ပွင့်ဖြူမြို့ အနောက်ဘက်တွင် စစ်ကောင်စီတပ် စစ်ကြောင်းထိုးနေပြီး ဒေသခံများကိုဖမ်းဆီးမှုတွေ ပြုလုပ်နေ

RNA_ဒီဇင်ဘာ ၆ ရက်၊၂၀၂၁ ခုနှစ်။

မကွေးတိုင်း၊ ပွင့်ဖြူမြို့နယ်၊ ပွင့်ဖြူမြို့နှင့် စေတုတ္တရာကြား မုန်းဆည်အထက် ကြီးအုံကြီးဝလမ်းခွဲဝန်းကျင်ဘက်တွင် စစ်ကောင်စီတပ်က ယခုရက်ပိုင်း စစ်ကြောင်းထိုးနေပြီး ဒေသခံပြည်သူတွေကို ဖမ်းဆီးနေကြောင်း သိရသည်။

မုန်းဆည်အထက် ကြီးအုံကြီးဝလမ်းခွဲ ချောင်းဆုံကျေးရွာဝန်းကျင်တွင် ဒီဇင်ဘာလ ၅ ရက်နေ့က မုန်း ပြည်သူ ၄ ယောက် ဖမ်းဆီးခံလိုက်ရကြောင်း၊ မုန်းတမံ အနီးမှာလည်း ပြည်သူနှစ်ယောက်ကိုဖမ်းပြီး ပါးရိုက်ကန်ကြောက်ကာ နှိပ်စက်မှုများပြုလုပ်နေကြောင်း၊ ယနေ့တွင်လည်း တောနင်းပြီး ရှာဖွေမှုများ ပြုလုပ်နေကြောင်း သိရသည်။

” အဓိက မုန်းချောင်းအတိုင်း စက်လှေတွေကို ရွာတွေကနေ အတင်းအဓမ္မခေါ်ပြီး ‌ရေကြောင်းက တက်တယ်၊ ကုန်းကြောင်းကလည်း လာတယ်၊ ဒေသခံမဟုတ်တဲ့သူတွေကော ဒေသခံတွေကော ဖမ်းနေတယ်၊ တချို့ဖမ်းပြီး ပြန်လွှတ်တယ် မလွှတ်ခင် လေးဘက်ထောက် သွားခိုင်းတာတွေလုပ်တယ်၊ သူတို့ဘာသတင်းရလို့လည်းမသိဘူး စေတုတ္တရာနဲ့ကြားဆိုတော့ PDF အသံကြားလို့နေမယ်၊ အခုတော့ တော်တော်ဆိုးဆိုးအဖွဲ့လိုက်ကြီး တောနင်းရှာနေတယ်” ဟု ဒေသခံတဦးက ပြောသည်။

ယနေ့ နေ့ နံနက်ပိုင်းက PDF များကို ရှာမည်ဟုဆိုကာ စစ်ကောင်စီတပ် (၅၀) ဝန်းကျင်က စေတုတ္တရာမြို့နှင့် ပွင့်ဖြူမြို့အကြားက ကြီးအုံကျေးရွာနှင့် သံဆည်ကျေးရွာတို့က စက်လှေများ ချောဆွဲပြီး နွားမတောင် ခြောက်ရွာဘက်နှင့် ဝန်လို ခိုနန်းကျေးရွာများဘက်မှာ ရောက်ရှိနေကြောင်း၊ ဒီဇင်ဘာ ၇ ရက်နေ့တွင်လည်း ယင်းနယ်တဝိုက်ကို ထိုးစစ်ဆင်နိုင်ကြောင်း သိရသည်။

မုန်းဆည်တမံအထက် ပိုင်းတွင် စေတုတ္တရာအထိ တောတောင်ထူထပ်ကြောင်း၊ ရခိုင်ပြည်နယ်နှင့် ချင်းပြည်နယ်များ ဆက်စပ်နေသည့် မကွေးတိုင်းအစပ်ဖြစ်ကြောင်း၊ ယင်းတောတောင်ဘက်ကို စစ်ကောင်စီတပ်က တောနင်းရှာဖွေနေခြင်းဖြစ်ကြောင်း သိရသည်။

Red News Agency

By Admin

Leave a Reply

Your email address will not be published. Required fields are marked *