RNA_ဒီဇင်ဘာ(၂၃)၊၂၀၂၄ခုနှစ်။
ချင်းပြည်နယ်တစ်ခုလုံး စစ်ကောင်စီလက်အောက်မှ လွတ်မြောက်ရန် ဟားခါးမြို့၊ တီးတိန်မြို့၊ ထန်တလန်မြို့တို့သာ ကျန်ရှိတော့ပြီး ဖမ်းလမ်းမြို့သိမ်းရန် စစ်ကောင်စီလက်အောက်ခံ ခလရ ၂၆၈ တပ်စခန်းတစ်ခုကို ချင်းညီနောင်နှင့်မဟာမိတ်များက အရှိန်အဟုန်မြှင့် ထိုးစစ်ဆင်နေကြောင်း သိရသည်။
“ချင်းပြည်တောင်ပိုင်းကတော့ စစ်ကောင်စီကင်းစင်သွားပါပြီ။ ချင်းတစ်ပြည်လုံးအနေနဲ့တော့ ၈၅ ရာ ခိုင်နှုန်းနီးပါး လွတ်မြောက်နေပြီလို့ ပြောလို့ရမယ်။ တီးတိန် ထန်တလန် ဟားခါးကတော့ ကျန်နေ သေးတယ် ဖလမ်းကလည်း ၂၆၈ တပ်ကုန်းတစ်ခုသာ ကျန်တယ်၊ ကျန်နေရာတွေက စစ်ကောင်စီ ကင်းစင်သွားပြီ” ဟု ချင်းညီနောင်အဖွဲ့ဝင် CDF မင်းတပ် စစ်ဦးစီချုပ် ဆလိုင်းထန်းချွန်းဖေက ယနေ့နံနက်ပိုင်းက ပြုလုပ်သည့် သတင်းစာရှင်းလင်းပွဲတွင် ပြောကြားထားသည်။
ချင်းညီနောင်တပ်ဖွဲ့အနေဖြင့် ကျင်းဒွေးမြို့၊ မတူပီမြို့၊ မင်းတပ်မြို့နှင့် ကန်ပက်လက်အပါအဝင် ချင်းပြည်နယ်တောင်ပိုင်းရှိ မြို့များအားလုံးကို တိုက်ခိုက်သိမ်းပိုက်ပြီးဖြစ်ပြီးဖြစ်ကြောင်း၊ ဖလမ်းမြို့ကို သိမ်းပိုက်နိုင်ရေး တိုက်ပွဲပြင်းထန်နေပြီး မင်းတပ်မြို့သိမ်းတိုက်ပွဲတွင်လည်း ခလရ ၂၇၄ တပ်ရင်းမှ တပ်ရင်မှူး ဗိုလ်မှူးကြီးအပါအဝင် စစ်သုံ့ပန်းအများအပြားဖမ်းဆီးရမိထားကြောင်း သိရသည်။
ချင်းပြည်နယ်တောင်ပိုင်းမှ မြို့သိမ်းတိုက်ပွဲများတွင် ချင်းညီနောင်နှင့်အတူ မဟာမိတ်များ ပူးပေါင်းတိုက်ခိုက်ခဲ့ကြကြောင်း၊ ချင်းပြည်နယ် လွတ်မြောက်သွားပါကလည်း ချင်းညီနောင်အနေဖြင့် သက်ဆိုင်ရာ အဖွဲ့အစည်းများနှင့် ပူးပေါင်းပြီး စစ်အာဏာရှင်လက်အောက်မှ အားလုံးလွတ်မြောက်ရေး တိုက်ပွဲဝင်သွားမည်ဖြစ်ကြောင်း ပြောကြားထားသည်။