RNA_ဇွန် (၁)၊၂၀၂၄ ခုနှစ်။
ကရင်နီပြည် လွိုင်ကော်မြို့တွင် စစ်ကောင်စီတပ်နှင့် KNDF ပူးပေါင်းတပ်များအကြား တိုက်ပွဲဆက်လက်ဖြစ်ပွားနေပြီး စစ်ကောင်စီတပ်မှ စစ်ကူလာနေသော စစ်ကြောင်းများနှင့်လည်း လွိုင်လင်လေးမြို့နယ်အတွင်း လွန်ခဲ့သည့်တပတ်ကျော်ကတည်းမှ ယနေ့ (ဇွန်လ ၁ ရက်) အထိ တိုက်ပွဲပြင်းထန်နေကြောင်း သိရသည်။
“စစ်ကောင်စီက အင်အားဖြည့်တာမျိုးတွေ တလျှောက်လုံးလုပ်နေတယ်။ အစောက ပြောသလို လွိုင်လင်းလေးနဲ့ လွိုင်ကော်ကြား တိုက်ပွဲဖြစ်တာက ဆီဆိုင်ဘက်ကနေလာနေတဲ့ စစ်ကြောင်းတွေပေါ့နော်။ အဓိကတော့ လွိုင်ကော်မြို့ထဲကို အင်အားဖြည့်ချင်တဲ့ ပုံစံမျိုးပေါ့နော် အဲဒီစစ်ကြောင်းတွေနဲ့ တိုက်ပွဲဖြစ်နေတာပေါ့။ လွိုင်လင်လေးဘက်က စစ်ကြောင်းတွေက လွိုင်ကော်မြို့ထဲ ဝင်ချင်နေတာပေါ့” ဟု KNDF ဗဟိုသတင်းပြန်ကြားရေးအဖွဲ့မှ တာဝန်ရှိသူတဦးက Red News Agecny ကိုပြောသည်။
ရှမ်းပြည်နယ်နှင့် ကရင်နီပြည်နယ် အစပ် လွိုင်လင်လေး- လွိုင်ကော်အကြားနှင့် ဆီဆိုင်မြို့နယ်အတွင်းထိပါ KNDF ပူးပေါင်းတပ်ဖွဲ့များနှင့် စစ်ကြောင်းထိုးလာသည့် စစ်ကောင်စီတပ်များနှင့်တိုက်ပွဲပြင်းထန်နေပြီး စစ်ကောင်စီတပ် အသေအဆုံးများရှိကာ လွိုင်ကော်မြို့အတွင်းသို့ မဝင်နိုင်သေးကြောင်း၊ လွိုင်ကော်မြို့တွင်းလည်း KNDF ပူးပေါင်းတပ် ထိန်းချုပ်နေရာများ ပြန်ပေးရခြင်းမရှိသေးကြောင်း၊ မြို့တွင်း ထိတွေ့တိုက်ပွဲများလည်း နေ့စဉ်နီးပါးဖြစ်ပွားနေသည်ဟု သိရသည်။
#RedNewsAgency