RNA_ဖေဖော်ဝါရီ(၇)၊၂၀၂၅ခုနှစ်။
မကွေးတိုင်း၊ ပွင့်ဖြူမြို့နယ်၊ ကြီးအုံကြီးဝတမံနှင့် သုံးမိုင်ပေါက်တွင် စစ်ကြောင်းထိုးလာသော စစ်ကောင်စီတပ်နှင့် ဒေသတွင်း PDF များ တိုက်ပွဲဖြစ်ပွားခဲ့ရာ စစ်ကောင်စီတပ်မှ (၃၀) ခန့်ထိခိုက်နိုင်သည်ဟု မင်းဘူးခရိုင် အမှတ် (၇) တပ်ရင်း – ပွင့်ဖြူ PDF ထံမှ သိရသည်။
၂၀၂၅ ခုနှစ် ဖေဖော်ဝါရီလ ၁ ရက် မဲဇလီတံတား တိုက်ပွဲအတွင်း အထိနာခဲ့သော စစ်ကောင်စီတပ်သားများသည် ဖေဖော်ဝါရီလ ၃ ရက်နေ့တွင် ပုသိမ်-မုံရွာလမ်း ၃ မိုင်ပေါက်သို့ အင်အား ၁၅၀ ခန့်ဖြင့် စစ်ကြောင်းထိုးဝင်ရောက်လာသည့်အတွက် နေ့လယ် ၂ နာရီကျော်တွင် မိနစ် (၃၀) ခန့် ထိတွေ့မှု ဖြစ်ပွားခဲ့ကြောင်း၊ ဖေဖော်ဝါရီလ ၅ ရက်တွင် လက်နက်ကြီး ပစ်ကူများဖြင့် စစ်ကောင်စီတပ်သည် ကြီးအုံကြီးဝ တမံသို့ စစ်ကြောင်းထိုးဝင်ရောက်လာသည့်အတွက် ညနေ ၄ နာရီ ၃၀ မိနစ်ဝန်းကျင်မှ ၆ နာရီအထိ နှစ်ဖက်တိုက်ပွဲ ဖြစ်ပွားခဲ့သည်ဟု သိရသည်။
“တိုက်ပွဲနှစ်ခုအတွင်း စစ်ကောင်စီတပ်သား ၃၀ ဝန်းကျင် ထိခိုက်နိုင်ပြီး အတိအကျကိုစုံစမ်းနေဆဲဖြစ်ပါသည်။ စစ်ကောင်စီတပ်သားများအထိနာသဖြင့် မဲဇလီရဲစခန်းနှင့် နောက်ချန် အင်အားများမှ လက်နက်ကြီးပစ်ကူ ဆက်တိုက်ပေးနေခဲ့ပါသည်” ပွင့်ဖြူ PDFက ထုတ်ပြန်ပြောကြားထားသည်။
စစ်ကောင်စီတပ်သားများသည် လက်ရှိအချိန်ထိ ကြီးအုံကြီးဝ တမံကုန်းတွင်သာ ရှိသေးပြီး လက်နက်ကြီးများဖြင့် ရမ်းသမ်းပစ်ခတ်မှုများလုပ်ဆောင်လျက်ရှိကြောင်း၊ စစ်ကောင်စီတပ်စစ်ကြောင်းကို မင်းဘူးခရိုင်အမှတ် ၇ တပ်ရင်း၊ ပြည်သူကာကွယ်ရေးအဖွဲ့-ပွင့်ဖြူမြို့နယ်၊ မကွေးတိုင်း ပကဖ ရွေ့လျားစစ်ကြောင်း(Yenanthar Column) တို့ ပူးပေါင်းတိုက်ခိုက်ခဲ့ခြင်းဖြစ်သည်။
#RedNewsAgency #REDNEWS #RNA #AhNyar