RNA_ဧပြီ(၇)၊၂၀၂၃ ခုနှစ်။
မြစ်ကြီးနားထောင်တွင် မတရားဖမ်းဆီးချုပ်နှေင်ခံထားရသည့် ကချင်နှစ်ခြင်းခရစ်ယာအဖွဲ့ချုပ် – KBC အကြံပေး သိက္ခာတော်ရ ဆရာတော် ဒေါက်တာ ခလမ်ဆမ်ဆွန်ကို စစ်ကောင်စီလက်အောက်ခံတရားရုံးမှ ယနေ့ ထောင်ဒဏ် (၆) နှစ် ချမှတ်လိုက်ကြောင်း မိသားစုဝင်များနှင့် နီးစပ်သူထံမှ သိရသည်။
အမိန့်ချမှတ်ခဲ့သော ယနေ့သည် ခရစ်ယာန်ဘာသာဝင်များအတွက် နေ့ထူးနေ့မြတ်ဖြစ်သည့် မဟာသောကြာကြီး (Good Friday) နေ့ဖြစ်ကြောင်း၊ သခင်ခရစ်တော်ကို မတရား ကားစင်တင်ခံရန် အမိန့်ချသည့်နေ့မှာသိက္ခာ တော်ရဆရာတော် ဒေါက်တာခလမ်ဆမ်ဆွန်ကို ထောင်ဒဏ်ချမှတ်သည်မှာ စစ်ကောင်စီ၏ ဘာသာရေးနှင့်လူမျိုးရေး အငြိုးအတေးဖြစ်ကြောင်း ခရစ်ယာန်ဘာသာဝင်တဦးက ပြောသည်။
” Good Friday နေ့မှာ Rev. Dr. Hkalam Sam Son ကို အပြစ်မဲ့ ထောင်ဒဏ် ၆ နှစ်ပေးခြင်းသည် မည်မျှဆိုးရွား သောအစိုးရဖြစ်ခြင်းကို ဖော်ပြနေခြင်းသာဖြစ်သည်။ ဘုရားသခင် ကယ်ထုတ်ပေးဖို့ ဆက်ဆုတောင်းကြရအောင်” ဟု Free Rev.Dr.Hkalam Samson Facebook Page တွင် ဇနီးဖြစ်သူ၏ ငိုကြွေးနေသည့်ပုံနှင့်တကွ တင်ပြထားသည်။
၂၀၂၂ ခုနှစ် ဒီဇင်ဘာလ (၅) ရက်နေ့က ဒေါက်တာ ခလမ်ဆမ်ဆွန်သည် ထိုင်းနိုင်ငံသို့သွားရန် မန္တလေးလေဆိပ်တွင် စောင့်ဆိုင်းနေချိန် စစ်ကောင်စီလက်အောက်ခံများက ဖမ်းဆီးခဲ့ပြီး၊ ဒီဇင်ဘာလ ၂၈ ရက်နေ့တွင် မြစ်ကြီးနားမြို့နယ် အမှတ် (၁)ရဲစခန်းတွင် မတရားအသင်းအက်ဥပဒေ ပုဒ်မ ၁၇ (၁) ဖြင့် အမှုဖွင့်ကာ မြစ်ကြီးနားအကျဉ်းထောင်တွင် ချုပ်နှောင်ထားခဲ့ရာ ယနေ့ ထောင်ဒဏ် (၆) နှစ် ချမှတ်ခံရခြင်း ဖြစ်သည်။
#RedNewsAgency