RNA_မေ(၁၀)၊၂၀၂၃ ခုနှစ်။
စစ်ကိုင်းတိုင်း၊ မုံရွာမြို့နယ်၊ စေသူကျေးရွာကို ဗုံးကြဲတိုက်ခိုက်ရန် စစ်ကောင်စီတပ်မှ လွှင့်တင်လိုက်သည့် ဗုံးတပ်ဒရုန်းကို ပြည်ထောင်စုလွတ်မြောက်ရေးတပ်ဦး-Union Liberation Front နှင့် မဟာမိတ်များ ပစ်ချနိုင်ခဲ့ပြီး ယမန်နေ့က ဒရုန်းနှင့်ဗုံးသီးကို သိမ်းဆည်းနိုင်ခဲ့ကြောင်း သိရသည်။
အနောက်မြောက်တိုင်းစစ်ဌာနချုပ်(နမခ) အခြေစိုက် အလုံမြို့၊ စစ်ပင်ဆိပ်မှ စစ်ကောင်စီတပ်ကား ၃ စီးဖြင့််လာရောက်ပြီး လွှင့်တင်ခဲ့သော ဒရုန်းနှစ်စီးကို ပြည်ထောင်စုလွတ်မြောက်ရေးတပ်ဦး(ULF)နှင့် မဟာမိတ်တပ်ပေါင်းစုအဖွဲ့မှ မေလ ၇ ရက်နေ့ ညနေ ၄ နာရီဝန်းကျင်က Drone Catcher ဖြင့် ပစ်ချခဲ့ရာ တစ်စီးမှာချင်းတွင်းမြစ်အတွင်းပြုတ်ကျခဲ့ပြီး ယင်းဒရုန်းကိုယ်ထည်နှင့်ဗုံးသီးကို ယမန်နေ့က ရှာဖွေတွေ့ရှိခဲ့ခြင်းဖြစ်သည်။
စစ်ကောင်စီတပ်က ဗုံးကြဲရန် လွှင့်တင်လိုက်သည့် ဒရုန်းကို ဒေသခံကာကွယ်ရေးမဟာမိတ်အဖွဲ့များက ကျောက်မျက်တောင်စခန်းသိမ်းပွဲ အတွင်းသိမ်းဆည်းရရှိသော Drone Catcher ဖြင့် ပစ်ခတ်နိုင်ခဲ့ခြင်းဖြစ်ကြောင်း၊ စစ်ကောင်စီတပ် အသုံးပြုသည့် ဒရုန်းမှာ ရုရှားနိုင်ငံထုတ်ဟု ယူဆရပြီး ဒရုန်းတပ် ဗုံးသီးမှာ အီနာဂါဗုံးသီးဖြစ်သည်ဟု ပြည်ထောင်စုလွတ်မြောက်ရေးတပ်ဦး-Union Liberation Front မှ ထုတ်ပြန်ထားသည်။
#RedNewsAgency