ဒေါ်အောင်ဆန်းစုကြည်အပါ နိုင်ငံရေးအကျဉ်းသားများ လွှတ်ပေးရေး၊ စစ်ကောင်စီ၏ အကြမ်းဖက်မှုများ အမြန်ဆုံးရပ်တန့်ရေး ကုလလုံခြုံရေးကောင်စီ အတည်ပြု
RNA_ဒီဇင်ဘာ ၂၂၊ ၂၀၂၂ ခုနှစ် ။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားများအားလုံးကို အမြန်ဆုံးလွှတ်ပေးရန်၊ အာဏာသိမ်း စစ်ကောင်စီက ကျူးလွန်နေသည့် အကြမ်းဖက်မှုများကို အမြန်ဆုံးရပ်တန့်ပေးရန် စသည့်အချက်များပါဝင်သော မြန်မာ့အရေးဆုံးဖြတ် ချက်ကို ကုလသမဂ္ဂလုံခြုံရေးကောင်စီက ဒီဇင်ဘာ ၂၁ ရက်တွင် မဲခွဲဆုံးဖြတ်ပြီး အတည်ပြုလိုက်သည်။
အကြမ်းဖက်စစ်ကောင်စီကို လက်ရှိကျုးလွန်နေသောအကြမ်းဖက်မှုများကို အမြန်ဆုံးရပ်တန့်ရေး၊ နိုင်ငံရေးအကျဉ်းသားများ အပါအဝင် ဖမ်းဆီးခံထားရသူများအားလုံးကို အမြန်ဆုံးပြန်လွှတ်ပေးရေး၊လူ့အခွင့်အရေးလေးစားရန် တောင်းဆိုချက်များပါဝင်သော ဆုံးဖြတ် ချက်တစ်ခုကို လူ့အခွင့်အရေးလုံခြုံရေးကောင်စီက ချမှတ်လိုက်ခြင်း ဖြစ်သည်။
” အခုဆုံးဖြတ်ချက်က ကုလလုံခြုံရေးကောင်စီမှာ မြန်မာနိုင်ငံအတွက် သမိုင်းဝင်တဲ့ တိုးတက်ပြောင်းလဲသော ခြေလှမ်းတခုလို့ပြောနိုင်ပြီး အကြမ်းဖက်စစ်ကောင်စီကီု တောင်းဆိုမှုနဲ့ နိုင်ငံတကာကလုပ်ဆောင်ရန်ဆိုတဲ့အချက်တွေပါဝင်ပါတယ်။ အကြမ်းဖက်စစ်ကောင်စီကို လက်နက်တင်ပို့ရောင်းချမှုတွေ ရပ်တံ့ရန်ဆိုတဲ့အချက်မျိုးတွေ ကျန်ခဲ့ပါတယ်၊ ဒါတွေကို မလိုက်နာရင် နိုင်ငံတကာအနေနဲ့ ဘယ်လိုအရေးယူဆောင်ရွက်မယ်ဆိုတဲ့အဆင့်ထိတော့ မပါဝင်လာသေးပါဘူး။ ဒါပေမဲ့ ဒီဆုံးဖြတ်ချက်ကနေ နိုင်ငံတကာက ဆက်လက်ကြိုးပမ်းဆောင်ရွက်ရမယ့်လုပ်ငန်းတွေအတွက် ခွန်အားသက်ရောက်မှု ကြီးကြီးမားမားဖြစ်စေပါတယ်။ အကြမ်းဖက်စစ်ကောင်စီကို နောက်ထပ်အရိူက်ထိစေတဲ့ လုပ်ဆောင်ချက်နဲ့ ရပ်တည်ချက်တွေကို မဲပေးမှုအပေါ်သုံးသပ်ရင် တွေ့နိုင်ပါတယ်။ အာဆီယံရဲ့လုပ်ဆောင်နိုင်မှုကို