RNA- စက်တင်ဘာ ၂၀ ရက်။
ကေအဲန်ယူ-ကရင်အမျိုးသားအစည်းအရုံးလက်အောက် ခံ ကရင်အမျိုးသားကာကွယ်ရေးတပ်ဖွဲ့ – KNDO တပ်ရင်း (၁) နယ်မြေအတွင်း စစ်ကောင်စီတပ်နှင့် စက်တင်ဘာ ၁ ရက်နေ့မှ ၂၀ ရက်နေ့အထိ တိုက်ပွဲ ၄၅ ကြိမ် ဖြစ်ပွားပြီး၊ စစ်ကောင်စီဘက်က ၃၅ ဦးသေဆုံးကာ ၅၁ ဦး ဒဏ်ရာရရှိသည်ဟု ယနေ့တွင် ကေအဲန်ယူ-ဗဟိုက ထုတ်ပြန်ထားသည်။
” သံလွင်မြစ်ကမ်းနားရှိ အာဏာသိမ်းစစ်ကောင်စီ ၏ တပ်စခန်းအချို့ကို ကရင်အမျိုးသားလွတ်မြောက်ရေးတပ်မတော် KNLA နှင့် ကရင်အမျိုးသားကာကွယ်ရေးတပ်ဖွဲ့ KNDO တို့မှတိုက်ခိုက် သိမ်းယူခဲ့ပြီးနောက် ကျရှုံးသွားသော တပ်စခန်းများကို စစ်ကောင်စီဖက်မှပြန်လည် တိုက်ယူရန် စစ်ရေးလှုပ်ရှားမှုများ ပြုလုပ်နေကြောင်း KNDO ဒု-စစ်ဦးစီးအရာရှိ ဗိုလ်မှူးကြီး စောဘိုမီးကပြောပါသည်” ဟု ထုတ်ပြန်ချက်တွင် ပါရှိသည်။
ကရင်ပြည်နယ်အတွင်း စစ်ကောင်စီက ယခုရက်ပိုင်း တပ်အင်အားများ တိုးချဲ့ပို့ထားကြောင်း၊ အသိမ်းခံထားရသည့် တပ်စခန်းများကို ပြန်လည်တောင်းဆိုထားမှုများရှိကြောင်း၊ စစ်ကာင်စီတပ်စခန်းအချို့သည် တိုက်ခိုက်ခြင်းမပြုမှီ ထွက်ပြေးသွားသည့်အတွက် KNU လက်အောက်က တပ်များက သိမ်းဆည်းရမှုများရှိကြောင်း သိရသည်။
အာဏာသိမ်း စစ်ကောင်စီသည် ယခုအခါ ကရင် ပြည်နယ်၊ ကချင်ပြည်နယ်၊ ကရင်နီပြည် ( ကယား) နယ်၊ ချင်းပြည်နယ်၊ စစ်ကိုင်းတိုင်း၊ မကွေးတိုင်းတို့ကို အဓိကထားပြီး စစ်မျက်နှာ ဖွင့်ထားရကြောင်း၊ ဒေသခံ ပြည်သူ့ကာကွယ်ရေးတပ်ဖွဲ့များ၊ တိုင်းရင်းသားလက်နက်ကိုင်အဖွဲ့အစည်းများက စစ်ကောင်စီလက်နက်ကိုင်များကို ပစ်ခတ်တိုက်ခိုက်မှုများ ပြုလုပ်နေပြီး ရန်ကုန်တိုင်း၊ မန္တလေးတိုင်း၊ စစ်ကိုင်းတိုင်းမှ ပြည်သူတို့က လမ်းပေါ်ထွက် ဆန္ဒပြမှုများကို ယနေ့အထိ ပြုလုပ်နေသည်။
Red News Agency