စစ်ကိုင်း ဗလီ ၃ လုံးပြိုကျမှုအတွင်း အစ္စလာမ်ဘာသာဝင် ၂၄၀ ခန့် သေဆုံးနိုင်

စစ်ကိုင်းမြို့ရှိ ဗလီ ၃ လုံး ငလျင်လှုပ်ခဲ့သည့်နေ့က ပြိုကျမှုအတွင်း အစ္စလာမ်ဘာသာဝင် ၂၄၀ ခန့် သေဆုံးနိုင်ပြီး စစ်ကိုင်းမြို့တွင် အလောင်း ၃၀၀ ကျော် ရှာဖွေတွေ့ရှိထားပြီဟု ရှာဖွေကယ်ဆယ်ရေးလုပ်သူများနှင့် ဒေသခံများထံမှ သိရသည်။

အစ္စလာမ်ဘာသာဝင်များ၏ နေ့ထူးနေ့မြတ် သောကြာ (ဂျူမူအာဟ်) စုပေါင်းဝတ်ပြုနေကြချိန် မတ်လ ၂၈ ရက်နေ့ မွန်းလွဲ ၁ နာရီတွင် ရစ်ချ်တာစကေး ၇ ဒသမ ၇ အဆင့်ရှိ အင်အားပြင်း မြေငလျင်လှုပ်ခတ်ခဲ့သည့်အတွက် စစ်ကိုင်းမြို့မှ မြို့မဗလီ၊ မြို့တော်ဗလီနှင့် မိုယ်းကျဂျာမေ့အ်ဗလီတို့ ပြိုကျခဲ့ရသည့်အတွက် ဝတ်ပြုဆုတောင်းနေကြသည့် အစ္စလာမ်ဘာသာဝင်များ အသက်ဆုံးရှုံးခဲ့ရခြင်းဖြစ်သည်။

ရာသီဥတုပူပြင်းနေသည့်အတွက် စစ်ကိုင်းမြို့ ငလျင်ဘေးကြောင့် ပြိုကျပျက်စီးနေသည့် အဆောက်အဦများအတွင်းမှ အပုတ်နံ့များပါ ထွက်နေပြီဖြစ်ကြောင်း၊ ကယ်ဆယ်ရေးလုပ်ငန်းများကို ဆက်လက်လုပ်ဆောင်နေကြသော်လည်း ပိတ်မိနေသူများမှာ ၇၂ နာရီကျော်ပြီဖြစ်သည့်အတွက် မသေဆုံးသင့်သော်လည်း သေဆုံးသူများရှိနိုင်သည်ဟု ဒေသခံများထံမှ သိရသည်။

မန္တလေးဘက်မှ စစ်ကိုင်းဘက် ကူညီကယ်ဆယ်ရေးသွားသူများကို စစ်ကိုင်းတံတားရှိ စစ်ကောင်စီ၏ စစ်ဆေးရေးဂိတ်မှ အစစ်အဆေးကြမ်းပြီး ကယ်ဆယ်ရေးလုပ်မည့်သူများ ခွင့်ပြုချက်ပါမှ (အစီအမံဖြင့် ညွန်ကြားသည့်နေရာများသာ) သွားရမည်ဟု ပြောကြားမှုများရှိကြောင်း ကိုယ်တိုင်ကြုံတွေ့ခဲ့ရသည့် ကူညီကယ်ဆယ်ရေးသမားတစ်ဦးက ပြောပြထားသည်။