RNA_မတ် (၂၄)၊၂၀၂၃ ခုနှစ်။
ရန်ကုန်၊ သန်လျင်မြို့နယ် အမှုထမ်းရပ်ကွက်၊ ဖွံ့ဖြိုးရေးလမ်းဆုံအနီး ယနေ့ (မတ်လ ၂၄ရက်) မွန်းလွဲပိုင်းက စစ်ကောင်စီထောက်ခံသူလည်းဖြစ် နည်းပညာဆိုင်ရာနှင့်ဥပဒေပိုင်းဆိုင်ရာကျွမ်းကျင်သူ အဖြစ်လူသိများသည့် ဦးမင်းတေဇညွန့်တင် သေနတ်ဖြင့် (၁၀)ချက်ထက်မနည်း အပစ်ခတ်ခံရပြီး သေဆုံးခဲ့ကြောင်း သိရသည်။
အဆိုပါ ပစ်ခတ်မှုကို မြို့ပြပြောက်ကျားအဖွဲ့တစ်ခုဖြစ်တဲ့ Urban Owls မှ လုပ်ဆောင်ခဲ့ခြင်းဖြစ်ကြောင်း ၎င်းအဖွဲ့က ထုတ်ပြန်ခဲ့သည်။
ဦးမင်းတေဇညွန့်တင်သည် စစ်ကောင်စီ၏ အာဏာသိမ်းမှုအား ပေါ်ပေါ်တင်တင်ထောက်ခံရုံသာမက စစ်ကောင်စီနှင့်အကျိုးတူစီးပွားရေးများစွာကို လုပ်ကိုင်ဆောင်ရွက်နေသူဟု သိရပြီး လက်ရှိတွင် ထားဝယ်အထူးစီးပွားရေးဇုန်တွင်လည်း ဥပဒေရေးရာကော်မတီဝင်တဦးဖြစ်သည်။
ပြည်သူလူထုအပေါ် နေ့စဉ်ရက်ဆက် တိုက်လေယာဉ်များဖြင့် ဗုံးကြဲနေသော အကြမ်းဖက်လေတပ်ကိုဦးစီးသည့် စစ်တပ်၏ လေတပ်ချုပ်ဟောင်းဖြစ်သူ ဗိုလ်ချုပ်ကြီးမြတ်ဟိန်း (လက်ရှိ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ ဒုတိယဥက္ကဌ) နှင့် အလွန်ရင်းနှီးသူဖြစ်ကြောင်း၊ စစ်တပ်အာဏာသိမ်းမှုကိုထောက်ခံပြီး စစ်ကောင်စီအကျိုးစီးပွား ကာကွယ်ပေးနေသူဖြစ်ကြောင်းသိရသည်။
#RedNewsAgency