RNA_ဧပြီ(၂)၊၂၀၂၅ခုနှစ်။
တရုတ်နိုင်ငံကြက်ခြေနီအသင်းမှ မြန်မာနိုင်ငံ ငလျင်ဘေးသင့်ပြည်သူများအတွက် ထောက်ပံ့ရေးပစ္စည်းများသယ်ဆောင်လာသည့် ယာဉ်တန်း (၉) စီးအား စစ်ကောင်စီတပ်မှ ပစ်ခတ်ခဲ့သည်ဟု စစ်ကောင်စီသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဝန်ခံထားသည်။
မြန်မာနိုင်ငံ ငလျင်ဘေးသင့်ပြည်သူများအတွက် တရုတ်နိုင်ငံကြက်ခြေနီ အသင်းမှ ထောက်ပံ့ရေးပစ္စည်းများသယ်ဆောင်လာသော ယာဉ်တန်းကို ဧပြီလ ၁ ရက်နေ့ ည ၉ နာရီ ၂၁ မိနစ်ခန့်က မန္တလေးမြို့သို့အသွား နောင်ချိုမြို့နယ် အုမ္မတီးကျေးရွာတွင် စစ်ကောင်စီတပ်က စက်လက်သေနတ်ဖြင့် ပစ်ခတ်ခဲ့သည့်အတွက် နောင်ချိုမြို့သို့ ပြန်လည်ဆုတ်ခွါခဲ့ရသည်ဟု TNLA က ထုတ်ပြန်ထားသည်။
“ဒီယာဉ်တန်းကို တွေ့တဲ့အခါမှာ တားဆီးပါတယ် တားဆီးလို့ မရပါဘူး။ မီတာ ၂၀၀ လောက်အကွာလောက်တိုင် မီးထိုးပြီးတားဆီးတယ် တားဆီးလို့ မရဘူး မီတာ ၁၀၀ လောက်အကွာမှာတော့ ကျွန်တော်တို့ မိုးပေါ်ထောင်ပြီး သေနတ် ၃ ချက်ဖောက်ခဲ့တယ်လို့ သိရပါတယ်။ ဒါနဲ့ နောင်ချိုဘက်ကို ပြန်သွားတယ်လို့ အကြမ်းဖျင်းသိရပါတယ်” ဟု ဗိုလ်ချုပ်ဇော်မင်းထွန်းက ပြောကြားထားသည်။
စစ်ကောင်စီထံ သတင်းပေးပို့ခဲ့ပြီး မန္တလေးဘက် ခရီးဆက်ချိန် ပစ်ခတ်ခံရသည့်အတွက် နောင်ချိုဘက် ပြန်ဆုတ်ခဲ့ရသော တရုတ်နိုင်ငံကြက်ခြေနီ အသင်းမှ ယာဉ်တန်း(၉)စီးအား တအာင်းတပ်မတော် TNLA မှ ကာကွယ်စောင့်ရှောက်ပေးထားပြီး ၎င်းတို့လိုရာခရီးကို ဆက်လက်ပို့ဆောင်သွားမည်ဟု TNLA ၏ထုတ်ပြန်ချက်တွင် ဖော်ပြထားသည်။
#RedNewsAgency #REDNEWS #RNA #Earthquake2025 #earthquake #Myanmar