RNA_ဖားကန့်၊ မတ် (၁၃)၊၂၀၂၃ ခုနှစ်။
ကချင်ပြည်နယ်၊ ဖားကန့်မြို့၊ မော်ဝမ်းရပ်ကွက်မှ နှင်းနှင်းဝေ လက်ဘက်ရောင်းဝယ်ရေးဆိုင်ပိုင်ရှင် ဦးချစ်ခိုင်၊ ဆံသဆရာ ကိုမျိုးသန့် အပါအဝင် ပြည်သူ (၅) ဦးကို ပြီးခဲ့သည့် (မတ်လ ၁၂ ရက်နေ့) ည(၁)နာရီခန့်တွင် နေအိမ်များအတွင်း ဝင်ရောက်ဖမ်းဆီးသွားခဲ့ကြောင်း သိရသည်။
ယခုရက်ပိုင်းအတွင်း စစ်ကောင်စီမှ ဖားကန့်မြို့နယ်နေထိုင်သူ ပြည်သူများအား အကြောင်းအမျိုးမျိုးပြ ဖမ်းဆီးမှု ဆက်တိုက်လုပ်ဆောင်နေပြီး ယခုလ (၁၁)ရက်နေ့ကလည်း ဖားကန့်မြို့နယ်၊ ဖားပြင်ကျေးရွာရှိ ကချင်ရိုးရာစာပေနှင့်ယဉ်ကျေးမှုရုံးအတွင်း သေနတ်ပစ်ဖောက်ဝင်စီးကာ အဆိုပါရုံးအတွင်းမှ ပြည်သူ(၇)ဦးခန့်ကို ဖမ်းဆီးသွားခဲ့သည်။
“အခုက အဖမ်းအဆီး တအားစိတ်လာတယ်၊ မထင်ရင် မထင်သလိုက ပစ်သတ်သေးတယ်၊ ဒီရက်ပိုင်းအတွင်း ဖမ်းပြီးပြန်မလွှတ်သေးတာတွေရော ထပ်ဖမ်းထားတာတွေရောဆို အယောက်(၂၀)လောက်ရှိပြီ၊ သွားသတိ လာသတိ နေလည်းသတိနဲ့ နေရတယ်၊ ဉပဒေက သူတို့လုပ်ချင်သလိုလုပ်ရနေတာပဲ၊ ပြောသာပြောရသာ လုံခြုံတဲ့နေရာရယ်လို့ မရှိပါဘူး”ဟု ဖားကန့်ပြည်သူ တစ်ဦးက ဆိုသည်။
အာဏာသိမ်းခါစမှလွဲပြီး တည်ငြိမ်နေသည့်ဖားကန့်ဒေသ ပြည်သူလူထုအကြား စိုးရိမ်ထိတ်လန့်မှု ယခုလပိုင်းတွင် တဖန် ပြန်လည်မြှင့်တက်လာခဲ့ကြောင်း၊ လမ်းမများပိတ်ပြီး စစ်ဆေးမှုပါအဝင် နည်းမျိုးစုံဖြင့် စစ်ကောင်စီတပ်က ပြည်သူများကို ဖမ်းဆီး နှိပ်စက် ခြိမ်းခြောက်နေကြောင်း သိရသည်။
#RedNewsAgency