RNA_ဖားကန့်၊ ဇွန် ၂၆ ရက်၊ ၂၀၂၄ ခုနှစ်။
ကချင်ပြည်နယ်၊ ဖားကန့်မြို့နယ်၊ ဆိပ်မူကျေးရွာ၌ ယနေ့မနက်ပိုင်းက စစ်ကောင်စီ၏ လှုပ်ရှားလာသည့် တပ်နှင့် နယ်မြေစိုးမိုးမှုယူထားသည့် KIA/KPDF ပူးပေါင်းတပ်တို့အကြား ထိတွေ့တိုက်ပွဲဖြစ်ပွားခဲ့ပြီး အထိနာသည့် စစ်ကောင်စီက ဖားကန့်ဗျူဟာကုန်းမှ လက်နက်ကြီးဖြင့် အရပ်သားပြည်သူများကို ရည်ရွယ်ပစ်ခတ်ခဲ့ပြီး အရပ်သားပြည်သူများ သေဆုံးသူအချို့နှင့် ထိခိုက်ဒဏ်ရာရရှိသူအများအပြား ရှိခဲ့သည်။
လက်ရှိနှစ်ဖက်စစ်ရေးတင်းမာနေသည့် ဆိပ်မူမြေပြင်အခြေအနေအရ အရပ်သား ပြည်သူများ၏ ထိခိုက်သေဆုံးမှုအတိအကျ မသိရှိရသေးသော်လည်း ဆိပ်မူ စိန်မြသုခကျောင်း အနောက်ဘက်တွင် တစ်လုံး၊ ဖူဆယ်ကွင်းဘေးတွင် တစ်လုံး၊ မှော်ရှန်ရပ်ကွက်လမ်းဘေးတွင် နှစ်လုံးကျရောက်ပေါက်ကွဲခဲ့ပြီး ပြည်သူ(၂၀)ဦးထက်မနည်း ထိခိုက်ဒဏ်ရာရရှိထားပြီး ထိခိုက်လဲကျ သေဆုံးနေသူတစ်ဦးကိုလည်းတွေ့ရှိထားကြောင်း ဆိပ်မူဒေသခံအချို့ထံမှ သိရသည်။
အထိနာသည့် စစ်ကောင်စီ၏ လှုပ်ရှားစစ်ကြောင်းသည် ထိခိုက်သေဆုံးသူ (၁၀)ဦးထက် မနည်း ရှိခဲ့ပြီး ဆိပ်မူကျေးရွာအတွင်း ပစ်ခတ်မှုများ ခေတ္တ ပြန်လည်ငြိမ်သက်နေကြောင်း၊ ဖားကန့်ရှိ လူမှုရေးအသင်းအဖွဲ့များကလည်း အရပ်သားပြည်သူများ၏ ဒဏ်ရာရနှင့် ထိခိုက်သေဆုံးသူများအား သယ်ဆောင် ကူညီခွင့်ရရန် စောင့်ဆိုင်းနေကြဆဲဖြစ်သည်။
ယမန်နေ့ ညနေပိုင်းကလည်း လုံးခင်းကျေးရွာ ရွာလယ်ရှိ ဆွေးလုကုန်မာဆိုင် ပစ္စည်းဂိုဒေါင်ပေါ် စစ်ကောင်စီ၏ လက်နက်ကြီးကျည် ကျရောက် ပေါက်ကွဲပြီး နံဘေးကပ်လျက် ကုန်မာဆိုင်တစ်ဆိုင်နှင့် နေအိမ်တစ်လုံးတို့ကို မီးကူးလောင်ကျွမ်းခဲ့ပြီး ဒေသပြည်သူများ၊ လူမှုရေးအသင်းအဖွဲ့များက အရံမီးသတ် မီးသတ်ကားများဖြင့် ဝိုင်းဝန်းငြိမ်းသတ်ခဲ့ရသည်။
#RedNewsAgency