RNA_ဩဂုတ် ၃၊၂၀၂၂ခုနှစ်။
ရခိုင်ပြည်နယ်၊ ပလက်ဝမြို့နယ်၊ တူးမဝ (တုံးမဝ) ကျေးရွာ မှ ကျောင်းတက်၍ ပြန်လာသော ကျောင်းကြိုပို့စက်လှေအား နှမဒါကျေးရွာစေတီကုန်း၌ စခန်းချတပ်စွဲနေရာယူထားသော စစ်ကောင်စီတပ်က ဩဂုတ်လ ၂ ရက်နေ့ နေ့လည် ၁ နာရီ ၃၅ မိနစ်ဝန်းကျင်က ပစ်ခတ်သည့်အတွက် ကျောင်းသား (၂) ဦး သေဆုံးပြီး ထိခိုက်ဒဏ်ရာရရှိခဲ့ကြောင်း သိရသည်။
တိုက်ပွဲဖြစ်ပွားခြင်းမရှိပဲ စစ်ကောင်စီတပ်က အကြောင်း မဲ့ ပစ်ခတ်သည့်အတွက် ရဲမဝ(ရီးမဝ) ကျေးရွာမှ ကျောင်းသား မောင်နေမင်းထွန်း (အသက်-၁၂ နှစ်) နှင့် မောင်အောင်သန်းမြင့် (အသက်-၁၂ နှစ်) တို့ သေဆုံးခဲ့ပြီး စက်လှေပေါ်တွင်လိုက်ပါလာသော ကျောင်းသူ/ကျောင်းသားအချို့နှင့် ကျောင်းစောင့်တစ်ဦး (ဦးဗဒူ၊ အသက်-၅၆ နှစ်)တို့ ဒဏ်ရာအသီးသီးရရှိခဲ့ကြသည်ဟု ရက္ခိုင့်တပ်တော် သတင်းနှင့်ပြန်ကြားရေးက ယနေ့ ထုတ်ပြန်ထားသည်။
ကုလားတန်မြစ်ကြောင်းတစ်လျှောက် ကူးသန်း ရောင်းဝယ်ရေးနှင့် လူမှုရေး၊ စီးပွားရေး၊ ကျန်းမာရေးအတွက် သွားလာနေကြသည့် ခရီးသွားမိဘပြည်သူများကို ၎င်းမြစ်ကြောင်းကမ်းနံဘေး၌ စခန်းချ တပ်စွဲဂိတ်ချထားသော စစ်ကောင်စီတပ်မှ အတင်းအဓမ္မပစ္စည်းတောင်းခံခြင်း၊ ငွေကြေးကောက်ခံခြင်း၊ သေနတ်ဖောက်ရပ်တန့်ခိုင်းခြင်း၊ မရပ်တန့်သော စက်လှေများအား သေနတ်ဖြင့် ပစ်ခတ်ခြင်းတို့ကို ပြုလုပ်လျက်ရှိကြောင်း သိရသည်။
Red News Agency