RNA_အောက်တိုဘာ(၁၈)၊၂၀၂၂ခုနှစ်။
မကွေးတိုင်း၊ ပေါက်မြို့နယ် တောင်ပိုင်း၊ သစ်ညီနောင်ရွာနေ ဆရာဦးစောထွန်းမိုး (ပညာမိုးဘော်ဒါအုပ်)ကို စစ်ကောင်စီတပ်သားများက လူမဆန်စွာ ရက်ရက် စက်စက် ခေါင်းဖြတ်သတ်ဖြတ်ခံရသည့် အတွက် အထူးဝမ်းနည်းကြောင်း NUG ပညာရေးဝန်ကြီးဌာနက ယနေ့ ထုတ်ပြန်ထားသည်။
ဆရာဦးစောထွန်းမိုးသည် အမှန်တရားနှင့် တရားမျှတမှု ရရှိနိုင်ရေးအတွက် အာဏာဖီဆန်လှုပ်ရှားမှု (CDM) တွင်ပါဝင်ခဲ့သည့်အပြင် ကြားကာလပညာရေးကို အကောင် အထည်ဖော်ဆောင်ရွက် ပေးနေသော ဆရာတစ်ဦးဖြစ်ကြောင်း၊ ဆရာဦးစောထွန်းမိုး ကဲ့သို့သော နွေဦးတော်လှန်ရေးတွင် အကြမ်းဖက်စစ်အာဏာ ရှင်၏ လူမဆန်စွာရက်စက် ကြမ်းကြုတ်မှုများကို ခုခံတော်လှန်ရင်း ကျဆုံးခဲ့ရသောဆရာများကို မော်ကွန်းဝင်တော်လှန် ပညာသူရဲကောင်းများ အဖြစ်မှတ်တမ်းတင် အလေးအမြတ်ပြုထားပါသည်ဟု ထုတ်ပြန်ချက်တွင် ဖော်ပြထားသည်။
အောက်တိုဘာ (၁၇) ရက်နေ့က ပေါက်မြို့နယ် တောင်ပိုင်း၊ တောင်မြင့်ရွာတွင် ဆရာ ဦးစောထွန်းမိုးအား အကြမ်းဖက်စစ်ကောင်စီက ဖမ်းဆီးပြီး တောင်မြင့်ရွာတွင် ဦးခေါင်းနှင့် ခြေလက်များကို အပိုင်းပိုင်းဖြတ်၍ ရက်ရက်စက်စက် သတ်ဖြတ်သွားသည့်အပြင် တောင်မြင့်ရွာ၊ အလယ်တန်းကျောင်း တံခါးတွင် ဆရာဦးစောထွန်းမိုး၏ ဦးခေါင်းကို လူမဆန်စွာ ချိတ်ဆွဲထားခဲ့သည်။
” အာဏာသိမ်းစစ်ကောင်စီသည် ကျေးရွာများကို မီးရှို့၊ ဓါးပြတိုက်နေသည့်အပြင် ရွာသားများကို အကြမ်းဖက် နှိပ်စက် သတ်ဖြတ်ခြင်း၊ ကျေးရွာစာသင်ကျောင်းများကို မီးရှို့ခြင်းများလုပ်ဆောင်နေသည့်အပြင် ကြားကာလပညာရေးကို အကောင် အထည်ဖော်နေသည့် ရဲဝံ့စွန့်စား စီဒီအမ်ဆရာများနှင့် အပြစ်မဲ့ကျောင်းသား၊ ကျောင်းသူကလေးသူငယ်များအား လူမဆန်စွာ သတ်ဖြတ်နေခြင်းကို ပညာရေးဝန်ကြီးဌာနက ပြင်းထန်စွာရှုံ့ချသည်” ဟု ထုတ်ပြန်ချက်တွင် ဖော်ပြထားသည်။
Red News Agency