Author: Editor

RNA_ဒီဇင်ဘာ ၂၃ ရက်၊ ၂၀၂၁ ခုနှစ်။

ကချင်ပြည်နယ်၊ ဖားကန့်မြို့နယ်၊ လုံးခင်းအုပ်စု၊ မှော်စီစာကျေးရွာ အောင်သာယာ (၂) အနီး စိန်စိန်လုပ်ကွက် ( ဒေသအခေါ်) မြေစာပုံပြိုကျမှု ပျောက်ဆုံးနေသူ များသော်လည်း ယနေ့ နံနက်အထိ အလောင်း (၂) လောင်းသာ ဆယ်ယူနိုင်သေးကြောင်း ဒေသခံ သတင်းရင်းမြစ်က ပြောသည်။

” ပျောက်ဆုံးတာကတော့ များတယ် (၅၀) ကျော်ရှိတယ်လို့ ခန့်မှန်းပေါ့၊ အလောင်းက မနေ့က တလောင်း အခုမနက်တလောင်း ဒါပဲရှာတွေ့သေးတယ်၊ မနေ့ကတွေ့တဲ့အလောင်းက ကိုမျိုး ခွန်ဆာကုန်းကပေါ့” ဟု RNA သတင်းရင်းမြစ်က ပြောသည်။

စိန်စိန်လုပ်ကွက်အနီးက မြေစာပုံသည့် ရေကန်သည် အမြင့် ပေ ၂၀၀၊ အလျား ပေ ၂၀၀၀ ၊ အနံ ပေ ၃၀၀ ဝန်းကျင်ရှိပြီး ဒီဇင်ဘာလ ၂၂ ရက် နံနက် ၃ နာရီ ၃၀ မိနစ်ဝန်းကျင်က ပြိုကျခဲ့ခြင်းဖြစ်ကာ ရေမဆေးကျောက်ရှာဖွေသူ (၅၀) ကျော်ပျောက်ဆုံးနေပြီး အလောင်းများ မြေကြီးအောက်ပိနေပြီး ပုပ်မှသာပေါ်လာနိုင်သည့်အခြေအနေဖြစ်ကြောင်း သိရသည်။

ဖားကန့်မြို့နယ်တွင် ရေမဆေးကျောက်ရှာဖွေသူများ နှစ်စဉ်မြေစာပုံပြိုကျမှုကြောင့် သေဆုံးမှုများရှိနေပြီး၊ ၂၀၂၀ ခုနှစ် ဇူလိုင်လ ၂ ရက် နံနက် ၆ နာရီ ၃၀ မိနစ်ဝန်းကျင်က ဖားကန့်မြို့နယ်၊ ဆိပ်မူကျေးရွာအုပ်စု၊ ဝှေခါကျေးရွာ ရပ်ကွက်(၆)၊ လခူးချောင်ရှိ ကျောက်မျက်ရွှေပြည်ကုမ္ပဏီ(ဒေသအခေါ် တစ်သုံးလုံး ကုမ္ပဏီ)၌ ကျင်းကမ်းပါး မြေပြိုမှုဖြစ်ပွားခဲ့ပြီး ရေမဆေးကျောက် ရှာဖွေသူ ၁၆၉ ဦးသေဆုံးခဲ့ပြီး ၄၃ ဦးဒဏ်ရာရရှိခဲ့ကြသည်။

Red News Agency

RNA_ဒီဇင်ဘာ ၂၂ ရက်၊ ၂၀၂၁ ခုနှစ်။

ကချင်ပြည်နယ်၊ ဖားကန့်မြို့နယ်၊ လုံးခင်းအုပ်စု၊ မှော်စီစာကျေးရွာ အောင်သာယာ (၂) အနီး စိန်စိန်လုပ်ကွက် ( ဒေသအခေါ်) တွင် ယနေ့ နံနက် ၃ နာရီ မိနစ် ၃၀ ဝန်းကျင်းက ရေကန်အတွင်း မြေစာပုံပြိုကျကာ ရေမဆေးကျော်ရှာဖွေသူ (၅၀) ကျော် ပျောက်ဆုံးနေကြောင်း သိရသည်။

” အခု ၉ နာရီ မထိုးခင်လေးမှ ရှာဖွေမှုလုပ်ကြမှာ ‌အစောပိုင်းက လှေလေးနဲ့ ရှာနေရတာ တလောင်းမှမတွေ့သေးဘူး အခုတော့ ရေငုပ်ရှာကျမှာ ရေကန်ကကျယ်တယ်၊ ‌ပျောက်နေတဲ့သူတွေ သေဖို့များတယ်၊ ဈေးဆိုင် ၂ ဆိုင်က အမျိုးသမီး ၂ ဦးလဲ ပါသွားတယ်ကြားတယ်၊ ဘေးအနားက လူတွေပြောပုံက ၅၀ ဝန်းကျင်လောက်ပါသွားတယ်ပြောကြတယ်၊ တိတိကျကျကတော့ ပြောဖို့ခက်တယ်” ဟု မြေစာပုံပြိုကျမှုအနီးရောက်ရှိနေသူ တဦးက ပြောသည်။

