RNA_နိုဝင်ဘာ(၁၀)၊၂၀၂၃ ခုနှစ်။
မကွေးတိုင်း၊ ရေစကြိုမြို့၊ စစ်ကောင်စီလက်အောက်ခံ ငြိမ်းဇာနီတပ်စခန်း (စစ်မှုထမ်းဟောင်းရုံး) အား ဒေသခံ ပူးပေါင်းတပ်ဖွဲ့က ယနေ့ နံနက် ၉ နာရီဝန်းကျင်မှစတင်တိုက်ခိုက်ရာ ၂ နာရီနီးပါး တိုက်ပွဲဖြစ်ပွါးခဲ့ကြောင်း သိရသည်။
“တိုက်ပွဲကြာချိန် ၂နာရီခန့်ကြာမြင့်ခဲ့ပြီး စခန်းသိမ်းနိုင်ရန် အလိုတွင် ရုံးပေါင်းစုံမှ စစ်ကူလာသော စစ်ကူများအား ကြားဖြတ်တိုက်ခိုက်မှုမှာ ရေရှည်တေဋင့်မခံနိုင်သောကြောင့် တိုက်ခိုက်မှုအပိုင်းမှ ရဲဘော်များအနေဖြင့် ရင်နာနာဖြင့်ပြန်လည်ဆုတ်ခွါပေးခဲ့ရသည်” ဟု Myingyan Black Tiger (MBT) က ထုတ်ပြန်ထားသည်။
ငြိမ်းဇာနီတပ်စခန်း (စစ်မှုထမ်းဟောင်းရုံး) တိုက်ခိုက်မှုကို Myingyan Black Tiger (MBT)၊ YSO TPG မြို့ပြပြောက်ကျားတပ်ဖွဲ့၊ Popa Production & Guerilla Force (PPGF)၊ မြောင်တပ်ပေါင်းစု၊ Thway Thauk Revolution Force တို့ ပူးတွဲဖော်ဆောင်ခဲ့ကြောင်း သိရသည်။
နံနက်ပိုင်းတိုက်ပွဲတွင် စစ်ကောင်စီလက်အောက်ခံများ ထိခိုက်သေဆုံးမှုရှိနိုင်ကြောင်း၊ MBTတပ်ဖွဲ့မှ ရဲဘော် ၂ဦး ထိခိုက်ဒဏ်ရာရရှိခဲ့ကြောင်း၊ ညနေ (၃)နာရီ (၁၅) မိနစ်ဝန်း ကျင်တွင် ရေလယ်ကျွန်းနှင့်မြောင်ဒေသ တစ်နေရာအား နာရီဝက်ခန့် စစ်ကောင်စီတပ်မှ လေကြောင်း ပစ်ခတ်မှု ပြုလုပ်ခဲ့ရာ MBTတပ်ဖွဲ့မှ ရဲဘော်တစ်ဦးအပါအဝင် အခြားထိခိုက်ဒဏ်ရာရမှုလည်းရှိကြောင်း ထုတ်ပြန်ချက်တွင် ဖော်ပြထားသည်။
#RedNewsAgency