ရန်ကုန် ၊ ဒီဇင်ဘာ ၁၀ ရက်။
ဒီနေ့ မနက်ပိုင်း ရန်ကုန်မြင်ကွင်းတွေအရဆိုရင်လမ်းပေါ်မှာ လူတွေ၊ကားတွေ စျေးသည်တွေ အတော့်ကို နည်းပါးလွန်းနေပါတယ်။ ဆိုင်အများအပြားပိတ်ထားတာကို တွေ့ရပြီး ပုံမှန်လူစည်ကားရာ ရန်ကုန်မြို့ နေရာတော်တော်များများ
တိတ်ဆိတ်ခြောက်ကပ်နေတာတွေ့ရပါတယ်။
ဒီအခြေအနေဟာ အကြမ်းဖက် စစ်ကောင်စီရဲ့ ဖိအားပေး ခြိမ်းခြောက်နေတဲ့ ကြားက “ငါတို့မြို့ကို ငါတို့ပိုင်တယ် ငါတို့ငြိမ်ချင် ငြိမ်မယ် ငါတို့ လှုပ်ချင်လှုပ်မယ်” ဆိုပြီး ကားမရှိ၊ လူမရှိ၊ ဈေးသည်မရှိ တရက်တာ Silent Strike သပိတ်မှာ ပါဝင်ပြီး စစ်အာဏာရှင်ကို အလိုမရှိကြောင်း ငြိမ်းချမ်းစွာ တိုက်ပွဲဝင်နေကြခြင်း ဖြစ်ပါတယ်။
စစ်အာဏာရှင်တော်လှန်ရေး အသံတိတ်သပိတ် Silent Strike ကို ယနေ့ ကျရောက်တဲ့ အပြည်ပြည်ဆိုင်ရာ လူ့အခွင့်ရေးနေ့မှာ နိုင်ငံအဝှမ်းက ပြုလုပ်နေတာဖြစ်ပါတယ်၊ ပြည်သူများရဲ့ ဒီမိုကရေစီလိုလားမှုနဲ့ လူ့အခွင့်အရေးဆုံးရှုံးနေမှုတွေကို မီးမောင်းထိုးပြလိုက်တာဖြစ်သလို စစ်အာဏာရှင်ကို ပြည်သူတွေ ရွံရှာမုန်းတီးနေတဲ့အကြောင်း ကမ္ဘာကြီးကို လက်တွေ့ပြသလိုက်တာ ဖြစ်ပါတယ်။
မြန်မာနိုင်ငံမှာ ဖြစ်ပေါ်လျက်ရှိနေတဲ့ လူ့အခွင့် ရေးဆိတ်သုဉ်းနေမှုများကို ဖော်ညွှန်းရေး၊ တော် လှန်ရေးအ ဆက်ဆက် ပေးဆပ်တိုက်ပွဲဝင်ခဲ့ကြသည့် အာဇာနည် သူရဲကောင်းအပေါင်းကို ဂုဏ်ပြုအောက်မေ့ရေးစတဲ့ ရည်ရွယ်ချက်တွေနဲ့ စစ်အာဏာရှင်တော်လှန်ရေး အသံတိတ်သပိတ် Silent Strike ကို ပြည်သူများ အပါဝင်ပြီး ပြုလုပ်နေတာဖြစ်ပါတယ်။
မြန်မာနိုင်ငံက ဆိတ်သုဉ်းနေတဲ့ လူ့အခွင့်အရေး
များအတွက် တနိုင်ငံလုံး မနက် (၁၀) နာရီကနေ ညနေ (၄) နာရီထိ လမ်းပေါ်မှာ ဈေးဆိုင်မရှိ၊ ကားမရှိ၊ လူမရှိ ခြင်းနဲ့ “ဆိတ်သုဥ်းနေတဲ့လူ့အခွင့်အရေး တော်လှန်ရေးနဲ့သိမ်းပိုက်ကြ” ဆိုပြီး အသံတိတ်သပိတ် ပြုလုပ်ကြဖို့ သပိတ်ဦးဆောင်သူတွေက ပြည်သူလူထုကို ကြိုတင်ပြီး တိုက်တွန်းနှိုးဆော်ထားတာပါ။
မြန်မာပြည်သူတွေ ဒီမိုကရေစီရေး၊ လူ့အခွင့်အရေးနဲ့ ဖက်ဒရယ်ပြည်ထောင်စု တည်ဆောက်ရေးတို့အတွက် အာဏာသိမ်းစစ်တပ်ကို နည်းမျိုးစုံနဲ့ ဆန့်ကျင်နေတဲ့ ကာလဖြစ်ပါတယ်၊ လမ်းမတွေပေါ်မှာ ကြွေးကြော်သံတွေနဲ့ ကမ္ဘာကြီး တခုလုံးကြားအောင် အော်ဟစ်ခဲ့ကြတယ်၊ ငြိမ်းချမ်းစွာ ဆန္ဒပြနေတဲ့လူအုပ်ကြီးကို သေနတ်ပစ် ဖြိုခွင်းခဲ့ကြ၊ အကျဉ်းထောင်တွေထဲ မတရားဖမ်းဆီးခဲ့ကြ၊ လူပေါင်းထောင်ချီ အသတ်ခံနေရတာတောင် ပြည်သူတွေဟာ အခွင့်ရတိုင်း စစ်အာဏာရှင်တွေကို မောင်းထုတ်ဖို့ ရောက်တဲ့နေရာက ရတဲ့အခွင့်အရေးကို အသုံးပြုပြီး ကြိုးစားပြီး လုပ်ဆောင်နေကြ လူထုတိုက်ပွဲဖော်ဆောင်ဆောင်သူတွေရဲ့ တိုက်တွန်းနှိုးဆော်မှုတွေကို နားစွန့်နေကြတာပါ။
ဒီလို တိုက်တွန်းနှိုးဆော်ချက်တွေနဲ့အတူ တဖက်မှာလည်း Silent Strike Day မတိုင်ခင် ဒီဇင်ဘာ ၉ ရက်နေ့မှာ အကြမ်းဖက်စစ်တပ်က လုပ်ငန်းရှင်တွေ၊ စျေးတွေ၊ ဈေးသည်တွေကို ဆိုင်တွေဖွင့်လှစ်ဖို့ ၊ လုပ်ငန်းတွေ မပိတ်ဖို့၊ စျေးတွေ မပိတ်ဖို့ ပုံစံအမျိုးမျိုးနဲ့ ဖိအားပေး ခြိမ်းခြောက်တာမျိုးတွေလည်း လုပ်ခဲ့ပါတယ်။
ဘယ်လိုပင် ခြိမ်းခြောက်ဖိအားပေးခဲ့ပါစေ”ငါတို့မြို့ကို ငါတို့ပိုင်တယ်၊ ငါတို့ငြိမ်ချင် ငြိမ်မယ် ငါတို့ လှုပ်ချင်လှုပ်မယ်” ဆိုတဲ့ အသံတိတ်သပိတ်Silent Strike ကို ရန်ကုန်နေပြည်သူများက ရဲရဲဝံ့ဝံ့ ပါဝင်တိုက်ပွဲ ဝင်နေကြခြင်း ဖြစ်ပါတယ်။
Red News Agency