ဧပြီလ ပထမအပတ်မှာ ” အမျိုးသားညီညွတ်ရေးအစိုးရ”ဖွဲ့မယ်လို့ ကြေညာထားတဲ့ CRPH အနေနဲ့ အခုအချိန်ထိ(ဧပြီ ၈ရက်) အမျိုးသားညီညွတ်ရေးအစိုးရကို မကြေညာနိုင်သေးတာကို တွေ့ရပါတယ်ခင်ဗျား။
တပတ်ထက်ပိုနောက်ကျရုံနဲ့ အပြစ်ပြောလို့ရမလားလို့ စောဒကတက်ရင် ကျနော်ရှင်းပြပါမယ်။ခု ဧပြီလမှာ တပတ်နောက်ကျတာကို ကြည့်လို့မရပါဘူး။မင်းအောင်လှိုင် အာဏာစသိမ်းတဲ့ ဖေဖော်ဝါရီ တစ်ရက်နေ့ကစရင် နှစ်လကျော်နောက်ကျနေပါပြီ။
စစ်တပ်က အာဏာသိမ်းပြီဆိုတာနဲ့ စစ်အုပ်စုကို တော်လှန်မယ့်အင်အားစုတွေအကုန်လုံး ရတန်သလောက် ချိတ်ဆက်မိဖို့ ကြိုးစားကြရတယ်ဆိုတာ လူတိုင်းသိပြီးသားပါ။ရန်သူကလည်း သိပါတယ်။ကိုယ့်အချင်းချင်း ချိတ်မိပြီးတာနဲ့ NUCC လို အလားတူ ပြည်ထောင်စုအဆင့်ကော်မတီတရပ်ကို အလျင်အမြန်ဖွဲ့ဖို့လိုပါတယ်။ဒီနေရာမှာ မူချင်းတူဖို့တော့လိုအပ်ပါလိမ့်မယ်။မူမတူရင် ပေါင်းလည်း ခဏပဲ၊မကြာခင် ပြန်ကွဲတတ်ကြလို့ လူမျိုးစုတွေနဲ့ ကျန်တဲ့ဒီမိုကရက်အင်အားစုတွေက CRPH ကို မူအရင်ညှိနှိုင်းဖို့ တိုက်တွန်းကြပုံရပါတယ်။
ဒီအခါမှာလည်း “၂၀၀၈ ဖွဲ့စည်းပုံလုံးဝဖျက်သိမ်းရေး”မူကို CRPH က တော်တော်နဲ့ လက်မခံလို့ အချိန်ကြာနေရတာပါ။၂၀၀၈ခြေဥဖျက်သိမ်းရေးကို ရှေ့နှစ်လက ဘာလို့ မထုတ်ပြန်တာလဲဆိုတာ အစပြန်ကောက်ရရင် “ခြေဥကိုဖျက်လိုက်တာနဲ့ ၂၀၂၀ရွေးကောက်ပွဲရလာဒ်ကို မေးခွန်းထုတ်စရာဖြစ်လာမှာစိုးလို့”ဆိုတဲ့ CRPH ရဲ့ စိုးရိမ်စိတ်ကြောင့် တွန့်ဆုတ်နေတာဖြစ်ပါတယ်။ဆိုတော့ကာ CRPH ဟာ ရွေးကောက်ပွဲရလာဒ်ပျက်ပြယ်သွားမှာကို အတော်လေး ကြောက်ရွံ့နေပုံရပါတယ်။လူထုထောက်ခံမှုဆိုတာ ရွေးကောက်ပွဲရလာဒ်တခုတည်းနဲ့ တိုင်းတာလို့မရဘူးဆိုတဲ့ သာမန်နိုင်ငံရေးအသိလောက်ကို သူတို့ဆီမှာ ခေါင်းပါးနေတာကို စိတ်မကောင်းဖွယ်တွေ့ရှိရပါတယ်။
နောက်တချက် CRPH အနေနဲ့ ထပ်ပြီးစိုးရိမ်နေတာက အရင် NLD အစိုးရဟောင်းရဲ့သက်တမ်း တရားဝင်ကုန်ဆုံးမယ့် မတ်လ ၃၁ရက်မတိုင်ခင်မှာ အစိုးရသစ်ထပ်မဖွဲ့သင့်ဘူးလို့ ထင်မြင်ယူဆ ကြောင့်ကြနေတာကြောင့်ဖြစ်တယ်။ဒီအချက်ကလည်း လုံးဝမှားယွင်းပြီး ရှေ့နောက်မညီတဲ့ အယူအဆတရပ်ဖြစ်ပါတယ်။
