RNA_မေ(၂၄)၊၂၀၂၄ ခုနှစ်။
တိုက်ပွဲအတွင်းမှ ဒေသခံပြည်သူများ အသက်အန္တရာယ် ဘေးကင်းလုံခြုံရေးနှင့် တိုက်ပွဲအတွင်း ကြားညပ်မသွားစေရေးအတွက် အာရက္ခတပ်တော် – AAအလုံးစုံထိန်းချုပ်ထားသောနယ်မြေအတွင်း စစ်ဘေးရှောင် ရောက်လာသူ (၅) သိန်းကျော်ရှိရာတွင် မူဆလင် (၈၀) ရာခိုင်နှုန်းနှင့် ရခိုင်နှင့် အခြားလူမျိုရစုမှာ (၂၀) ရာခိုင်နှုန်းရှိကြောင်း AAက ယနေ့ ထုတ်ပြန်ထားသည်။
အာရက္ခတပ်တော် ထိန်းချုပ်နယ်မြေအတွင်းမှ စစ်ဘေးရှောင်များအတွက် ဆန်၊ ဆီ၊ ဆား ဆေးဝါးအပါအဝင် အခြေခံ အစားအစာများဖြင့် ကောင်းမွန်စွာ ကျွေးမွေးစောင့်ရှောက်ထားသော်လည်း နောက်လာမည့် ကာလများတွင် နေ့စဉ်သုံး အခြေခံအစားအစာများအပြင် ကလေးနှင့်အမျိုးသမီး လစဉ်သုံးပစ္စည်းများ၊ မိုးတွင်းကာလအတွက် အမိုးအကာ အိမ်သာများ အရေးတကြီး လိုအပ်လာမည်ဖြစ်သည့်အတွက် နိုင်ငံတကာအဖွဲ့အစည်းများ၊ စေတနာရှင်အဖွဲ့အစည်းများ၊ NGO အဖွဲ့အစည်းများ၊ စေတနာအလှူရှင်များမှ ကူညီပေရကြပ်ရန် အာရက္ခတပ်တော်မှ အားကိုးစွာဖြင့် တိုက်တွန်းနှိုးဆော်ထားသည်။
ရခိုင်အမျိုးသားအဖွဲ့ချုပ်/အာရက္ခတပ်တော်သည် စစ်ဘေးရှောင်အဖြစ် ရောက်ရှိလာသော ပြည်သူတိုင်းကို တန်ဖိုးထားလျက် လူမျိုးမရွေး၊ ဘာသာမရွေး မခွဲခြားဘဲ အကောင်းဆုံး ကူညီကာကွယ် စောင့်ရှောက်ထားကြောင်း၊ ဘူးသီးတောင်နှင့် မောင်တောမြို့နယ်တို့တွင် စစ်ဘေးရှောင် (၂) သိန်းခန့်ရှိကြောင်း၊ အာရက္ခဒေသအတွင်း စစ်ကောင်စီ၏ ဗျူဟာ၊ တပ်မ၊ ဌာနချုပ်များအတွင်းမှ စစ်ကောင်စီတပ်ဖွဲ့ဝင်များသည် စခန်းများစွန့်လွှတ်ကာ လက်နက်များဖြင့် ကိုယ်လွတ်ရုန်းထွက်ပြေးနေကြဆဲဖြစ်သည့်အတွက် ပြည်သူများ၊ စစ်ဘေးရှောင်ပြည်သူများ သတိထားနေကြရန် တိုက်တွန်းနှိုးဆော်ထားသည်။
#RedNewsAgency