RNA_ဖေဖော်ဝါရီ(၁၆)၊၂၀၂၄ခုနှစ်။
စစ်ကောင်စီလက်အတွင်း ၂၀၂၄ ခုနှစ် ဇန်နဝါရီလအတွင်းက ပဲခူးတိုင်း၊ ဝေါမြို့နယ်အတွင်း ဖမ်းဆီးခံခဲ့ရသည့် နိုင်ငံရေးအကျဉ်းသူဟောင်း မနိုဘယ်လ်အေးကို ဖေဖော်ဝါရီလ ၈ ရက်နေ့ ဝေါတရားရုံးမှ ရုံးထုတ်အပြန်တွင် စစ်ကောင်စီလက်အောက်ခံများက ထွက်ပြေးရန်ကြိုးစားသည့်အတွက်ဟု အကြောင်းပြကာ ပစ်သတ်ခဲ့သည်ဟု သိရသည်။
“ကျွန်တော့်အမ၊ အတူတူအဖမ်းခံရတဲ့ အမျိုးသားလေး ၂ယောက်ကို ဝေါမြို့နယ် တရားရုံးမှာ ရမန်ယူတယ်။ အဲဒီကအပြန်မှာ သနပ်ပင်မြို့နယ်၊ ကျိုက်လတ်ရွာအရောက် လေးခွင်းကို ထွက်ပြေးတယ်ဆိုပြီး ပစ်သတ်ခဲ့တယ်။ ပြီးတော့ဝေါဆေးရုံးကို ပို့လိုက်တယ်။ အဲဒီအချက်အလက်ကို ဝေါမြို့နယ် လွှတ်တော်ကိုယ်စားလှယ် မင်းထက်သာက မိသားစုထံ အတည်ပြုပေးပါတယ်။ သူတို့ ၂ ယောက်ကို လူမသိ၊ သူမသိ ပိုင်ရှင်မဲ့အလောင်းအနေနဲ့ သင်္ဂြိုလ်ခဲ့တယ်။ ဘယ်နေရာမှာ သဂြိုလ်တယ်ဆိုတာကိုတော့ မသိရဘူး” လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) ကို မနိုဘလ်အေး၏ မောင်ဖြစ်သူ ကိုထက်မြက်က ပြောကြားထားသည်။
မနိုဘယ်လ်အေး ကျဆုံးခြင်းကိစ္စနှင့်ပတ်သက်ပြီး မိသားစုကို စစ်ကောင်စီက တစ်စုံတရာ အကြောင်းကြားထားခြင်း မရှိသေးကြောင်း သိရသည်။
မနိုဘယ်လ်အေးသည် ၁၉၉၆ ခုနှစ် ကျောင်းသားလှုပ်ရှားမှုမှာ ပါဝင်ခဲ့သည့်အတွက် ထောင်ဒဏ် (၄၂) နှစ် ကျခံရဖူးသည့် နိုင်ငံရေးအကျဉ်းသူဖြစ်ပြီး ၂၀၀၇ ခုနှစ် အရေးအခင်းတွင်လည်း ဖမ်းဆီးခံရသူဖြစ်ကြောင်း၊ ယခုနွေဦးတော်လှန်ရေးတွင်လည်း ပြည်သူ့ဘက်ရပ်တည်ကာ တော်လှန်ရေးလုပ်ငန်းစဉ်များကို လုပ်ဆောင်နေသူဖြစ်ကြောင်း သိရသည်။
#RedNewsAgency