစပ်သူတဦးက ပြောသည်။
စစ်ပြေး၊ ရဲပြေး၊ ခွင့်မဲ့ပျက်ကွက်သူ စသဖြင့် ထောင်တွင်း အကျဉ်းကျခံရသူများကလည်း စစ်ကောင်စီတပ်လက်အောက် တာဝန်မထမ်းဆောင်လိုကြတော့ကြောင်း၊ အကျဉ်းထောင်မှ အဓမ္မထုတ်သွားစဉ် မိသားစုဝင်များကလည်း စိတ်ပူခဲ့ကြရကြောင်း၊ ယခုချိန် စစ်တပ်အောက် ပြန်ဝင်ပြီး လက်နက်ကိုင် ရှေ့တန်းလွှတ်ခံရပါက သေဖို့သာများသည်ဟု မိသားစုဝင်များကပါ ယုံကြည်နေသည့်အတွက် ထောင်အတွင်းသာ နှစ်ပြည့်သည်အထိ နေစေလိုကြောင်း သိရသည်။
မင်းအောင်လှိုင်ဦးဆောင်သည့် အကြမ်းဖက် စစ်ကောင်စီတပ်တွင် တပ်ရင်းအလိုက် လက်နက်ချသူများ၊ စစ်သုံ့ပန်းအဖြစ်ဖမ်းဆီးခံရမှုများ၊ တိုက်ပွဲအတွင်း သေဆုံးမှုများ၊ CDM ပြုလုပ်သူများကြောင့် တပ်တွင်း ရှေ့တန်းထွက်အင်အား နည်းပါးနေသည့်အတွက် လူအင်အား အဆမတန်လိုအပ်နေကြောင်း၊ မြို့သိမ်းခံရခြင်းများ အပါအဝင် စခန်းသိမ်းတိုက်ပွဲများအတွင်း စစ်ကောင်စီတပ်သားများမှာ စစ်မတိုက်လိုတော့ခြင်း စသည်တို့ကြောင့် စစ်ကောင်စီတပ်မှာ ပြိုလဲနေသည့်အဆင့်သို့ တဖြည်းဖြည်းရောက်ရှိနေကြောင်း သိရသည်။
#RedNewsAgency