ထောက်ပြလိုတာက-(၁)NLD အစိုးရဟောင်းဆီက အာဏာကို စစ်အုပ်စုက အတင်းအဓမ္မလုယူသိမ်းပိုက်လိုက်တာဖြစ်လို့ ကိုယ့်ဘက်က အစိုးရသစ်တရပ် ချက်ချင်းအစားထိုးတာ တရားမျှတပါတယ်။
(၂)၂၀၀၈ခြေဥက သတ်မှတ်ထားတဲ့ သက်တမ်းတွေ၊ရက်အကန့်အသတ်တွေကို မကျော်လွှားနိုင်ပဲ အတိအကျနာခံနေတာ စစ်အုပ်စုအလိုကျလုပ်တာပဲ။
(၃)ကြားမှာ ယာယီအစိုးရဖွဲ့ပြီး CRPH အမတ်တချို့ ဝန်ကြီးတက်လုပ်တာတို့၊၈၈မျိုးဆက်ထဲက ခေါင်းဆောင်တချို့အပါအဝင် ကက်ဘိနက်အစည်းအဝေးခေါ်တာတို့လုပ်တာဟာ အမျိုးသားညီညွတ်ရေးအစိုးရအဆင့်ကိုမရောက်ဘဲ ကိုယ့်စိတ်ကြိုက်အစိုးရကိုယ်ထည်ကို အရင်တည်ဆောက်ပြီး မဟာမိတ်တွေအပေါ် လက်ဦးမှုယူတာဖြစ်တယ်။
အထက်ပါလုပ်ရပ်နဲ့ဖြစ်စဉ်တွေကို သုံးသပ်ကြည့်ရရင် CRPH ဟာ ရဲရဲတင်းတင်း မဆုံးဖြတ်ရဲတာနဲ့ မဟာမိတ်တွေအပေါ် ပြတ်ပြတ်သားသား မယုံကြည်ရဲတာတွေကို တွေ့ရပါတယ်။အစပိုင်းမှာ ၂၀၀၈ခြေဥကို နောက်မြီးဆွဲရင်း ၂၀၂၀ရွေးကောက်ပွဲရလာဒ်ကို အသေဆုပ်ကိုင်ဖို့ ကြိုးစားနေတာကိုတွေ့ရပါတယ်။နောက်ပိုင်းမှ လူမျိုးစုပါတီတွေနဲ့ လူမျိုးစုလက်နက်ကိုင်အင်အားတွေရဲ့ တိုက်တွန်းချက်အရရော၊ အထွေထွေသပိတ်ကော်မတီတွေရဲ့ ပြတ်သားတဲ့ ရပ်ခံချက်အရပါ “၂၀၀၈ ခြေဥဖျက်သိမ်းရေး”ကို စဉ်းစားလာတာဖြစ်တယ်။
ဒီလိုစဉ်းစားတဲ့အခါမှာလည်း တိကျတဲ့ညှိနှိုင်းမှုတွေလုပ်တာထက် သူတို့အဆင့်နေရာ အသာစီးယူရေးကို ပိုဦးစားပေးနေတာ ထင်ရှားပါတယ်။ထင်ရှားတဲ့သက်သေကတော့ ဖက်ဒရယ်ပြည်ထောင်စုပဋိညာဉ် အစိတ်အပိုင်း (၂)ကိုသာ သေချာလေ့လာကြည့်ရင် သိနိုင်ပါတယ်။ဗမာတွေအများစုနေထိုင်တဲ့ တိုင်းတွေကို အခြေခံပြီး များပြားလှတဲ့ မြို့နယ်တွေမှာ အနိုင်ရထားပြီးဖြစ်တဲ့ NLD လွှတ်တော်ကိုယ်စားလှယ်နေရာတွေကို တယောက်မကျန် ရယူထားချင်တာက တဖက်မှာ မမျှတဘဲ လူမျိုးစုများအတွက် တန်းတူရေးကင်းမဲ့နေစေပါတယ်။
တော်လှန်ရေးအကျိုးစီးပွားကိုလည်း ထိခိုက်စေပါတယ်။လူမျိုးစုတွေအတွက် de facto အရ အာဏာကျင့်သုံးခွင့်ကို လုံးဝပိတ်ပင်ထားတဲ့ ၂၀၀၈ ခြေဥအပေါ်မှာ အထိုင်ချစဉ်းစားပြီး ပဋိညာဉ်ရေးဆွဲထားသလို ဖြစ်နေတဲ့အတွက် ဒီအခင်းအကျင်းဟာ တော်လှန်ရေးအစိုးရတရပ်ပေါ်ပေါက်လာဖို့ အနှောင့်အယှက်တခုလို ဖြစ်နေစေပါတယ်။ကျနော့်အနေနဲ့ ဝေဖန်အကြံပြုလိုတာက အမျိုးသားညီညွတ်ရေးအစိုးရတရပ် အမြန်ဆုံးကြေညာဖို့ပဲဖြစ်ပါတယ်။
