RNA_ဖားကန့်၊ စက်တင်ဘာ (၁၅)၊ ၂၀၂၃ ခုနှစ်။
ကချင်ပြည်နယ်၊ ဖားကန့်မြို့၊ မော်ဝမ်းရပ်ကွက်ရှိ “ဧရာမြင်းမိုရ်” အပေါင်ဆိုင်နှင့် ဆိုင်ကယ်နှင့်အပိုပစ္စည်းအရောင်းဆိုင်ပိုင်ရှင် ဦးညီသည် ယနေ့နံနက် (၁၀)နာရီ (၃၀) မိနစ်ဝန်းကျင်က အမည်မသိလက်နက်ကိုင်တစ်စုက သေနတ်ဖြင့် ပစ်ခတ်သွားကြောင်း သိရသည်။
“ပစ်ခံရတာက မော်ဝမ်း ဇောတိကကုန်း လမ်းဆုံနားမှာပါ၊ ကိုညီက ကားမှန်ချပြီးမောင်းလာတာ၊ ဆိုင်ကယ်နဲ့လူနှစ်ယောက်က ကားထဲကိုလှမ်းပစ်ပြီး ပြေးတာ” ဟု မျက်မြင်တွေ့သူတဦးက ပြောသည်။
မိသားစုနှင့် နီးစပ်သူ တဦးကလည်း “သေနတ်ဒဏ်ရာနဲ့ ကားဆက်မောင်းလာပြီး စာတိုက်ရှေ့ သူ့ဆိုင်နားမှာ ကားပြန်ကွေ့တဲ့အချိန် နောက်က ကားနဲ့ပွတ်မိတယ်၊ အဲ့အနားကလူတွေက ကိုညီဘာဖြစ်သွားသေးလဲ သွားကြည့်မှ သွေးတွေအိုင်နေတာ၊ လက်မောင်းထိသွားတယ်ပြောတယ်၊ ဆေးရုံပို့ထားတယ်၊ အသက်အန္တရာယ်မစိုးရိမ်ရဘူး၊ သတိရပြီလို့ပြောတယ်” ဟု ပြောသည်။
ဖားကန့်မြို့သည် စစ်ကောင်စီလက်အောက်ခံ သတင်းပေးရှင်းသည့် လုပ်ငန်းစဉ်များ၊ စီးပွားရေးအရ အပေးအယူမမျှမှုများကြောင့် ဖြစ်ပေါ်လာသည့် လူသတ်မှုများ၊ အကြောင်းအရာ ရှင်းလင်းစွာမသိရသည့် အမည်မသိလက်နက်ကိုင်များ၏ ပစ်ခတ်သတ်ဖြတ်မှုများ မကြာခဏ ဖြစ်ပေါ်လေ့ရှိသော ဒေသတစ်ခုဖြစ်သည်။
#RedNewsAgency