စိန်စိန်လုပ်ကွက်အနီးက မြေစာပုံပြိုကျသည့် ရေကန်သည် အမြင့် ပေ ၂၀၀၊ အလျား ပေ ၂၀၀၀ ၊ အနံ ပေ ၃၀၀ ဝန်းကျင်ရှိပြီး ကန်ထိပ်က မြေစာပုံ ပြိုကျခြင်းဖြစ်ကြောင်း၊ ကုမ္ပဏီများအားလုံး စက်ယန္တရားများဖြင့် ညနေ ၆ နာရီမှ နံနက် ၄ နာရီအထိ တရားမဝင် ရတနာ တူးဖော်နေကြခြင်းဖြစ်ကြောင်း၊ ရတနာကုမ္ပဏီအားလုံး ဒေသအာဏာပိုင်နှင့်ပေါင်းပြီး တရားမလုပ်လုပ်ဆောင်နေကြောင်း၊ ၂၀၂၀ ခုနှစ် ဩဂုတ်လမှစပြီး လုပ်ငန်းလိုင်စင်အားလုံး ရပ်ထားကြောင်း၊ လိုင်စင်များ ပြန်ချကာနီး အာဏာသိမ်းခံရပြီး ယနေ့အထိ စစ်ကောင်စီက တရားဝင်ချထားမှု မရှိကြောင်း သိရသည်။

ရေမဆေးကျောက်ရှာဖွေသူများသည် ယခုအချိန် စက်ယန္တရားများဖြင့် ညပိုင်းခိုးလုပ်နေမှုသာရှိသည့်အတွက် အများစုမှာ ညပိုင်းသာရှာကြကြောင်း၊ ဒီဇင်ဘာလ ၁၉ ရက်နေ့က ဆိပ်မူအုပ်စု၊ ဆိုက်းဂျာဘွမ် ကျေးရွာအနီး မြေစာပုံပြိုကျမှုတွင် ကုမ္ပဏီဝန်ထမ်း ၂ ဦးနှင့် ရေမဆေးကျောက်ရှာဖွေသူ ၃ ဦး သေဆုံးခဲ့သည်။

၂၀၂၀ ခုနှစ် ဇူလိုင်လ ၂ ရက် နံနက် ၆ နာရီ ၃၀ မိနစ်ဝန်းကျင်က ဖားကန့်မြို့နယ်၊ ဆိပ်မူကျေးရွာအုပ်စု၊ ဝှေခါကျေးရွာ ရပ်ကွက်(၆)၊ လခူးချောင်ရှိ ကျောက်မျက်ရွှေပြည်ကုမ္ပဏီ(ဒေသအခေါ် တစ်သုံးလုံး ကုမ္ပဏီ)၌ ကျင်းကမ်းပါး မြေပြိုမှုဖြစ်ပွားခဲ့ပြီး ရေမဆေးကျောက် ရှာဖွေသူ ၁၆၉ ဦးသေဆုံးခဲ့ပြီး ၄၃ ဦးဒဏ်ရာရရှိခဲ့ကြသည်။

Red News Agency

“ဗိုလ်အောင်ကျော်ဟန် ဗိုလ်အောင်ကျော်မာန်နှင့် အဆုံး သတ်လွတ်မြောက်ရေးသို့ချီတက်ကြ”

RNA_ဒီဇင်ဘာ ၂၀ ရက်၊ ၂၀၂၁ ခုနှစ်။

စစ်ကိုင်းတိုင်း၊ လက်ပံတောင်းတောင်ဒေသ ပင်မသပိတ်စစ်ကြောင်းက “ဗိုလ်အောင်ကျော်ဟန် ဗိုလ်အောင်ကျော်မာန်နှင့် အဆုံးသတ်လွတ်မြောက်ရေးသို့ချီတက်ကြ” စာသားကိုကိုင်ဆောင်ပြီး ယနေ့ ညနေပိုင်းမှာလည်း မုံရွာသပိတ်ဦးဆောင်ကော်မတီနှင့် မုံရွာကျောင်းသားများသမဂ္ဂမှ လာရောက်ပူးပေါင်းကာ ကျေးရွာအတွင်း လှည့်လည်ပြီး ကြွေးကြော်သံများဖြင့် ချီတက်ဆန္ဒပြခဲ့ကြသည်။

