RNA_ဖားကန့်၊ မတ် (၁၂)၊ ၂၀၂၄ ခုနှစ်။
ကချင်ပြည်နယ်၊ ဖားကန့်မြို့နယ်၊ ရှရော်ခကျေးရွာနှင့် မနကျေးရွာအစပ်နေရာရှိ ကျောက်တူးဖော်နေသည့် လုပ်ကွက်တစ်ခုအပေါ် အထက်ဘက်မှ ရွှံ့နွံကန်ပေါက်ကျပြီး လုပ်ကွက်ဝန်ထမ်း (၃၀)ဦးထက်မနည်း သေဆုံးမှု ယနေ့ နံနက် (၄)နာရီခန့်က ဖြစ်ပွားခဲ့သည်။
ရွှံ့နွံကန်ပေါက်ကျခဲ့သည့် လုပ်ကွက်အတွင်းမှ ကိုဖြိုးဝေ (ယာဉ်မောင်း) အသက်(၂၅) နှစ်၊ ကျော်ဇင်ဝိုင်း (ကြီးကြပ်) အသက် (၂၈)နှစ်၊ ဟိန်းမင်းလတ် (ဘက်ဟိုးမောင်း) အသက် (၃၂)နှစ်၊ စည်သူမျိုး (မိုင်းအဖွဲ့) အသက်(၁၉) နှစ်တို့ (၄)ဦးသာ အသက်ရှင်လျှက် လွတ်မြောက်ခဲ့သည်။
ကျောက်တူးဖော်ရေး လုပ်ငန်းဆောင်ရွက်နေစဉ် ရွှံ့နွံကန်ပေါက်ကျခဲ့သည့်အတွက် ဘက်ဟိုးနှင့် မြေသယ်ကား ဆယ်စီးခန့် ရွှံ့နွံအောက်နစ်မြှုပ်သွားပြီး ဘက်ဟိုးယာဉ်မောင်းဝန်ထမ်း၊ မြေသယ်ကားမောင်းဝန်ထမ်း၊ မိုင်းဝန်ထမ်းနှင့် ကျောက်ရှာဝန်ထမ်းများ သေဆုံးကြောင်း ဒေသခံများထံမှ သိရသည်။
လက်ရှိအခြေအနေအရ ရွှံ့နွံကန်ဖြစ်နေသည့်အတွက် ရှာဖွေကယ်ဆယ်ရေး ဆောင်ရွက်၍ မရနိုင်ကြောင်း သိရပြီး၊ ယနေ့ နံနက်ခင်းပိုင်းက မြေသားအမာနှင့်နွံကန်အစပ်ရှိ မျက်မြင်တွေ့ရသည့် ရုပ်အလောင်းနှစ်လောင်းသာ ဆယ်ယူရရှိကြောင်း သိရသည်။
#RedNewsAgency