အဲ့ဒီလို ကြေညာတဲ့နေရာမှာ-(၁)စစ်အာဏာရှင်ဆန့်ကျင်တဲ့ အမျိုးသားညီညွတ်ရေးအစိုးရဟာ တော်လှန်တဲ့သဘောတရားကို ဆုပ်ကိုင်ပြီးဖွဲ့စည်းရမှာဖြစ်တယ်။ ရန်သူကို ပြတ်ပြတ်သားသား ဆန့်ကျင်တဲ့ အင်အားစုတွေနဲ့ စုစည်းတည်ဆောက်ရမယ်လို့ ပြောချင်တာဖြစ်တယ်။
(၂)တော်လှန်တဲ့အတွေးအခေါ်ကို ကိုင်ပြီဆိုကတည်းက ရန်သူကို လက်ဦးမှုရှိရှိ တော်လှန်ဖို့ အချိန်ဆိုင်းတာ၊ အချိန်ဆွဲတာ၊နှောင့်နှေးကြန့်ကြာတာ၊တွေဝေတွန့်ဆုတ်တာစတဲ့လက္ခဏာတွေ မဆောင်ရဘူး။ရဲရဲတင်းတင်း ပြတ်ပြတ်သားသားဖွဲ့ရမယ်။
(၃)မဟာမိတ်တွေအားလုံးကို ရသလောက်ကျယ်ကျယ်ပြန့်ပြန့်စုစည်းပြီး ပါဝင်စေရမယ်။ကိုယ့်အတွက် နေရာများများ စဉ်းစားလေလေ မဟာမိတ်နည်းလေလေပဲဖြစ်တယ်ဆိုတဲ့ သဘောတရားကို နားလည်ရမယ်။
(၄)တော်လှန်ရေးအစိုးရဖွဲ့တယ်ဆိုတာ ဗျူရိုကရက်တွေ စဉ်းစားသလို အာဏာကျင့်သုံးဖို့ သက်သက်စဉ်းစားရမှာမဟုတ်ဘူး။စစ်အာဏာရှင်စနစ်ကို တော်လှန်ဖို့ ပြည်သူကို ဦးဆောင်မှုကောင်းကောင်းပေးရမယ်။ ပြည်သူက ရှေ့ရောက်ပြီး အစိုးရက နောက်မြီးဆွဲလုပ်နေရင် အစိုးရကောင်းတရပ်မဟုတ်ဘူး။လူထုကြားမှာ အခြေစိုက်တဲ့ နိုင်ငံရေးသမားတွေကို အမျိုးသားညွှန့်ပေါင်းအစိုးရက တာဝန်အပြည့်အဝပေးပြီး တော်လှန်ရေးလုပ်ရမယ်။ရှောင်နေတိမ်းနေရတဲ့သူတွေထက် လူထုကြားမှာ လျှိုပြီး အလုပ်လုပ်ရမယ့်လူတွေကို များများစည်းရုံးထားဖို့လိုမယ်။
အပေါ်က လေးချက်ဟာ အမျိုးသားညွှန့်ပေါင်းအစိုးရ(သို့)အမျိုးသားညီညွတ်ရေးအစိုးရအတွက် တည်ဆောက်ရေးလမ်းညွှန်လေးရပ်ဖြစ်တယ်။ဒီလမ်းညွှန်လေးရပ်ကို CRPH အနေနဲ့ မဟာမိတ်ဆက်ဆံရေးကို ထောက်ပြီး ထည့်သွင်းစဉ်းစားခြင်းပြုမယ်ဆိုရင် ပြည်သူလူထုအတွက် ကောင်းမွန်တဲ့အလှည့်အပြောင်း ပေါ်လာမှာဖြစ်ပြီး ထည့်မစဉ်းစားဘဲ ပေလယျကံပြုမယ်ဆိုရင်တော့ CRPH ဟာ ခတ်ကွင်းပြင်ရင်း ပြင်ရင်းနဲ့ ရွာသစ်ကြီးရောက်တော့မယ့်အခြေကို ဆိုက်တော့မှာဖြစ်ကြောင်း သတိပေးလိုပါတယ်ခင်ဗျား။
တိုက်တိုင်းအောင် (ဖက်ဒရယ်ဒီမိုကရေစီဖော်ဆောင်ရေးပြည်သူ့ကော်မတီဝင်)