ပိုမိုအားကောင်းစေနိုင်ပါတယ်။ မြန်မာ့အရေးကို ပြည်တွင်းရေးဖြစ်တယ်ဆိုပြီး မျက်နှာလွှဲလက်ရှောင်နေတဲ့ ကုလသမဂ္ဂဝင်နိုင်ငံတွေကို တာဝန်ပေးလိုက်တာဖြစ်ပါတယ်။ မြန်မာ့အရေးဟာ ကမ္ဘာမှာမအေးသေးဘူးဆိုပြီး မြန်မာပြည်သူတွေကို အားပေးလိုက်တဲ့လုပ်ဆောင် ချက်တခုဖြစ်ပါတယ်။ ဆက်လက်ပြီးတော့ ကြိုးပမ်းလုပ်ဆောင်သွားပါ့မယ် ” ဟူ၍ အမျိုးသားညီညွတ်ရေးအစိုးရ (NUG) လူ့အခွင့်အရေးဝန်ကြီး ဦးအောင်မျိုးမင်းက လူမှုကွန်ယက်မှတစ်ဆင့်သတင်းထုတ်ပြန်ခဲ့သည်။
ကုလဌာနများ အမြင့်ဆုံးဆုံးဖြတ်ချက်ချမှတ်သည့်ဌာနဟု ဆိုနိုင်သည့်ကုလလုံခြုံရေးကောင်စီအနေဖြင့် လွန်ခဲ့တဲ့ (၇၄) နှစ်အတွင်း မြန်မာနိုင်ငံအပေါ် ပထမဦးဆုံးချမှတ်သည့် ဆုံးဖြတ်ချက်ဖြစ်ပြီး မြန်မာနိုင်ငံနှင့်ပတ်သက်၍ ယခင်က လူ့အခွင့်အရေးကောင်စီနှင့် အထွေထွေညီလာခံတို့တွင်ဘ ဆုံးဖြတ်ချက်များ ချမှတ်ခဲ့ဖူးသည်။
လုံခြုံရေးကောင်စီတွင်လည်း ကြေညာချက် (Statement) များ ထုတ်ပြန်ခဲ့ဖူးပြီး ယခုထုတ်ပြန်ခဲ့မှုသည် ကောင်စီဆုံးဖြတ်ချက် (resolution) အဆင့်ဖြစ်၍ည လေးစားလိုက်နာရန်လိုအပ်သည့်အဆင့်ဖြစ်ကြောင်း ဦးအောင်မျိုးမင်းက ပြောသည်။
ယင်းသို့ ဆုံးဖြတ်နိုင်ရန်အတွက် အမြံတမ်းအဖွဲ့ဝင် (၅) နိုင်ငံနှင့် အလှည့်ကျအဖွဲ့ဝင် (၁၀) နိုင်ငံက မဲခွဲဆုံးဖြတ်ခဲ့ပြီး မဲအနည်းအများနှင့် ဆုံးဖြတ်ခဲ့ကြောင်း၊ အမြဲတမ်းအဖွဲ့ဝင် (၅) နိုင်ငံထည်းက တစနိုင်ငံမှ ဗီတိုအာဏာသုံး ကန့်ကွက်လျင် အတည်ပြုလို့မရကြောင်း သိရသည်။
ယခုဆုံးဖြတ်ချက်ချနိုင်ခြင်းသည့ ဗီတိုအာဏာသုံးပြီး ကန့်ကွက်သည့်နိုင်ငံမရှိတဲ့အပြင် ထောက်ခံသူ (၁၂) နိုင်ငံ။ ကြားနေ (၃) နိုင်ငံသာရှိခဲ့၍ ဆုံးဖြတ်ချက်အတည်ပြုနိုင်ခဲ့ခြင်းဖြစ်ပြီးထူးခြားချက်အနေဖြင့် တရုတ်နှင့် ရုရှားနိုင်ငံတို့က မကန့်ကွက်ဘဲ အိန္ဒိယနိုင်ငံနှင့်အတူ ကြားနေမဲပေးခဲ့ကြောင်း ဦးအောင်မျိုးမင်းက ပြောသည်။
