RNA_ဒီဇင်ဘာ ၂၃ ရက်၊ ၂၀၂၁ ခုနှစ်။
ကချင်ပြည်နယ်၊ ဖားကန့်မြို့နယ်၊ လုံးခင်းအုပ်စု၊ မှော်စီစာကျေးရွာ အောင်သာယာ (၂) အနီး စိန်စိန်လုပ်ကွက် ( ဒေသအခေါ်) မြေစာပုံပြိုကျမှု ပျောက်ဆုံးနေသူ များသော်လည်း ယနေ့ နံနက်အထိ အလောင်း (၂) လောင်းသာ ဆယ်ယူနိုင်သေးကြောင်း ဒေသခံ သတင်းရင်းမြစ်က ပြောသည်။
” ပျောက်ဆုံးတာကတော့ များတယ် (၅၀) ကျော်ရှိတယ်လို့ ခန့်မှန်းပေါ့၊ အလောင်းက မနေ့က တလောင်း အခုမနက်တလောင်း ဒါပဲရှာတွေ့သေးတယ်၊ မနေ့ကတွေ့တဲ့အလောင်းက ကိုမျိုး ခွန်ဆာကုန်းကပေါ့” ဟု RNA သတင်းရင်းမြစ်က ပြောသည်။
စိန်စိန်လုပ်ကွက်အနီးက မြေစာပုံသည့် ရေကန်သည် အမြင့် ပေ ၂၀၀၊ အလျား ပေ ၂၀၀၀ ၊ အနံ ပေ ၃၀၀ ဝန်းကျင်ရှိပြီး ဒီဇင်ဘာလ ၂၂ ရက် နံနက် ၃ နာရီ ၃၀ မိနစ်ဝန်းကျင်က ပြိုကျခဲ့ခြင်းဖြစ်ကာ ရေမဆေးကျောက်ရှာဖွေသူ (၅၀) ကျော်ပျောက်ဆုံးနေပြီး အလောင်းများ မြေကြီးအောက်ပိနေပြီး ပုပ်မှသာပေါ်လာနိုင်သည့်အခြေအနေဖြစ်ကြောင်း သိရသည်။
ဖားကန့်မြို့နယ်တွင် ရေမဆေးကျောက်ရှာဖွေသူများ နှစ်စဉ်မြေစာပုံပြိုကျမှုကြောင့် သေဆုံးမှုများရှိနေပြီး၊ ၂၀၂၀ ခုနှစ် ဇူလိုင်လ ၂ ရက် နံနက် ၆ နာရီ ၃၀ မိနစ်ဝန်းကျင်က ဖားကန့်မြို့နယ်၊ ဆိပ်မူကျေးရွာအုပ်စု၊ ဝှေခါကျေးရွာ ရပ်ကွက်(၆)၊ လခူးချောင်ရှိ ကျောက်မျက်ရွှေပြည်ကုမ္ပဏီ(ဒေသအခေါ် တစ်သုံးလုံး ကုမ္ပဏီ)၌ ကျင်းကမ်းပါး မြေပြိုမှုဖြစ်ပွားခဲ့ပြီး ရေမဆေးကျောက် ရှာဖွေသူ ၁၆၉ ဦးသေဆုံးခဲ့ပြီး ၄၃ ဦးဒဏ်ရာရရှိခဲ့ကြသည်။
Red News Agency