RNA_စက်တင်ဘာ(၂၉)၊၂၀၂၆ခုနှစ်။
မလေးရှားအစိုးရက ဖမ်းဆီးထိန်းသိမ်းထားသည့် မြန်မာနိုင်ငံသားများအား စစ်အုပ်စုထံ ပြန်လည်လွှဲပြောင်းပေးနေမှုကို ချက်ချင်းရပ်တန့်ရန် တောင်းဆိုကြောင်း လူ့အခွင့်အရေးဆိုင်ရာ အာဆီယံအမတ်များ (APHR) က ယနေ့ (စက်တင်ဘာ ၂၉ ရက်) ထုတ်ပြန်ထားသည်။
ယနေ့နံနက်ပိုင်း၌ ပီရတ် (Perak) ပြည်နယ် လူမွတ် (Lumut) ဆိပ်ကမ်းမှတဆင့် မြန်မာနိုင်ငံသား (၁၅၀၀) အား စစ်အုပ်စုထံ လွှဲပြောင်းပေးမှုလုပ်ငန်းစဉ်များကို မလေးရှားအစိုးရ တာဝန်ရှိသူများက စတင်လုပ်ဆောင်နေမှုအပေါ် နေရပ်ပြန်ပို့ခံရသူများအတွက် ဘေးကင်းလုံခြုံမှုရှိမှသာ နေရပ်ပြန်ပို့ရန် APHR က တောင်းဆိုခဲ့ခြင်း ဖြစ်သည်။
စစ်အုပ်စုနှင့် သဘောတူညီမှုရထားသည့် မလေးရှားအစိုးရမှ နေရပ်ပြန်ပို့မည့် မြန်မာနိုင်ငံသား (၅၀၀၀) ထဲမှ ယခု ပထမဆုံးအသုတ်အဖြစ် (၁၅၀၀) ကို ပြန်ပို့ခဲ့ခြင်းဖြစ်ပြီး စစ်အုပ်စုက စစ်သင်္ဘော (၂) စင်း၊ ဆေးဘက်ဆိုင်ရာ စစ်သင်္ဘော (၁) စင်းတို့ဖြင့် ပြန်လည်ခေါ်ဆောင်ခဲ့ခြင်းဖြစ်သည်။
မလေးရှားထိန်းသိမ်းရေးစခန်းများ၌ ဖမ်းဆီးခံထားရသည့် မြန်မာနိုင်ငံသားများ နေရပ်ပြန်ပို့ခံရမှု အစီအစဉ်သည် ၎င်းတို့၏ သဘောဆန္ဒအလျောက်မဟုတ်ဘဲ ဖိအားပေးခံရခြင်းများကြောင့်သာဖြစ်ကြောင်း မလေးရှားလွှတ်တော်အမတ်ဟောင်းနှင့် APHR ပူးတွဲဥက္ကဋ္ဌ Charles Santiago က ပြောသည်။
ယခုကဲ့သို့ နေရပ်ပြန်ပို့ခံရမှုဖြစ်စဉ်သည် စက်တင်ဘာ (၂၈) ရက်က အရပ်သားပြည်သူ အစုလိုက်အပြုံလိုက် သေဆုံးစေခဲ့သည့် ကျောက်တော်မြို့ရှိ အိန္ဒိယဈေးကို စစ်အုပ်စုလေကြောင်းတိုက်ခိုက်မှုဖြစ်ရပ်အပြီး နောက်တစ်ရက်၌ မလေးရှားက မြန်မာနိုင်ငံသားများကို နေရပ်ပြန်ပို့ခဲ့ခြင်းဖြစ်ကြောင်း APHR က ဆိုသည်။
အတင်းအကျပ် နေရပ်ပြန်ုပို့ခံရသူများသည် စစ်အုပ်စု၏ အဓမ္မစစ်မှုထမ်းတပ်သားသစ် စုဆောင်းခံရမှုများနှင့် ကြုံတွေ့နိုင်ပြီး နိုင်ငံတွင်း တိုက်ပွဲများပြင်းထန်နေချိန် ယခုကဲ့သို့ ပြန်ပို့ခံရမှုသည် ၎င်းတို့အတွက် ဘေးကင်းလုံခြုံမှု မရှိနိုင်ကြောင်း၊ နိုင်ငံတကာဥပဒေများအရ ညှင်းပန်းနှိပ်စက်မှု သို့မဟုတ် ဘေးကင်းလုံခြုံမှုမရှိသည့် ဒေသသို့ အတင်းအကျပ် နေရပ်ပြန်ပို့မှုများကို တားမြစ်ထားကြောင်း၊ မလေးရှားအစိုးရသည် ဒုက္ခသည်များဆိုင်ရာထုံးတမ်းဥပဒေများကို ချိုးဖောက်နေကြောင်း APHR က ထောက်ပြထားသည်။