ရခိုင်-ချင်းဒေသအစပ်ရှိ ပလက်ဝဒေသကို ထိန်းချုပ်လိုက်နိုင်တဲ့နောက်မှာ မကွေးတိုင်းအတွင်းရှိ အညာတပ်ပေါင်းစုတွေဆီကို လက်နက်ခဲယမ်းစီးဆင်းဖို့ လမ်းကြောင်း ပိုမိုပွင့်လာနိုင်ပါတယ်။ လက်ရှိမှာ ရခိုင်ပြည်နယ်အတွင်းရှိ စစ်ကောင်စီအခြေစိုက် တပ်ရင်းတပ်ဖွဲ့များ၊ စခန်းကုန်းများကို ရက္ခိုင့်တပ်တော် AA မှ အပြင်းအထန် ထိုးစစ်ဆင်တိုက်ခိုက်နေ………….
မောင်ဝိ
စစ်ကောင်စီတပ်စွဲထားတဲ့ မီးဝဗျူဟာစခန်းကုန်းကို ဇန်နဝါရီ ၉ ရက်နေ့မှာ ရက္ခိုင့်တပ်တော် AAမှ စတင်တိုက်ခိုက်ခဲ့ပြီး၊ ဇန်နဝါရီ ၁၄ ရက်နေ့မှာအပြီးသတ် သိမ်းပိုက်ရရှိခဲ့တာ ဖြစ်တယ်။ ဒီနောက်တော့ ပလက်ဝ ဒေသတခုလုံး စစ်ကောင်စီ ကင်းစင်နယ်မြေဖြစ်ကြောင်း ရက္ခိုင့်တပ်တော် AAမှ ထုတ်ပြန်ထားတား အားလုံးအသိဖြစ်ပါလိမ့်မယ်။
ရက္ခိုင့်တပ်တော် AA အနေနဲ့ ပြီးခဲ့တဲ့ ၂၀၂၃ ခုနှစ်၊ နိုဝင်ဘာလပိုင်းမှစတင်ပြီး ပလက်ဝဒေသတွေကို ထိုးစစ်ဆင်တိုက်ခိုက်ခဲ့တာ ဖြစ်တယ်။ တိုက်ခိုက်မှုအတွင်း စစ်ကောင်စီရဲ့ စစ်ရေးအရ အရေးပါတဲ့ ထရွန်အိုင်ဗျူဟာနဲ့ နှုံးဘူးဗျူဟာ ၂ ခုစလုံးကို နိုဝင်ဘာလ ၁၄ ရက်နေ့မှာ စတင်တိုက်ခိုက်ခဲ့ပြီး၊ ဒီဇင်ဘာလ အစပိုင်းမှာ သိမ်းပိုက်ရရှိခဲ့တာဖြစ်တယ်။
တဆက်တည်းမှာပဲ ၂၀၂၄ ခုနှစ်၊ ဇန်နဝါရီ ၂ ရက်နေ့မှာ ပလက်ဝ အထက်ပိုင်းရှိ ရှင်းလက်ဝဗျူဟာစခန်းကို ဆက်လက်သိမ်းပိုက်နိုင်ခဲ့တာဖြစ်တယ်။ လက်ရှိမှာတော AA တပ်ဖွဲ့မှ ပလက်ဝဒေသတခုလုံးကို ထိန်းချုပ်နိုင်ခဲ့ပြီဖြစ်တယ်။ ပလက်ဝဒေသအတွင်း စစ်ကောင်စီရဲ့ စခန်းကုန်းတချို့ ပြန့်ကျဲ ရှိနေသေးပေမယ့် ပထဝီအရ အရေးပါတဲ့ ကုလားတန်မြစ်ကြောင်း တလျှောက်မှာတော့ စစ်ကောင်စီရဲ့ အချက်အချာကျတဲ့ ဗျူဟာကုန်းတွေကို ထိန်းချုပ်ထားနိုင်ခဲ့တာဖြစ်တယ်။
