Tag: နွေဦးတော်လှန်ရေး

RNA_ဖေဖော်ဝါရီ ၁ ရက်၊ ၂၀၂၂ ခုနှစ်။

စစ်ကိုင်းတိုင်း၊ ကနီမြို့နယ်၊ ကင်းကျေးရွာမှ ပြည်သူ (၇) ဦးကို စစ်ကောင်စီတပ် စစ်ကြောင်းက ဖမ်းဆီးခဲ့ရာတွင် ၂ ဦးသေဆုံးပြီး ၄ ဦးပျောက်ဆုံးနေကာ ၁ ဦးသာ လွတ်မြောက်ခဲ့ကြောင်း သိရသည်။

ချင်းတွင်းမြစ်ကြောင်းတိုင်း ဆန်တက်လာသည့် စစ်ကောင်စီတပ်ရေယာဉ်အုပ်စုမှ စစ်ကြောင်းသည် ဇန်နဝါရီလ ၂၉ ရက်နေ့က ကင်းကျေးရွာရောက်ရှိပြီး ပြည်သူ (၇) ဦးကို ဖမ်းဆီးခဲ့ကြောင်း၊ အသက် ၃၆ နှစ်အရွယ် အမျိုးသားသည် ညှပ်ရိုးနှစ်ဖက်အောက် ထိုးသွင်းမွှေဓားဒဏ်ရာ၊ ကြောထိုးသွင်းမွှေဓားဒဏ်ရာဖြင့် ၁ ဦးသာ ထွက်ပြေးလွတ်မြောက်လာသည်ဟု ကနီ ပြည်သူ့ကာကွယ်ရေးတပ်ဖွဲ့က ‌ယနေ့ထုတ်ပြန်ထားသည်။

အသက် ၅၈ နှစ်အရွယ်အမျိုးသား လည်ပင်း၊ ဘယ်ဘက်ရင်အုံ ဓားထိုးသွင်းမွှေဒဏ်ရာ ၊ နဖူးမျက်ခုံးပြတ်ရှဒဏ်ရာဖြင့်သေဆုံးနေပြီး၊ အသက် ၂၅ နှစ်အရွယ် အမျိုးသားမှာလည်း လည်ပင်း ဓားဒဏ်ရာဖြင့်သေဆုံးနေကြောင်း၊ အသက် ၅၃ နှစ်၊ အသက် ၃၈ နှစ်၊ အသက် ၃၅ နှစ်အရွယ် အမျိုးသား ၃ ဦးနှင့် အသက် ၃၇ နှစ်အရွယ် အမျိုးသမီး ယခုတိုင် ပျောက်နေဖြစ်ကြောင်း ထုတ်ပြန်ချက်တွင် ဖော်ပြထားသည်။

ကင်းကျေးရွာမှ ပြည်သူ သေဆုံးနှင့် ပျောက်ဆုံး (၆) ယောက်အပြင် စစ်ကောင်စီစစ်ကြောင်းရောက်ရှိစဉ် ထွက်ပြေးတိမ်းရှောင်နေရပြီး စစ်ကြောင်းထွက်သွားမှ အိမ်ပြန်လာသည့် ကလေးသုံးယောက်၏ မိခင်တစ်ဦးမှာလည်း စစ်ကောင်စီတပ်က မီးဖိုချောင် ကြောင်အိမ်အတွင်း မိုင်းထောင်ထားရာမှ ပေါက်ကွဲပြီး ယနေ့ နံနက်က သေဆုံးသွားကြောင်း သိရသည်။

Red News Agency

RNA_ဖေဖော်ဝါရီ ၁ ရက်၊ ၂၀၂၂ ခုနှစ်။

စစ်တပ်အာဏာသိမ်း နှစ်ပတ်လည်နေ့တွင် စစ်အာဏာ ရှင်လက်အောက် မနေလို၍ စစ်အာဏာရှင်ကို အလိုမရှိ ဆန့်ကျင်ကြောင်း မိမိကိုယ်ကို မီးရှို့ ဆန္ဒပြခဲ့သူ မန္တလေးတိုင်း၊ ကျောက်ပန်းတောင်းမြို့က ကိုအောင်အောင် သေဆုံးသွားပြီဖြစ်ကြောင်း သိရသည်။

ကိုအောင်အောင်သည် စစ်အာဏာရှင်ခေတ် ၂၀၀၁ နှင့် ၂၀၀၂ ခုနှစ်ကို ပြန်မသွားလိုဟုဆိုကာ မိမိကိုယ်မိမိ မီးရှို့ကာ စစ်အာဏာရှင်စနစ် အလိုမရှိကြောင်း ယနေ့ နေ့လည်ပိုင်းက ကျောက်ပန်းတောင်းမြို့ EPC ရုံးအနီးတွင် မိမိကိုယ်သက်သေကာ ဆန္ဒပြခဲ့ခြင်းဖြစ်ပြီး ၂၄ နာရီလုံး အများပြည်သူများ (မူးရင်း များကို + ဟုရေးထား)သာ မီးလင်းပါစေဟု ဆန္ဒပြု စာရွက်ကို ရေးသားခဲ့ကြောင်း သိရသည်။

