RNA_ဒီဇင်ဘာ(၁၄)၊၂၀၂၂ခုနှစ်။
ရှမ်းပြည်နယ်မြောက်ပိုင်း၊ TNLA တပ်မဟာ(၂) စစ်ဒေသ၊ နမ့်ဆန်မြို့နယ်၊ ကုန်းသာ(ရဝ်ဘြာန်း) ကျေးရွာဝန်းကျင်တွင် ဖြစ်ပွားခဲ့သည့် တိုက်ပွဲအတွင်း စစ်ကောင်စီဘက်က ၅၀ ဝန်းကျင်သေဆုံးပြီး ၂၇ ဦး အရှင်ဖမ်းခံခဲ့ရကြောင်း သိရသည်။
စစ်ကောင်စီတပ် အင်အားအများအပြားနှင့် လေကြောင်း ပစ်ကူ၊ လက်နက်ကြီးပစ်ကူများ အပါအဝင် ကုန်းသာကျေးရွာ ဝန်းကျင်မှာ TNLA နှင့် ဒီဇင်ဘာ (၇) ရက်နေ့ နေ့လည်မှစတင်ကာ ဒီဇင်ဘာလ (၁၁) ရက်နေ့အထိ တိုက်ပွဲပြင်းထန်ခဲ့ကြောင်း၊ ဒီဇင်ဘာ ၁၂ ရက်နေ့မှာ တိုက်ပွဲဖြစ်ပွားမှု မရှိပေမဲ့ စစ်ကောင်စီတပ် လေကြောင်းမှတဆင့် ပျံသန်းကြည့်ရှုမှုများရှိကြောင်း သိရသည်။
” တိုက်ပွဲကြီး အောင်မြင်စွာပြီးဆုံး စကစ အလောင်း ၄၇ လောင်း အရှင်ဖမ်းဆီးထားသူ ၂၇ ဦးရှိ အကုန်သေးဘူး ကောက်တုန်း” ဟု TNLA ရဲဘော်တဦးက လူမှုကွန်ယက်တွင် ရေးသားထားသည်။
ဒီဇင်ဘာလ (၇) ရက်နေ့မှစပြီး စစ်ကောင်စီတပ် လေကြောင်းအသုံးပြု တိုက်ပွဲစတင်ခဲ့သည့်အတွက် ကုန်းသာ ကျေးရွာသူ ရွာသား ကလေးငယ်များအပါအဝင် ထွက်ပြေးတိမ်းရှောင်ခဲ့ရသူ (၄၀) ကျော်မှာ တောတွင်း (၈) ရက်ကြာ ပိတ်မိနေပြီး ယနေ့ ကျေးရွာသို့ ပြန်လည်ရောက်ရှိလာပြီဖြစ်ကြောင်း၊ စစ်ကောင်စီတပ်၏ လေကြောင်း ပစ်ခတ်မှုကြောင့် ကုန်းသာရွာတွင်း နေအိမ်တချို့ မီးလောင်ဆုံးရှုံးခဲ့ရကြောင်း သိရသည်။
#RedNewsAgency