RNA_ဇွန်(၁၂)၊၂၀၂၄ ခုနှစ်။
စစ်ကိုင်းတိုင်း၊ မုံရွာမြို့၊ မုံရွာ – ရေဦး အဝေးပြေးလမ်းမကြီး အနီးရှိိ စစ်ကောင်စီ၏ အနောက်မြောက်တိုင်းစစ်ဌာနချုပ် (နမခ) နှင့် တစ်မိုင်ခန့်ဝေးသည့် ကာကင်းစခန်းအား ဒေသခံတော်လှန်ရေးအင်အားစုများက ဝင်တိုက်ခိုက်သည့်အတွက် စစ်ကောင်စီလက်အောက်ခံ (၂၀)ခန့်သေဆုံးပြီး ၅ ဦးအရှင်ဖမ်းမိကြောင်း စစ်ကိုင်းတိုင်းပြည်သူ့ကာကွယ်ရေးအဖွဲ့ – ပကဖ ထံမှ သိရသည်။
စစ်ကောင်စီ၏ နမခအား ဇွန်လ ၁၁ ရက်နေ့က ညနေ ၅ နာရီခန့်က ယင်းမာပင်မြို့နယ် ပကဖ ( ULF စစ်ကြောင်းမှုး ) ဦးစီးသော ကာကွယ်ရေးတပ်ဖွဲ့များက မိနစ် ၃၀ ခန့်တိုက်ခိုက်ပြီး ကာကင်းစခန်းအား သိမ်းပိုက်နိုင်ခဲ့ကြောင်း၊ စစ်ကောင်စီတပ်သား အများအပြားထွက်ပြေးကြကြောင်း၊ သုံ့ပန်း ၅ ဦးနှင့် လက်နက်ငယ် ၉ လက်၊ ကွန်မန်ဒို စိန်ပြောင်း ၁ လက်၊ ၆၀ မမ ၅ လုံး၊ 79 အသီး ၂ လုံး၊ 5.56 ကျည် ၁၃၃၀ တောင့် သိမ်းဆည်းရမိခဲ့ပြီး နမခမှ အင်အား ၁၀ ခန့် စစ်ကူလာနေသည့်အတွက် တော်လှန်ရေးအင်အားစုများ ပြန်ဆုတ်ခဲ့ကြောင်း သိရသည်။
အင်အား ၄၀ခန့် တပ်စွဲထားသော နမခ ကာကင်းစခန်းအား ယင်းမာပင်မြို့နယ် တိုက်နယ် ၁ ပကဖအဖွဲ့ဝင်များ၊ ကနီမြို့နယ် တိုက်နယ် ၅ ပကဖ အဖွဲ့၊ ယင်းမာပင်ခရိုင် တပ်ရင်း ( ၁၇ ) B21 PDF၊ ယင်းမာပင်ခရိုင် ဗျူဟာ အမှတ် ( ၄၅ ) KLG PDF ယင်းမာပင်ခရိုင် တပ်ရင်း ( ၃၅ ) PDA၊ ကျောင်းသားလက်ရုံးတပ်တော်၊ မုံရွာခရိုင်တပ်ရင်း (၁၃) Aung San Generation၊ မုံရွာခရိုင် တပ်ရင်း (၁၄)၊ ချင်းတွင်း Brother LPDF၊ ဘုတလင် Mobile team စသည့် တော်လှန်ရေး တပ်ဖွဲ့များက တိုက်ခိုက်ခဲ့ကြကြောင်း ထုတ်ပြန်ချက်တွင် ဖော်ပြထားသည်။
#RedNewsAgency