စစ်တပ်အာဏာသိမ်းပြီး တနှစ်အတွင်း ပြည်သူ ၁၅၀၀ ကျော်အသတ်ခံထားရပြီး၊ ထောင်ချီပြီး အကျဉ်းထောင်များတွင် ဖမ်းဆီးထားကြောင်း၊ ပြည်သူများ၏ ကျန်းမာရေး စီးပွားရေး အားလုံး ကျဆင်းနေပြီး အာဏာသိမ်း စစ်တပ်သည် ပြည်တွင်းစစ်ကြီးကို ဖော်ဆောင်နေပြီး သိန်းချီသည့် စစ်ဘေးဒုက္ခသည်များ ရှိနေသလို မြို့လုံးကျွတ်နီးပါး အပါအဝင် ရွာလုံး ကျွတ်မီးရှို့ခံနေကြရပြီး ပြည်သူများ မီးရှို့အသတ်ခံရမှုများပါ ရှိနေခြင်း ဖြစ်ကြောင်း သိရသည်။

Red News Agency

RNA_ဖေဖော်ဝါရီ ၁ ရက်၊ ၂၀၂၂ ခုနှစ်။

ယနေ့ ကျရောက်သည့် စစ်တပ်အာဏာသိမ်း နှစ်ပတ် လည်နေ့ အများပြည်သူများ အသံတိတ်သပိတ် (Silent Strike) ပြုလုပ်နေကြစဉ် လမ်းပေါ်ထွက်လာသည့် တာချီလိတ်မြို့ အာဏာသိမ်းစစ်တပ်ထောက်ခံသူများ ဗုံးကွဲကွာ အနည်းဆုံးနှစ်ဦး သေဆုံးမှုရှိခဲ့ကြောင်း သိသည်။ (more…)

RNA_ဇန်နဝါရီ ၃၁ ရက်၊ ၂၀၂၂ ခုနှစ်။

စစ်ကိုင်းတိုင်း၊ ပုလဲမြို့နယ်၊ အင်မထီးကျေးရွာကို ဇန်နဝါရီလ ၃၀ ရက်နေ့ ညနေပိုင်းက PDF များဝိုင်းတိုက်ခံရစဉ် ပျူစောထီးတွေ ပြန်မတိုက်ရဲသည့်အတွက် စစ်ကောင်စီတပ်က ပစ်သတ်မှု ဖြစ်ပွားခဲ့သည်ဟု သိရသည်။

” မနေ့ညနေက စဖြစ်တာ တိုက်ပွဲက စခတွေက ပျူစောထီးတွေကို တိုက်ခိုင်းတာ မတိုက်ရဲကြဘူး အဲဒါနဲ့ ရွာထဲမှာပစ်သတ်တယ်လို့ ကြားထားတယ်၊ သတင်းက တိကျတယ် ဘယ်နှစ်ယောက်သေတယ်တော့ မပြောရသေဘူး၊ ရွာသူရွာသားတွေက ထွက်ပြေးနေကြတာ၊ ပြီးတော့ ရွာသုံးပုံ နှစ်ပုံကို မီးရှို့ပစ်တယ်၊ PDF တွေအသားစီးရလို့ ရဟတ်ယာဉ်နဲ့ပါပစ်တယ်၊ အခုမနက်လည်း ရဟတ်ယာဉ်ဝဲနေတာပဲ ရွာနားမှာ၊ အင်မထီးမှာက သူတို့အထိုင်ချနေတာ ပျူတွေကိုသင်တန်းပေးတာပေါ့၊ ပျူတွေက သုံးဆယ်လောက်ရှိတယ် သေတာဘယ်နှစ်ယောက်လဲ မသိရသေးဘူး၊ ရွာထဲဘယ်သူမှမဝင်ရဲဘူး” ဟု Red News Agency ၏ ဒေသခံ သတင်းရင်းမြစ်က ပြောထားသည်။

စစ်ကောင်စီတပ် အထိုင်ချပြီး ပျူစောထီးတွေကို စစ်သင်တန်းပေးနေသည့် အင်မထီးကျေးရွာကို ပြည်သူ့တော်လှန်ရေးတပ်မတော် (PRA) ၊ ကျားသစ်နက်တပ်ဖွဲ့၊ ပုလဲမြေပြန့်ဒေသကာကွယ်ရေးတပ်ဖွဲ့၊ ဒေသခံ ပ.က.ဖ အဖွဲ့စသည့် မဟာမိတ်တပ်ဖွဲ့များက တိုက်ခိုက်ခဲ့ကြောင်း သိရသည်။

Red News Agency