Photo: CJ – ပေးပို့။

Red News Agency

အလွတ်တမ်း ဓာတ်ပုံ သတင်းထောက် ကိုဇော်လင်းထွဋ် (ခ) ဖိုးသား နှင့်တက္ကသိုလ် ကျောင်းသားသမဂ္ဂမှ မဆုရည်လင်း (ခ) လင်းလင်း တို့ဖမ်းဆီးခံရ

ရန်ကုန် ၊ ဒီဇင်ဘာ ၁၉ ရက်။

အလွတ်တန်း သတင်းထောက် ကိုဇော်လင်းထွဋ် (ခ) ဖိုးသား သည် ယနေ့ ညနေတွင်ပြုလုပ်မည့် သပိတ်ဆန္ဒပြပွဲသို့ သတင်းရယူရန်အသွား ရန်ကုန်အရှေ့ပိုင်းတက္ကသိုလ် ကျောင်းသားများသမဂ္ဂမှ မဆုရည်လင်း (ခ) လင်းလင်း နှင့်အတူ လမ်းတွင် အကြမ်းဖက်စစ်တပ်၏ ဖမ်းဆီးခြင်း ကိုခံခဲ့ရကြောင်း သိရသည်။

မည့်သည့်နေရာ ကိုခေါ် ဆောင် ထိန်းသိမ်း ထားသည်ကို ယခုအချိန်ထိ မကြားသိရသေးဘဲ မိသားစုနှင့် အဆက် အသွယ်ပြတ်တောက်လျက်ရှိနေသည့်အတွက် စစ်ကောင်စီ၏ လူမဆန်တဲ့ ညှဥ်းပန်းနှိပ်စက်မှုတွေနဲ့ အသက် အန္တရာယ် ထိခိုက် မှုရှိမည်ကို မိသားစုဝင်များမှစိုးရိမ်နေကြကြောင်း သိရသည်။

Red News Agency

လေးကေ့ကော်တိုက်ပွဲတွင် ဒုတပ်ခွဲမှူး (၂) ဦး အပါအဝင် အကြမ်းဖက်စစ်ကောင်စီဘက်မှ (၅၀) ဦးနီးပါးသေဆုံးခဲ့ပြီး လက်နက်/ကျည်ဆန်အများအပြား သိမ်းဆည်းရမိ

RNA_ဒီဇင်ဘာ ၁၉ ရက်၊ ၂၀၂၁ ခုနှစ်။

လေးကေ့ကော်၊ မေတ္တာလင်းမြိုင်တိုက်ပွဲတွင် ဒုတပ်ခွဲမှူး (၂) ဦး အပါအဝင် အကြမ်းဖက်စစ်ကောင်စီဘက်မှ (၅၀) ဦးနီးပါးသေဆုံးခဲ့ပြီး လက်နက်နှင့် ကျည်ဆန်အများအပြား သိမ်းဆည်းရမိခဲ့ကြောင်း NUG ၏ PVTV မှ သတင်းထုတ်ပြန်ခဲ့သည်။

လေးကေ့ကော်ဒေသ မေတ္တာလင်းမြိုင်နှင့် မယ့်ထော်သလေးကြား ၅ ရက်မြောက်နေ့အဖြစ် အကြမ်းဖက်စစ်ကောင်စီတပ်တွေနဲ့ KNLA, PDF ပူးပေါင်းတပ်ဖွဲ့တွေအကြား တိုက်ပွဲပြင်းထန်လျက်ရှိရာ စစ်ကောင်စီဘက်မှ တပ်ခွဲမှူး (၂) ယောက်၊ ဒုတပ်ခွဲမှူး (၂) ဦး အပါအဝင် အကြမ်းဖက်စစ်ကောင်စီဘက်မှ (၅၀) ဦးနီးပါးသေဆုံးပြီး၊ ၆၀ မမ (၁) လက်၊ ပစ္စတို (၄) လက်၊ စနိုက်ပါ (၁) လက် ၊ MK1 (၃) လက်၊ MK2 (၃) လက် စုစုပေါင်း (၁၂) လက်နှင့် လက်ပစ်ဗုံးအချို့၊ ကျည်ကပ်အချို့ နှင့် ကျည်ဆန်များ သိမ်းဆည်းရရှိကြောင်း သတင်းထုတ်ပြန်ထားသည်။

ဓါတ်ပုံ – စစ်မြေပြင်သတင်းနှင့်ပြန်ကြားရေး(တောင်ပိုင်းတိုင်း)

Red News Agency